2021-09-27 18:28:21
إيه أنسب طريقة للمذاكرة؟!
نفسي أذاكر بس مش قادر!!
تعالَ بقا أقولك على شوية نصايح لو عملتها هتغير فكرتك عن المذاكرة وتذاكر بنفس مفتوحة
يالا بينا نبدأ
أولًا كدا الموضوع موضوع وقت، يعني إيه الكلام دا؟!
يعني لازم يكون عندي وقت وأبعد بقا عن السوشيال ميديا، أو لو بتخرج كتير نقلل خروجات، بتنام كتير تظبط نومك وهكذا
وبعدين تعمل جدول لليوم اللي هتذاكره، بمعنى إنك تجيب ورقة وقلم وتبدأ تكتب هذاكر النهاردة مادة كذا وكذا، والمادة دي هتستغرق كام ساعة وهكذا
خلصنا خلاص الجدول
تاني حاجة لازم تكون عارفها إن دماغك بتركز من ٢٥ إلى ٣٠ دقيقة وبعد كدا التركيز بيبدأ يقل، علشان كدا لازم بعد كل ٣٠ دقيقة تاخد ١٠ دقايق بريك علشان تستريح، واعتبرهم مكأفاة ليك يا سيدي
تالت حاجة بقا ذاكر في مكان بيساعدك على التركيز، وبلاش السرير الله يكرمك علشان أنت كدا هتنام مش هتذاكر
يعني حاول يكون عندك مكان مخصص للمذاكرة ويا سلام لو المكان دا هادي ومريح علشان تستمتع وأنت بتذاكر
رابع حاجة الجزء اللي تذاكره اشرحه لغيرك، دا هيساعدك بتثبيت المعلومة عندك أكتر، وكمان هتاخد حسنات أجر إنك وصلت معلومة لغيرك
خامس حاجة حاول تعمل خريطة ذهنية أو تعمل كلمة سر تقدر تربط بيها المعلومات ببعضها علشان متنساش
سادس حاجة والأخيرة عليك بالدعاء الدعاء دا سحر ادعي إن ربنا يفتح عليك، ييسرلك كل عسير، أو أي شيء يجي على بالك
يالا نرفع شعار "هنذاكر واحنا مبسوطين" ونكون خير أمة
#هنذاكر_صح
305 views15:28