نزله لمولاتي العليله صلوات الله عليها دارت اعيونك وگلبي ذاب | خادم الحسين محمـد الـربيعـي

نزله لمولاتي العليله صلوات الله عليها

دارت اعيونك وگلبي ذاب بشواگه
ليش بس آنه الأضل وكله علناگه
ياهوى لنفاسي گلي شلون بفراگه
اتريد تبعد وانه يمك كلي مشتاگه

صحت بويه وراك
ترى يذبح جفاك
شسوي وعندي عين
ومشه عني ضواك

وحگ اعيونك بويه بويه
اموت ابدونك بويه بويه
______

ياصباح الخير هذا اليبدي من دونك
وهذا مايتسمه بيت اليخله من لونك
شلون گلبك يقبل أبقى وتاخذ اضعونك
وتدري ببنيتك مريضه والدوه اعيونك

صحتلك وآنه انوح
دخيلك لا تروح
بعد حضنك اضيع
واعيش وي الجروح

شيخلي فراگك بويه بويه
ابگلب يشتاگك بويه بويه

وحگ اعيونك بويه بويه
اموت ابدونك بويه بويه

____

كل اسامي أهلي گلتها ليش بس اسمي
وانه جدامك احوم ابدمعتي وهمي
گلت نمشي وطاح حيلي ونذبح حلمي
ومادرت وجهك عليه ونحجه يتمي

عليلتكم وريد
الي تنمدلي ايد
وتگلي راح اروح
بعد عمري شيفيد

شيطفي ناري بويه بويه
واموت ابداري بويه بويه

وحگ اعيونك بويه بويه
اموت ابدونك بويه بويه
_____
جلمه ال بويه بدونك ألمن احجيهه
وانه بس لعيونك احجي وحرم طاريهه
راح يذبح شوفي دمعي وتعمه تاليهه
وبويه عين الماتشوفك يا نفع بيهه

الهجر مو للزغار
وجمر مو دمعي صار
وتگلي ضلي ليش
وأنه بضلوعي نار

اصد لخواتي بويه بويه
واجر حسراتي بويه بويه

وحگ اعيونك بويه بويه
اموت ابدونك بويه بويه