صباح الخير حُباً العلاقات الأسرية دي من أحب الأشياء عندي، | خواطِر،إقتباسات وقِصص🌷📖
صباح الخير حُباً
العلاقات الأسرية دي من أحب الأشياء عندي، بتكيف لما ألقى في تماسك بين الأطراف كلها، قدر شنو الأب شايل مسؤولية أولادو بحب، مصاحبهم لدرجة تفتكر إنهم أصحاب في كتير من الأوقات، مربيهم على القيم الإسلامية القويمة، ومفهمهم الدنيا صح، إنو حتقابلكم في الحياة صعوبات بتحتاجوا تصبروا فيها، وإنو السعي شرط أساسي علشان أنتوا توصلوا لأهدافكم، فمافي هدف بيتحقق وانتوا لسه ما اتحركتوا، أنكم قد تقعوا مليون مرة في طريقكم ليه بس دا ما بعني أنكم فاشلين لازم تتنفضوا من التراب وتقوموا بهمة أعلى، ماف حلم بتحقق وصاحبو واقف بمكانو، والدنيا ما طول الوقت حلوة حتحزنوا وتبكوا، وتنكسروا، بس أتعلموا عالجو نفسكم بنفسكم، أي قرار بتتخذوهوا أدرسوهوا كويس علشان بعدين ما تقولوا ياريت ما اتخذناهو، الحياة دي فيها السمح والشين، فيها الناس الكويسين والكعبين، فيها الصادقين والمنافقين، بتقابلوا مليون شخصية أعرفوا أختاروا ناسكم بدراية، وركزوا إنو تشوفوا البصلحكم وتبعدوا من البضركم...
نصايح الأم لبناتها أو صاحباتها بمنطلق تاني، إنو يا بناتي أنتوا زي القزاز لو اتكسرتوا ما حتنجبروا، فما كل زول قال ليكم كلام لطيف يستحقكم، اختاروا صاحباتكم البنصحوكم، البهرشوكم لما اشوفوا طريقكم اتعوج، ما تتبعوا الموضة لأنها كتير فيها حاجات بتغضب ربنا، ألتزموا بالستر فهو من شيم النساء، وانتوا ماشين في الشارع ما تضحكوا بصوت عالي، ما تردوا على كلام الناس أمشوا وانتوا هادئين، ما تخلوا لأي حد يلقى فجوة فيكم عشان يقلل من إحترامكم، الصاحبات فيهم الصالحة والطالحة، فاختاروا صاح، وبرضو أعرفوا إنو ما الرجال بس البيحق ليهم اشتغلوا ويحققوا أهدافهم، حتى انتوا، ما كل أهداف النساء الزواج والعلاقات دي، كمان من حقوقكم تتعلموا وتشتغلوا، كونوا على وعي وانتوا بتخطوا خطواتكم، سمعتكم دي أهم حاجة عندكم فحافظوا عليها، وأثبتوا لي إني ربيت صاح.
#في_نهاية_المطاف:
"تبقى الأسرة هي الأفضل، الأهم، والأكثر حُباً، فلا شاب الأهل ولا شابت نصايحهم"
