2022-05-23 21:18:47
امراض القلب والشرايين التاجيةمن اهم المواضيع الي ممكن نحجي عنها بالقناة لكثرتها للأسف ، بحسب بيانات منشورة على موقع
worldlifeexpectancy فامراض القلب والشرايين التاجية تشكل نسبة (19%) تقريباً من نسبة الوفيات بالعراق وهاي النسبة كانت وفق بيانات منشورة لسنة 2018
هيج حالات ممكن تصادفنا بحياتنا اليومية ،سواءً بالبيت ،بگعداتنا، بالجامعة ،اماكن عامة والخ.. وبالتالي ممكن نفقد اهلنا واقاربنا واحبابنا اذا جان تصرفنا خاطئ او متأخر
فشلون ممكن نتعامل ويا هيج حالات ؟
النقطة الاولى:- حتى نعرف شلون نتعامل ويا الحالة هاي لازم نعرف شنو هي بالضبط، فببساطة راح تشوف المريض على غفلة عنده ألم شديد راح يكون بمنطقة الصدر وممكن يكلك المريض دااحس بسچاچين بصدري،ثقل كبير بصدري ،يحس كأنو روحه دتطلع والخ من وصف المريض للألم.. وممكن يمتد الالم لكتف المريض وايده اليسرى،رقبته ،ظهره،فك المريض
ومحفز الالم هذا ممكن يكون : توتر ،جهد ،اكل
النقطة الثانية:- ممكن يصاحب النوبة القلبية الآتي: ضيق بالنفس ،تعرق، تقيئ ،غثيان
النقطة الثالثة:- الناس الي ممكن يكونون مُعرضين بشكل أكبر للنوبات القلبية: مرضى السكري، ضغط الدم،ارتفاع نسبة الدهون في الدم ،زيادة الوزن والسمنة ،واكيد المُدخنين
وعلى فكرة ،مو بس الكبار بالعمر تصير وياهم ،اذا كنت شاب أيضاً ممكن تتعرض لنوبة قلبية وهواي شباب فارقوا الحياة بسبب نوبة قلبية
اخيراً:- التعامل مع الحالة: استخدام حبوب Nitrate تحت اللسان (متوفرة بالصيدليات وممكن تخليها يمك بالبيت لهيج حالات طارئة، بس انتبه لتاريخ انتهاء الصلاحية غالباً يكون قريب وبعد متشتغل فلازم تبقى تچيك تاريخ الانتهاء وتذب المنتهية الصلاحية وتجيب جديدة)
استخدام حبوب الأسبرين (اذا مجان عند المريض حساسية من الاسبرين) وممكن المريض يمضغها بهيج حالات اذا ميكدر يبلعها
اسند ظهر المريض على الحائط وخلي رجليه تكون مثنية مثل رقم (٨)
اذا المريض فاقد للوعي خلي أحد الموجودين وياك يتصل بالاسعاف وبهل اثناء سوي الاسعاف القلبي الرئوي CPR للمريض لحين وصول الاسعاف (اضغط هنا للرجوع الى منشور كيفية عمل الانعاش القلبي الرئوي)
نقطة مهمة جداً: اذا استمر ألم الصدر بعد اخذ حبوب الNitrate والأسبرين لمدة تتجاوز 10-15 دقيقة فهذا المريض ممكن صار عنده Myocardial Infarction (إحتشاء عضلة القلب) فلازم هل مريض باقصى سرعة يصل المستشفى ويتعاملون ويا الأطباء بالاجراءات المناسبة
حتى لو استقرت حالة المريض بغضون دقائق بعد تعاملك ويا الحالة بالنقاط المذكورة أعلاه فتبقى الاستشارة الطبية بعد إنتهاء النوبة من الطبيب المختص ضرورية جداً سواءً بالمستشفيات او بالعيادات الخاصة
يبقى تساؤل اخير : هل من الممكن ان تكون النوبات القلبية دائماً بسبب مخاطر المعروفة انو الها علاقة بارتفاع نسبة الدهون بالدم والخ..؟
الجواب:- لا، اكو نوع من الجلطات ممكن تكون مُصاب بيه اسمه (Prinzmetal angina) الي يصير بهذا النوع انو العضلات داخل شرايين القلب راح يصير بيه تقلصات وهي الي راح تسببلك النوبة القلبية واسبابها مالها علاقة بارتفاع دهون الدم والسكري والخ.. وممكن نتطرق لاسبابها بوقت لاحق
نتمنى الصحة والسلامة للجميع
By: Pro ibrahim
50 views18:18