2022-08-02 00:22:16
نزلة .... في رثاء ام البنين عليها السلام
يابنيني الاربعه فدوه كلكم للحُسين
...................
ابـدي بيـك وانّت هيـبـتـهـم يعباس
مثل ابوك وبالشّـدايــد رفعـة الراس
لا تعوف حسين اخوك بعازت الناس
آنه غذّيتك شجاعه وغيره وحساس
اكتب عله المشرعه نفّذت يمّ البنين
...........................
وانت ياجـعـفـر اعرفك يبني وفّاي
بـالـك تـقـصّـر حبيبـي ونـور عيناي
صير عبد حسين يبني وفخـر بهاي
ومن تنصره بكربلائه تحضه برضاي
الخوّه بيك موزّعه. ضحّي لِبِن الطاهرين
............................
يبني ياعثمـان احشمك ياضوه العين
سيّـدك هــذا وامـامـك اخـدم حسين
افدي روحك دون روحه ونصر الدين
مثـل ابـوالاكبـر ييُمّه يـحـصـل منيـن
هذا ابن الشافعه. بضعة الهادي الأمين
...........................
وانت ياعبدالله اريدك ترخص دماك
للحُسين ابـن الزچيـــة هــذا مـولاك
انت ابن حيدر وريدك ترهـب عـداك
خـادم حسيـن وأخيّـه الله خــــــلّاك
هالشرف لتضيّعَه. انصر صحاب اليقين
.........................
آنـه امـكـم يابنينـي وامـري طيعــوه
حسين غالي وغـله منـكـم لا تعيفوه
ياشبـاب ارضـه علـيـكـم مـن تنصروه
بيضوا وجهي بهالوصيه راسي رفعوه
من تصير الواقعه صيروا ضد الظالمين
..........................
احنه عـد عينـاچ صاحوا يُمّه بشري
ابـنـچ العبـــاس آنـه وانتي اُمّــري
للحُسين افـدي دمــائـي وهذا نحري
عالشريعه چفوفي توگع دمي يجري
والچفوف مگطّعَه والسهم يطفيلي عين
سيد زيد الفحام
_______
3.6K viewsسيد زيد الفحام, 21:22