2022-11-17 00:33:40
پێنج ساڵ خزمەت ئەمە پاداشتەکەی بوو!؟
لەڕۆژێکی وەک ئەمڕۆدا و لە 17.11.2017 دەزگای میدیای نوسەرنیوزم دامەزراند و لەسۆشیال میدیا (فەیسبووک) چالاکانە دەستمان بەکاری ڕۆژنامەوانی پیشەیانەی خۆمان کرد و چەندین بابەتی گرنگ و ڕاپۆرت و دۆکیۆمێنتاریمان لەسەر چەندین کەیسی گرنگ بڵاوکردەوە ھەتا 24.10.2019، کە بەھۆی ڕاپۆرتی دۆسییەی نھێنی کە چەندین دەنگی لاھور جەنگی بەرپرسی دەزگای زانیاری یەکێتیمان بڵاوکردەوە، ھەم خودی خۆم کەوتمە ناو مەترسی مەرگ و تیرۆری فیزیکی و کەسایەتییەوە، ھەم پێگەکانی نوسەر و خۆشم ھاککران و لەدژی خۆمان بەکارھێنرانەوە بەئێستاشەوە.
پاشان لە 11.03.2020 لەڕێگەی تیلیگرام و بەبێ بەکارھێنانی سۆشیال میدیاکانی دیکە (فەیسبووک) دووبارە لەدەرەوەی کوردستان دەستمان پێ کردەوە ھەتا ئەمڕۆ 17.11.2022 بەردەوام بووین، واتە دوو ساڵ لەکوردستان و سێ ساڵ لەدەرەوەی کوردستان بەردەوام بووین لەکاری ڕۆژنامەوانی پیشەیانە و بێ لایەنانەی خۆمان.
ھەر لەمڕۆشدا بەھەموو لایەکی ڕادەگەیەنم بەیەکجاری واز لەکاری ڕۆژنامەوانی دەھێنم و چیتر وەک ڕۆژنامەنووسێک نام بینەوە.
ھۆکارەکانم بۆ وازھێنانم زۆرن لەگرنگترینیان نەبوونی کات و زۆربوونی ئەرکەکانی ڕۆژانەی خۆمە.
بێ باکی خەڵک لەئاست ماندووبوونمان و بوختان و درۆ و ناوزڕاندنی خەڵکە بەکەسایەتی و ڕەوشت بەرزی ئێمە، کە ئەو خەڵکە دانە و دوان نین و ئێستا زۆرینەی کۆمەڵگەن.
ھەرجابۆیە لەبەر ئەم ھۆکارانە پێش چوار مانگ ھۆشداریم لەبارەی وازھێنانم لەم ڕۆژەدا چەنجارێک دابوو و ڕاگەیاندبوو، ھەربۆیە لەمڕۆدا کۆتایی پێ دەھێنین و گەردنی ھیچ کەسێک لەسەر بچووکترین گومانی خراپ بەکەسایەتی و ڕەوشتی ئێمە ئازانەبێت و ئەوە با ھەقێک بێت لەو دنیا لەگەردنی ئەو کەسانە.
لەگرنگرترین ئەو کەیسانەش کارم لەسەرکردوون.
کەیسی سەرۆک جاش و ئەنفالچییەکانی ناو پارتی و یەکێتی.
کەیسی دۆسیەی نھێنی و پڕۆژەی تیرۆری کەسایەتی زانیاری و پاراستن.
کەیسی تاوانەکانی مەلا مستەفا و کۆمەڵکوژییەکانی.
کەیسی خنکاندنی زیندانی لەزیندانەکانی پارتی.
کەیسی سکانداڵەکانی لاھور جەنگی بورھان.
کەیسی ڕفاندنی منداڵانی کورد لەلایەن پەکەکە و تاوانەکانی.
ئەوانە لەگرنگترین ئەو کەیسانە بوون کە کارم لەسەر کردوون، لەگەڵ دەیان ڕاپۆرتی جۆراوجۆری ھەستیار و گرنگ کە زۆرێکتان دیوتانن.
ئەتوانم بڵێم ئەو کەیسانەی من باسم کردوون پێشتر باسنەکراون و لەئێستا و داھاتووشدا بەئەستەم باس دەکرێت، مەگەر کەسێک ژیانی خۆی بکاتە قوربانی و خوداش پشت و پەنای بێت ئەگینا ئەستەمە لەنێو کوردا زانکۆ بورھانێکی دیکە دروست ببێتەوە، کە بێ لایەن و سەربەخۆ و ڕاستگۆ و خۆنەویست بێت و بەدۆکیۆمێنت و بەڵگەوە کار لەسەر ڕووداو و بابەتە ھەستیارەکان بکات.
ئەتوانم ئاشکرای بکەم جگە لەکاری ڕۆژنامەوانی بەپشت بەستن بەزانیارییە ھەواڵگرییە دزە پێکراوەکان بەتایبەت ئێران- گیانی نزیک بە (٧٠) پێشمەرگە و کادر و سەرکردەی حیزبەکانی ڕۆژھەڵاتم لەپیلانی تیرۆر و تەقینەوە و کۆمەڵکوژی ئاگادارکردۆتەوە و ڕزگارکردووە، کە ئێستا ڕای دەگەیەنم، بەڵام لەبەرامبەردا و لەپاداشتی ئەو کارەمدا لەکۆتایدا بەتیرۆری کەسایەتییم و پیاوی ئیتلاعات وەڵامم دراوەتەوە!
ئەمانەم بەبەڵگە و تۆماری دەنگی لایە ئەگەر بێت و بڵێن وانییە، وەڵامی جەرگ بڕمان دەبێت بۆیان.
دڵخۆش و شادمانم ھیچ کاتێک نەبەھەڕەشە، نەبەپارە و تەڵەی ئافرەتی موخابەراتی تێنەکەوتین و سەرکەوتین.
لەپشت ئەو ئازایەتی و غیرەت و عیزەتەوەی ئێمەوە تەنیا خودایەک و ئیمانێکی بەھێز ھەبوو، کە خەڵکانێکی نەفام لەوە تێنەدەگەیشتن و ئێمەیان ھەرجارە و بەپیاوی دەزگایەکی ھەواڵگری بێ ڕەوشت دەدا لەبێژنی ئاوەزی خاڵییان، ئیتر نەیاندەزانی ئەوە ھێزی ئیمانە و لەھەر مرۆڤێکدا ھەبێت خودا بەسەر دژ و دووژمنەکانییدا سەریدەخات و دەیپارێزێت ھەتا ئەوکاتەی ویستی لەسەر بێت. ئەو دەروون نەخۆش و فەقیرعەقڵانەی کۆمەڵگا ھەرجارە و بەزانیاری و پاراستن و میت و ئیتلاعات و مۆساد و سی ئای ئەی و داعش پێناسەی ئێمەیان دەکرد، دەبێ ئێستا بەوازھێنانی من چی قانجازێک بکەن!؟
چەن بارە پێتان ڕادەگەیەنمەوە ھیچ پەیج و ئەکاونتێکم لەفەیسبووک و تۆڕەکۆمەڵایەتییەکان نییە و نابێت، ئەوەشی ھەیە بەناوی منەوە دانراون پەیج و ئەکاونتی موخابەراتین(پاراستن-زانیاری).
لەکۆتایدا زۆر سوپاس بۆ سەرچاوەکانی زانیارییەکانم، بۆ ئەو کەسانەی پشتگیر و پشتیوانم بوون، سوپاس بۆ نزای دایکی منداڵە ڕفێنراوەکان، بۆ ئازیز و خۆشەویستمانم.
خواتان لەگەڵ بۆ ھەمیشە.
(إِنَّ ٱللَّهَ لَا يَهْدِى ٱلْقَوْمَ ٱلظَّٰلِمِينَ)
————————————
بەڵێ دیارە لەناو قەومی بەصیتا قەدری سەنعاتكار
وەكو عەكسی قەمەر وایە لەناو حەوزێكی لیخندا.
#گۆران
زانکۆ بورھان
17.11.2022
Telegram @zankoburhan
4.4K viewsedited 21:33
ز
