متتعلقش بحلم لدرجه إنه لو موصلتش تموت _ ربنا يبارك فـ عمركم_) | انت تستطيع _ 𝒚𝒐𝒖 𝒄𝒂𝒏.
متتعلقش بحلم لدرجه إنه لو موصلتش تموت _ ربنا يبارك فـ عمركم_)
اعرفوا إن كل حاجه ربنا بيقدرها لينا هيا الخير، وأى حد بيجتهد ويسعى بيلاقي نتيجه سعيه وده أكيد، سواء في الدنيا في الحلم اللى عايزه او في حاجه أفضل بكتير من اللي بيتمناها، أو بياخد أجرها في الآخره.
كل شويه حد يسألنى... هوصل؟!
ردي بيكون ( إن كان خير سيقدره الله، او ان شاء الله هتوصل، ربنا يحققلك حلمك)..
أنا مش قصدي من كلامي ده إنك تحبط بالعكس أنا بوعيك للصح..لأن في ناس مش قادره تتخيل إن ممكن ربنا يقدر ليها مكان أحسن بكتير،وحصلت مع ناس قبلينا
عارفه ان قصدكم من السؤال تطمنوا،بس دي حاجه في علم الغيب، وربنا وحده العالم بالمناسب ليك..
تالته ثانوي دي عباره عن اختبار، لقدره تحملك، صبرك، سعيك واجتهادك، استمرارك رغم الصعوبات اللى بتواجهها، يقينك بربنا وثقتك فيه، معرفتك إنك توازن بين الدين والدنيا ويكون عندك مسؤليه، وهي أول خطوه، وبعدها هتلاقي نفسك إنسان واعي أكتر، ابتديت تفهم وجودك في الحياه، والخطوات الباقيه اللى هتبنى عليها حياتك وأهدافك العليا للآخره،وهيبقى عندك قصه كفاح وهتحكيها لغيرك وهتكون مكاني السنه الجايه بتقدم نصائح مفيده مبنيه على خبراتك وغيرك بيستفاد منك وهيا الحياه كده
فـ زود يقين في ربنا واتوكل عليه واسعى، ومتشلش هم النتيجه
