2021-08-23 19:38:04
كلية نظم معلومات الأعمال BIS
بما إن كله بيسألني عن كُليتي وبقت البريمو السنادي ف أنا مش هعرف أرد على واحد واحد ف هقولكم هنا شوية معلومات عنها هي مفيش معلومات كاملة عنها جوجل ولا يوتيوب لذلك أنا حاولت أجمع شوية معلومات عنها من ناس بالفعل اتخرجت واشتغلت
كلية bis أو business information system
عبارة عن ايه؟
عبارة عن ميكس كليتين مع بعض بيزنس وحاسبات ومعلومات
نظام الدراسة فيها ساعات معتمدة بندرس ١٤٤ ساعة ٧٢ ساعة مواد حاسبات و٧٢ ساعة مواد بيزنس
هل بندرس فيها كل مواد بيزنس ؟
الإجابة: لأ
هل بندرس كل مواد حاسبات؟
الإجابة: لأ برضو
احنا بندرس اللي بيفيدنا ف مجالنا بس
طب ايه بقى مجالنا
هل ف الآخر بنتخصص ف حاجة واحدة؟
-لأ الميزة ف الكلية انها مرنة بمعنى اننا مش بنتخصص ف شي معين، خريج bis متاح له يشتغل ف كل التخصصات وف الشئ اللي هو حابه وطور نفسه فيه
ازاي؟
-يعني مثلا انت اتخرجت خلاص خلال دراستك ف الجامعة حبيت شغل البرمجيات أكتر وطورت نفسك فيها بتشتغل ف شركات برمجة
حبيت شغل المحاسبة بتشتغل ف البنوك
حبيت شغل إدراة الأعمال بتشتغل ف شركات
طب شغلك ف البنوك بيكون عبارة عن ايه برضو على حسب الشئ اللي انت قدمت فيه بتتقبل بس الشغل الأساسي إنك بشتغل ك مبرمج ومحاسب ف نفس الوقت يعني بتعمل شغل الاتنين انت اللي بتصمم البرنامج وتمليه بالبيانات يعني شغل الاتنين انت هتعمله لوحدك!
طب معلش ايه هي المجالات دي؟
1-انشاء قواعد البيانات المتخصصه
2-انشاء وتصميم وبرمجة المواقع الالكترونية
3-التجارة و التسويق الالكتروني
4-إنشاء وتحليل وتصميم النظم الادارية بمختلف انشطتها ومجالاتها
5-شركات البرمجيات وتكنولوجيا المعلومات المختلفة
6-هيكلة وتصميم شبكات المعلومات لمنظمات الأعمال
7-المحاسبة الالكترونية المتخصصة
8-قطاع نظم المعلومات فى البنوك وشركات التأمين وغيرها من قطاعات الأعمال
ده بشكل عام ودول بما يحويهم يعني ايه
بشكل خاص ف انت ممكن تشتغل مهندس بيانات أو محلل بيانات أو تصميم برامج وتطبيقات أو محاسب أو مطور قواعد بيانات أو مطور تطبيقات ويب أو مهندس برمجيات أو مهندس دعم أو محلل أمني أو مهندس أمن شبكات أو مختبر اختراق نظم أو أخصائي أمن معلومات تقني أو حاجات تانية كتير زي ما قولنا على حسب بتطور نفسك ف المجال اللي انت حابة
طيب هل الدراسة ف الكلية كافية إني لما أتخرج أشتغل على طول؟
-أكيد لأ ،احنا ف الكلية بناخد أساسيات بس وانت وشطارتك بال self study تكمل وتطور من نفسك
آينعم محتاجة شغل جامد على نفسك بس الكلية عظيمة جداً ف مجالاتها حتى لو لسه مش اتعرفت أوي لإنها لسه جديدة ومش موجودة غير ف أربع أماكن ف مصر ده غير إن الشركات والبنوك سواء جوه مصر او برا بتطلب خريج bis بالاسم
موجودة فين ؟
-موجودة في حلوان وطنطا وقناة السويس وأسيوط
شروط القبول؟
-بتختلف من جامعة ل جامعة
بس السنين اللي فاتت كانت بتاخد من ٩٢% ودرجتك ف الانجلش تكون ٤٥ فيما فوق ف جامعة قناة السويس ومن ٤٠ فيما فوق ف الزمالك وطنطا
المصاريف كام؟
بتختلف برضو من جامعة لجامعة بس ف رينج من ١٨ ألف ل ٢٤ ألف طبعا ده على حسب السنين اللي فاتت، السنة دي لسه منزلوش الشروط ولا المصاريف
بتقدم ازاي؟
-لو جالك ف التنسيق أي كلية وانت عايز تروح bis بتعمل تحويل ورقي عادي وتروح تقدم ف الأماكن اللي الكلية فيها يعني مش لازم تكون ف نفس المحافظة
أو بتختار تجارة ف أى محافظة وبعد كده بتعمل تحويل ورقي ليها عادي جدا ف المكان الأقرب والأنسب ليك
طبعاً مش عايزة أدخل ف تفاصيل قد ايه بيعاملونا إننا مش ناس عادية وقسم مميز والمبنى نضيف جدا جدا وزي الكليات الخاص بالظبط بالرغم إننا حكومي عادي واهتمام جدا ودكاترة من كلية حاسبات وبيزنس ومن الآخر كده أى حد تشوفه رايق وشكله ابن ناس كده ف إعرف ع طول إنه ف bis
عايزة أقول إن أول ما دخلتها كله فضل يقولي يعني ايه بجا هيهيهيهي ده لإنها مكنتش معروفة نهائي وفعلا أنا مكنتش أعرفها قبل كده بس الحمدلله كل سنة بتتعرف أكتر وأكتر وقيمتها بتظهر أكتر وبس كده سيبك من أى حد يحبطك ويقولك لا محصلين تجارة ولا حاسبات لإن الكلام ده غلط وزمايلنا وصحابنا اللي اتخرجوا عرفونا الوضع والنظام بيكون ايه واشتغلوا فين وكل ده ف متركزش مع كلام الناس السلبية
#منقول
201 viewsG T, 16:38