2022-07-23 23:28:45
#ابن_البدويه
سيف وبيد العباس يسلم منهم ياراس
حالف إلّا يوذّرهم بالسيف وما يعذرهم
ياحي راعي النوماس
.......
ابن البدويه المايهتم.
سل سيفه القاطع وتقدم _ والبي زود يلاگيـه
ركّب خيل عله الخيّاله
هزّ الطف بچفوفه وشاله _ عباس وعالوا بيـه
خاطر يرضي حسين عضيده
يقلع راس الفارس بيده _ يوگع ويدوس عليـه
هد للثار _ سيف ونار _ خطّاف الروس يسمونه
حي عباس _ رفعة راس _ يخرس اي فارس بعيونه
طب للحومه الفرّاس. يسلم منهم ياراس
حالف إلّا يوذّرهم بالسيف وما يعذرهم
ياحي راعي النوماس
.......
هد والرايه الخضره بچتفه
وخطّاف الارواح بچفّه._ وگامت تتطاير روس
ياويله اليوكف كدامه
عباس يكسّرها عظامه _ يردّه براسه المنكوس
ذلّ الفرسان وجندلهه
الكاع انترست بيهم كلهه._ وعباس عليها يدوس
الزلمه الزين _ يشرد وين _ يطلع عباس گباله
يموت وگوف _ منّ الخوف _ لو عباس اتعناله
بقالع خيبر ينقاس. يسلم منهم ياراس
حالف إلّا يوذّرهم بالسيف وما يعذرهم
ياحي راعي النوماس
.......
اشّر لحسين بصولاته
خاطر يتباها بضرباته _ تبسمله حسين وصاح
عفيه عضيدي الذلّ العسكر
راويهم شيخلّف حيدر _ بالطف قبّاض ارواح
تدلّل ناداه وعيونك
راح افنيهم ليّهمّونك _ نازل بيهم ذبّاح
صار زماط _ والصل شاط_ غيض وطشّرهم بيده
يذبح گام _ عشر زلام _ لعيون حسين عضيده
ملقّب موت الارجاس يسلم منهم ياراس
حالف إلّا يوذّرهم بالسيف وما يعذرهم
ياحي راعي النوماس
.......
طر الجيش وطبّ بزوده
لنهر الماي وشايل جِوِده _ وذبّحّهم عالجرفين
معاهد نفسه وصان الخوّه
الماي بچفه وما يتروّه _ ما يشرب گبل حسين
شال الجود ورد لخيامه
لحسين وطفله وايتامه _ يرويهم عطشانين
اسمع هاي _ رَد بالماي _ بس عباس السوّاها
ذل صفوف _ طر سيوف _ رد لطفاله وروّاها
طب خنّاگ الانفاس. يسلم منهم ياراس
حالف إلّا يوذّرهم بالسيف وما يعذرهم
ياحي راعي النوماس
.......
واعد اخته وشد مجهوده
جاب الماي وفّه وعوده _ وزينب صاحت حيّاك
گدها وبالشدات مجرّب
ياسبع الطف الما يتعب _ تسلم عاشت يمناك
ياعباس معدّل زلمه
نشمي وبوجودك مانضمه _ ما نتحيّر بحماك
من هالعين _ وتأمرين _ يازينب بس انخيني
طلبي الروح _ فدوه تروح _ لجدامج ياضي عيني
لو حد زينب ينداس. يسلم منهم ياراس
حالف إلّا يوذّرهم بالسيف وما يعذرهم
ياحي راعي النوماس
@zaidzai
سيد زيد الفحام
_________
6.9K viewsسيد زيد الفحام, edited 20:28