2022-09-25 20:27:32
في حاجة مهمة شديد خليها في بالك !
طول ما أنت قاعد في حتة ما بتناسبك صدقني ما حتكون مُرتاح !
حتى لو فضلت تفتش على الراحة عمرك كلو !
من الأساسيات الأولى عشان تحِس إنك مرتاح ومُطّمِن إنك تسيب أي حاجة بتسبب ليك وجع !
-الحتة الحاسي إنك ما مرتاح فيها طوالي تسيبها وتمشي لغيرها.
-الإنسان الإنت في وجودو دايماً تعبان ومدبرس وزهجان ومتنكد طوالي تخليهو وتمشي تشوف زول غيرو الدنيا مليانة بي ناس صحيين نفسياً !
-المجاملة ع حساب نفسك بتخصم منك شديد وبتخليك توهِب كل العندك من غير ما تلقى مردود يرجع ليك.
قبل فترة أنا كنت داخلة في مود بتاع إكتئاب كدا ما عادي والسبب إنو كان عندي في حياتي إنسان توكسك شديد وجودو جنبي دايماً مُخليني متنرفزه .. زهجانة .. وما طايقة حتى روحي !
في يوم قعدت مع روحي وبقيت بسأل في نفسي !
أنا مستفيدة شنو هسي من وجود الكائن دا في حياتي؟
ما لقيت أي إجابة مقنعة..
غير إني إكتشفت إني جايبة لروحي الهم والغم والقرف بي يدي !
الخطوة العملتها والمهمه شديد والمن بعدها إتفتحت في وشي أبواب السعادة !
إني قدرت أطلع الإنسان دا من حياتي وقدرت أعاين لروحي وأهتم بيها وعرفت ناس كويسين خلوني أعرف إني قبل كدا كنت ظالمة نفسي شديد مع الناس الغلط.
ففكرة إنك تعصر ع نفسك عشان تقعد في حتة هي ما شبهك الحاجة دي بتستنفذ مشاعرك وبتستهلك من طاقة ما عادية !
الواحد مننا عامل زي البالون !
بيقعد يضغط ع روحو ويستحمل في حاجات هو ما قدرها لحدي ما يجي يوم ويلقى روحو إنفجر بي سبب الضغوطات دي !
أمي دايماً بتقول لي:
يا عبير يا بتي !
(( الدرب البجيك ليك الشقاء إتفاديهو عشان ما تشقي. ))
فبقيت ماشة بالمبدأ دا والحمدلله قدرت إتجاوز عقبات كتيرة في حياتي.
وانتو كمان أعملوا بي مقولة أمي دي وحتشوفوا الفرق !
#على_عتبة_النهاية
الدنيا مليانة بي ناس حلوة شديد !
فتش على الناس البتحس إنهم بيشبهوك في القلب قبل الأفعال !
ما تجامل على حساب روحك عشان تكسب غيرك لأنو بعدين غيرك دا حيخليك تكتشف إنك خسرت روحك وإستنذفت طاقتك عشانو !
والدنيا قصيرة شديد كل لحظة من عمرك إستثمرها في السعادة عشان تسّعـد .))
#عبير_ابراهيم.
875 views17:27
خ
