نصيحة للخدام / ليلة الخدمة ١٤٤٤ هـ احنه فلح عند الحسين ༄༄༄༄༄༄ | الشاعر زين العابدين الشمري
نصيحة للخدام / ليلة الخدمة ١٤٤٤ هـ
احنه فلح عند الحسين
༄༄༄༄༄༄༄༄༄༄
باجر تره كلنه ميتين فرصه العمر تخدمه الحين
لا تنجرف تنسه وتشين احنه فلح عند الحسين
هوه ملاج
༄༄༄༄༄༄༄༄༄༄༄༄༄༄༄༄༄༄༄༄
استغل فرصة حياتك والعمل بيدك
اخدم حسين وقضيته وربك يزيدك
اعله ساعة وتغفى عينك منهو اليفدك
من يجي ينور ضلامك؟ منهو اليريدك؟
ضلمه الكبر فوك الاعيون
وحدك تضل حاير شلون
من تسئل تلتفت وين
احنه فلح عند الحسين
هوه ملاج
༄༄༄༄༄༄༄༄༄༄༄༄༄༄༄༄༄༄༄༄
عوف دنية مغرياتك والله احسلك
امشي خلف الي يبجي والوكع لجلك
مايفيد البي معاصي ولي يضحكلك
ماينام بكبرك اصلا وصعبة يندلك
سبة وكت ينسى ويروح
كل الجره وعشرة الروح
وين الصدك صاحب الزين
احنه فلح عند الحسين
هوه ملاج
༄༄༄༄༄༄༄༄༄༄༄༄༄༄༄༄༄༄༄༄
صاحب الدرب الحقيقي ضحه لسنينك
واليرجع نفس ريتك والضوه لعينك
وبين ألالف المكابر دورك وينك
دمعة لو باجي بحياتك يحضر يعينك
يمك يجي بعد الافراك
لليخدمه قلبه مشتاگ
ثق واعتقد يوفي الاسنين
احنه فلح عند الحسين
هوه ملاج
༄༄༄༄༄༄༄༄༄༄༄༄༄༄༄༄༄༄༄༄
غيره ما عندك وسيله ولا عمل نافع
وابد لتگلي صلاتي وساجد وراكع
لا تباوع فوگ تنسه وبالذنب واكع
امشي وي خط الحسين وجوه بس باوع
زلة رجل ولنك ابعيد
لمحة بصر تتبع ايزيد
هوه فقط خله بالعين
احنه فلح عند الحسين
هوه ملاج
༄༄༄༄༄༄༄༄༄༄༄༄༄༄༄༄༄༄༄༄
لا تزيد من سهامه بكثرة اذنوبك
الخطوة من تخطيها احسب يرضه محبوبك
خلي أبو الاكبر بعينك واعدل اسلوبك
وهذب الروح بطفوفه واصقل اعيوبك
هوه المثل هوه الاخلاق
باجر اذا لفت الساق
خله الك مرجع ودين
احنه فلح عند الحسين
هوه ملاج
༄༄༄༄༄༄༄༄༄༄༄༄༄༄༄༄༄༄༄༄
اخدم اسم حسين لجله مو لاجل اسمك
قدوتك خله بحياتك هوه الي يعلمك
لو تعرفه شگد حنين يألمه الي يألمك
انطه دمه حتى يحفظ روحك ودمك
لجلك تره ضحة بالروح
نحرك سلم نحره مذبوح
نحر وضهر ضحه بثنين
احنه فلح عند الحسين
هوه ملاج
༄༄༄༄༄༄༄༄༄༄༄༄༄༄༄༄༄༄༄༄
كلشي يخلص حتى عمرك والزمن گاضي
لو رضه حسين انته احسب الله هم راضي
بدفتره اسمك لو تسجل ينمحي الماضي
المحامي بالقيامة حسين والقاضي
ثق تنمحي كل الاذنوب
لو تتقي وقلبك يتوب
ذكر النفس بينك وبين
احنه فلح عند الحسين
هوه ملاج
༄༄༄༄༄༄༄༄༄༄༄༄༄༄༄༄༄༄༄༄
الخادم
زين العابدين الشمري
