#بندريه عريس يا أجمل جلمه احجيها عريس كلبي يهيم بطاريها عريس | خادم الحسين محمـد الـربيعـي
#بندريه
عريس يا أجمل جلمه احجيها
عريس كلبي يهيم بطاريها
عريس عيون امك لتجافيها
قاسم
عريس وفرحة روحي وجانت لمك حلم
وتتمشه اكبال اعيوني وطولك اجمل رسم
وتكلي ادعيلي وادعي ساعه ابجي وابتسم
ويبني التفگ واحدها هم اتحس باليتم
كلبي
لا تبعد عنه
يا فرحة سكنه
لا تذبح ضنه
كلبي
يتمنه يشوفك
محنايه اجفوفك
وبلهفه يطوفك
•••••••••••••••••••••••••••••••••••••••••
خوفي من الحومه تبوگك مني
خوفي وتفجعني بعرسك يبني
خوفي شموعك يطفيهن حزني
قاسم
يانجمة ليلي التضوي الساهر بيك الجفن
لو هليت اعله عيوني يغيب اهلال الحزن
مرسوم اوداع بعينك ارحم گلبي اليحن
ذاخرتك لآخر شيبي وغيرك ماعندي أبن
الحومه
شنهي التطلبني
ياجاسم يبني
وتبوگك مني
الحومه
تحرمني عيونك
وتغير لونك
وفرحه يسلبونك
•••••••••••••••••••••••••••••••••••••••••
نايم تالي وأمك تنتضرك
نايم وبالحومه عيوني ادورك
نايم وگلبي الدلاني بعطرك
قاسم
اركض جيتك مشدوها وبسمك دمعي اليصب
يوليدي وتدري بنومك يكسر ظهر الگلب
ونكت ارموشك بيدي وشعرك من الترب
هيج اتجازيها اللولت تتركها بنص غرب
يبني
الكاشخ بهدومه
الحلوات ارسومه
نايم بالحومه
يبني
تنعاك اجروحي
اوجهك ياروحي
غسلته بنوحي
•••••••••••••••••••••••••••••••••••••••••
كل أم تتمنى اشوف اضناها
كل أم يغطيها افياي ارباها
كل أم تعيش ويطفاله بجاها
قاسم
لوليت اشكثر ابمهدك يبني وتكبر ردت
وحصت تعبي اتضيعها وبالحر يبني نمت
من ساعه ويمك انعى ولأمك ما فتحت
مو شعري بفگدك شيب کلي بفگدك شبت
كافي
گطعته الگلبي
يا دنيت حبي
ياشوفي ودربي
كافي
مابسك نايم
اگعد يا جاسم
الدلالي الهايم
•••••••••••••••••••••••••••••••••••••••••
رايحه يا بعد امك من دونك
رايحه بهيمه ومحرومه اعيونك
رايحه وي ذباحك بضعونك
قاسم
راح امشي وجلمه بگلبي ما تقبل تنحبس
لعيونك ردت احجيها مبارك يبني العرس
ياعريس بهل دنيه يصبح عرسه بشمس
آنه امك عطشانه اسمع اسمي حتْ لو همس
جاسم
امشي مشتاگه
الوجهك وفراگه
وياضيم الناگه
جاسم
ياشوف اعيوني
وياحيل امتوني
عنك يسبوني
