الخدمه رزق گبل النطق بالعالم الذر والخلق يختارك حسين وياه ب | نشر قصائد حسينيه مع الاحان

الخدمه رزق گبل النطق
بالعالم الذر والخلق
يختارك حسين وياه
بس نيتك صفيها
*

راضعتك امــك هالعشگ من درها
وتراب هالدنيه فرق مـــــــن درها
اي وحگ من رد الشمس من درها

الخدمه شرف واكبر شرف
وحسين يوگف للوگف
يعبره السراط يجديه
وذنوبه هم يمحيها
***

الخادم ايام العـــــــــمر حاسبها
عاشور ودموع التــــهل حاسبها
والروح لوملت رجـــــع حاسبها

عنده المهم دمعه ولطم
ناذر حياته ومحتزم
جنها صلاته من يگوم
مخلص يجي يأديها
****


شما يزغر الخادم ابــــــــد موخله
وحسين كلمــــــــــن بالانه موخله
الانطه لحبيبه كلشي ابــــد ماخله

يريدك عدل لمن تزل
تستغفر الله وماتمل
ماتحمل وگلبك سمح
روحك تحب باريها
****

حسين كلمن يخـــــدمه يتعله
بماي الشفاعه بـــالحشر يتعله
بعله مذله مــــــــــــايمر يتعله

نجمت فلك عايش ملك
درب الخدامه من سلك
يتعله دنيه واخره
بصيت وفخر راعيها
*

اتعب عليها خدمتــــــــك راعيها
يوگف سند يوم المــــحن راعيها
لروحك يخادم خدمــــتك راعيها

هيه الصدگ روحك تطگ
مثل النفس من تختنگ
لوذبلت ورود الروح
الخدمه ترد تحيها
***

خاتم خدامه بــــــــــيمنته خاتمته
ومحلاها لومجلس تحـــل خاتمته
صگ الشفاعه بـــــــالحشر خاتمته

صگ منختم بضلع وخيم
والزهره تقره الاسم
شگد لاطم شگد مشاي
شگد دمعتك جاريها
*

ماانسه ابو اليمه ابـــــــــد يوملها
ومااتعب مــن الخدمه انه يوملها
لابــــــــــــد حياتي تنتهي يوملها

وسط الگبر حسين انتظر
باللحد يحضر والحشر
ولوجفت اذنوبي اثگلت
حسين الذي يساويها


علي مظلوم الجناحي
https://t.me/zaidHassan0