إستشارة طبية

2023-06-16 00:23:06 20 شغله غريبه تصير اول ايام الرضاعه الطبيعيه !
1. بعض الالم ويه اول رضعات و اول ايام بعد الولاده
ألم الحلمه و تشققها من الامور اللي تحدث و تحدث كثيرا اول ايام الرضاعه الطبيعيه و مع الأسف الكثير من الأمهات يتركون الرضاعه الطبيعيه بسبب هذا الالم
الخلل يصير لعده أسباب منها سوء الالتقام و لان الطفل ما يعرف يرضع و الام ما تعرف كيف ترضع و بالأخص الطفل الاول
كل اللي عليك تشوفين فيديوهات الرضاعه الطبيعيه و تتعلمين من اليوتيوب شون تتم العمليه
اعرف راح تكولين هي سهله شيرادلها بس صدكيني هي صعبه
و اكو اختصاص كامل اسمه مدرب الرضاعه الطبيعيه
حضرت بيه ندوات و دورات مكثفه بيه
2. طفلك راح يرضع هوايه بأول ايام بعد الولاده
بحيث تحسين بالتعب هلكد يرضع
و اكيد راح تسمعين تعليقات مثل هذا جوعان انطيه مميه
بس هو بالحقيقه هو دا يكبر بسرعه لذلك يحتاج حليب اكثر
الموضوع راح يخف تدريجيا بعد اول اسبوعين
3. راح تحسين ببعض التقلصات الرحميه و انت ترضعين طبيعي
الهرمون اللي يخلي الحليب يتدفق هو نفسه الهرمون اللي يخلي الرحم يتقلص !
4. بعض الحليب راح ينزل من تلقاء نفسه بمجرد تفكيرك بأن طفلك جوعان او تسمعين بكاءه حتى لو انت ما ترضعيه
5. انت تحرقين 500 كالوري يوميا و انت ترضعين طبيعي
لذلك راح تجوعين و تحتاجين اكل
و اذا وزنك زايد
بريجيم بسيط تنزلين الوزن
بس مو هسه وكت الريجيم حبابه
خل نوصل للسنه و سوي ريجيم
6. راح تبقين تتشهين بعض الاكلات
هذا شي طبيعي
و حاولي تكون الخيارات صحيه
7. اول ما طفلك يبدي يرضع راح تحسين بعطش شديد مفاجيء و كأنما كنت بالصحراء لذلك خلي كوب الماء ملازم الك
8. الدوره الشهريه لن تكون منتظمه
بس هذا ما معناه ابدا انه ما راح يصير حمل
فاخذي سبيل الوقايه لان يا عيني نريدك ترضعين الصغير سنه وراها عود خل يصير حمل بلا ما تدرين
9. الرضاعه الطبيعيه سوف تجعلك تشعرين بالنعاس
و السبب هرمون البرولاكتين اللي يحفز إنتاج الحليب ينعس
10. اذا امتنع طفلك عن الرضاعه راح تحسين بألم شديد مع احساس ان الثدي كالحجاره و تحسين براحه تامه من طفلك يرضع
هذا شي طبيعي
11. من ترضعين من جهه ممكن الحليب ينزل من الجهه الاخرى
12. أحيانا و بالحقيقه نادرا بعض الأمهات يصير عدهم بعض الالم من ينزل الحليب
المزعج بالموضوع ان هذا الالم سيستمر لحين الفطام
13. مع تقادم الرضاعه الطبيعيه و خبرتك راح تعرفين اي جهه بيها حليب اكثر
14. ممكن راح تحبين الرضاعه الطبيعيه و تستمرين بيها لغايه ما يصير عمر الطفل 3 سنوات و اكثر
15. بعض الاطفال مو بس يرضعون لان جوعانين
بس يرضعون لان يردون يحسون بالراحه او لان عدهم مغص
16. الكثير من الاطفال ينامون و هم يرضعون طبيعي
و هو شي طبيعي و ما يقلق
17. الاطفال اللي يرضعون طبيعي يجوعون اكثر و يردون رضاعه بين فترات قريبه
18. خروج الاطفال اللي يرضعون طبيعي متكرر اول ايام بعد الولاده و يوصل أحيانا إلى 12 مره باليوم بأول اسبوعين و بعدين يبدي يقل
19. و لان الخروج متكرر فراح يصير عند الطفل طفح حفاظات فاختاري نوعيه حفاظات جيده و اختاري مرهم ويه كل تغيير حفاظ
20. اخيرا ماكو احسن من حليبك و لا يتقارن بيه اي حليب طبيعي و لا يشبهه و لا يتقرب منه
لان ماكو حليب بيه خلايا حيه تدافع عن طفلك بكل حليب العلب
د. سيف سمير البياتي اخصائي طب الاطفال باز کردن / نظر دهید

2023-06-12 20:05:11 تعليم الطفل على تنويم نفسه بنفسه
اللي يسمى
#self_soothe
اسهل طريقة و افضل طريقه هي التاخر بالاستجابه للطفل اول ما يكعد من النوم
يعني اعوفه يبجي ؟
لا طبعا مو هيجي الموضوع
ممكن اول اشهر من الواقعي و من المنطقي انه تستجيب للطفل اول ما يصدر صوت او يبجي
بس بعد مرور الاشهر الاولى راح تعرفين و تتعلمين انه مو اول ما يصدر صوت او يبجي تروحيله و تكعديه و تزعجيه
تعلمي اولا انه تراقبين
ممكن مجرد صحوه بسيطه و راح يرجع ينام وراها
اذا تكدرين تعلمي كيف تستجيبين للطفل بالصوت يعني تجاوبيه و تسويله اششش
او مجرد طبطبه
و نجي للمزيد من الطرق :
١. استخدمي اللعبات و اللعابات اللي قريبه من طفلك
دائما خلي لعبه او ٢ قريبه من طفلك اول ما يبدي يريدك او يصحى من النوم او يبدي يبجي راسا انطيه اللعابه حتى يفرح بيها و ينساك
٢. ابدا لا تركضين من اول صوت من ينام
راقبي من بعيد
انطيه فرصه يرجع نفسه للنوم
٣. انت متعوده طفلك ينام بين ذراعك و تردين تعلميه ينام وحده
هذة الموضوع صعب شويه
خليه بفراشه المتحرك يوميه شويه قبل وكت النومه و هزيه بفراشه
كل كم يوم دقيقه
لما يتعلم ينام وحده
٤. اللعبه او البطانيه
اللي اسمها ال lovey
و منزل بوست عنها كامل و عن اختيارها
#lovey
احسن طريقه تخلي طفلك ينام مرتاح
٥. لا تلتزمين بالكماط
هوايه من الامهات تكمط بعد شهرين
بس هو علميا و عمليا ماكو اي داعي للكماط بعد شهرين
الكماط يمنع الطفل يخلي ايده بحلكه و بالتالي يتعلم على النوم لوحده

اكو طرق أخرى تخلي الطفل ينوم نفسه بنفسه بس اكثرها شيوعا هي
مص الاصبع
الملهيه
يمسك الطفل بايديه الاثنين و يخليهم على بطنه
⚘فرك العينين
حضن البطانيه او الشرشف او الفراش
يناغي مع نفسه او مجرد يصدر اصوات مثل هممممم
يفرك شعره
ياخذ لعبه صغيره و يخليها بين ايديه
.
.
شوكت يبدي يتعلم الطفل على تنويم نفسه بنفسه ؟
ماكو عمر معين ابدا
بس اكيد يفضل باول ٦ اشهر من العمر
قسم من الاهل يكولون علمنا ينام نفسه بنفسه من ٤ اشهر
قسم اخر فشلوا الى عمر ٩ اشهر
لذلك ماكو عمر معين
.
.
شنو فوائد انه الطفل يتعلم ينوم نفسه بنفسه ؟
١. راح يمر بالمرحله العميقه للنوم مبكرا و بالتالي راح يطول بالنوم اكثر
٢. هذا جزء من التطور الطبيعي لازم تحرص على تكوينه حاله حال المشي و الجلوس و غيرها
٣. الدراسات تكول انه ذوله الاطفال من يكبرون يكونون اهدء و عرضه بشكل اقل لنوبات المزاج
٤. كلما طفلك اهدا
كلما انت اهدا
و بالتالي تربيه اسهل
د. سيف سمير البياتي اخصائي طب الاطفال باز کردن / نظر دهید

2023-06-09 20:13:20 كل الاسئله اللي تخص طعام الاطفال جوابها بهذا البوست تقريبا
شوكت ابدي اوكل ٤ اشهر لو ٦ اشهر ؟
منظمه الصحه العالميه تكول ٦ اشهر
بس غير منظمات تكول علامات الاستعداد للاكل يكون من عمر ٤ الى ٦ اشهر
بحوث جديده قديمه تسمي فتره من ٤ الى ٦ اشهر فتره ال
Window period
اي فتره الشباك
لذلك من نوكل بيها يقل التحسس الغذائي !
لذلك انت حره باختيار الوقت
شرط أن الطفل عبر حاجز الاربعه اشهر
و بدا مستعدا
قررت ابدي اوكل شنو اسوي؟
اكو شروط معينه؟
طبعا
1. طفلك ضاعف وزن الولاده
2. طفلك عبر عمره ١٢٠ يوم
3. طفلك مسيطر على راسه
4. من تضعين طفلك على بطنه يرفع راسه و اعلى صدره
5. يستمتع بالنظر للطعام و ما يرفض الملعقه تروح لفمه
شنو اول وكله انطيها؟
براحتك بس اني افضل الرز و تسويه كمحلول مو مي الرز و انما الرز و كانما محلول بسيط
ليش مو سيريلاك؟
نريد نبدي صح و ما نعوده على طعم حلو السريلاك ناجله قدر الامكان
شون ابدي و الكميه ؟
ابدي بكميه صغيره مثل ملعقة طعام او نصفها و رضعيه قبلها و كملي وراها رضاعه
شنو رايك اخليها بالمميه؟
لعد شسوينا؟
الغرض من اكل الطفل هو تعليمه على الاستقلاليه حتى نغادر المميه مبكرا بعمر السنة او قبلها
المميه للحليب فقط
حتى ماء ممنوع ننطي بيها
على شنو اكمل بعدين ؟
يعني خلص الرز شنو ادخل الان؟
براحتك عادي وجبه اثنين من اختيارك
موز تفاح شوفان براحتك
زين انطيني جدول ؟
ماكو شي اسمه جدول انت ابدعي و نوعي قدر الامكان
كل شكد اضيف شي جديد ؟
كل ٣ ايام
اكلات اؤجلها بعد ٦ اشهر ؟
البيض و السمك و اللبن علمود التحسس
و الموز؟ ليش لا ممكن من عمر ٥ اشهر عادي
شنو بعد ممنوع الى عمر سنه ؟
عسل
عصير
ملح
شكر
اكدر اجرب اخليه يوكل نفسه بنفسه ؟
يا ريت حتى يكون طفل مستقل يعرف الجوع و الشبع
تغييرات متوقعه ؟
1. استهلاكه للحليب يقل
2. اهلا بالامساك
3. لون الخروج و قوامه يتغير
شوكت اوكل الطفل؟
العادات الجيده تبدا مبكرا
وقت غداء او عشاء ثابت
مكان طعام ثابت مثلا كرسي الطعام
البيض اللبن الجبن السمك شوكت؟
البيض و اللبن ٦ اشهر
السمك ٨ اشهر الى سنه
الجبن ٨ اشهر
العصير؟
سيء و ما انصح بيه و مانعته الجمعية الأمريكيه لطب الاطفال لان ما بيه محتوى غذائي مهم
و بعد السنه شنو ياكل ؟
حاله حالك اشجعك على انه ياكل اكل بيت بعمر السنه
ليش تكتب هوايه بوستات عن الاكل ؟
لان تعبني منظر الاطفال الاصفر و شحوبهم بعد عمر السنه بسبب نظريه مغلوطه تكول ان الحليب غذاء كامل
في الحين بعد عمر السنه الحليب فقط مرتين و بالكوب
بسبب نظريه مغلوطه ان العصير زين في حين كل العالم يقلل العصير
بسبب اهمال الاباء و الامهات لتغذيه اولادهم بحيث اصبحنا من اكثر الدول اصابه بفقر الدم و تسوس الاسنان و و و للحديث تتمه
اتمنى هذا البوست يفيدكم
صحتهم اهم من تكاسلنا
د. سيف سمير البياتي اخصائي طب الاطفال باز کردن / نظر دهید

2023-06-05 23:58:01 باز کردن / نظر دهید

2023-06-05 23:57:52 دليلك الشامل للرضاعه الصناعيه !
الرضاعه الصناعيه تحتاج إلى أسس و قواعد حتى تتم بصوره صحيحه دون ما يتاذى طفلك
نبدا بالتدريج :
اختيار الحليب الصناعي :
اختار اللي يناسب جيبك و اختار الحليب اللي بيه عروض مجانيه او علبه زائد علبه
على الرغم من الترويج المبالغ بيه لأنواع الحليب الصناعي الا ان و لا واحد منهن يشبه الحليب الطبيعي فلا تدوخ نفسك و تشغل جيبك
زين شلون اعرف الحليب يناسبه ؟
تعجبني هذه الجمله من اخصائي رضاعه طبيعيه مصري بأحد محاضراته كال ( كل أنواع الحليب تناسب طفلك بأغلب الاحيان الا الحالات المرضيه بس يبقى طفلك مو كل حليب يناسبه )
لذلك مالك غير تجرب النوعيه و تختار
كيفيه تحضير الحليب !
اقري العلبه
اقري العلبه
شوفي الكيله
الكيله كبيره لو صغيره
الكيله الكبيره مثل السيميلاك و ال S26 تكفي رقمين حليب
الكيله الصغيره مثل كيكوز و نوفلاك و بريملاك و بيبلاك و ايفولاك و غيرها تكفي رقم واحد حليب
هل ضروري افور المميه قبل الرضاعه ؟
اي ضروري
#لا_تعتبرين_نفسك_معقمه_اذا_ما_تفورين_المميه
عداها اهلا بالاسهال
اذا امكانياتك زينه اشتري معقمه
عداها التفوير ١٠ دقايق تحمي طفلك من الالتهابات المعويه
الحليب اول او المي اول؟
المي اول و بعدها نضيف الحليب
ع طاري المي ضروري افور المي قبل الرضاعه؟
اي ضروري
ضروري اشتري مي خاص مال اطفال ؟
لا مجرد مصرف زايد
أكدر افور المي المعقم او المي المخصص للاطفال؟
اي نعم
لعد اي مي هو صالح للمميه؟
نفس المي اللي تشربه حضرتك شرط تفويره
كيف نذيب الحليب ؟
اهم شي نذيب الحليب بالدوران مو بالرج حتى لا يصير بالحليب غازات
كل شكد الطفل يرضع ؟
ماكو رقم معين بس اذا طفلك طبيعي فان طفلك يرضع من ٨ إلى ١٢ مره بأول اسبوعين
بعدها يقل إلى ٦ إلى ٨ مرات بعد الاسبوعين
ضروري اكعد الطفل للرضاعه؟
ابدا فقط اول اسبوعين اذا مرت ٤ ساعات يلا تكعديه
ما هي أفضل نوعيه مميه ؟
توجد مميات بنوعيات جيده و نوعيات خاصه للمغص و أخرى للارتجاع و أخرى للاطفال اللي يرضعون طبيعي حتى لا يصير اختلاط للحلمه
المهم ما عدنا هذا التنوع بالاختيار
كل اللي اطلبه منكم انه تشترون المميه بقياسات مضبوطه و الابتعاد عن المميات المغشوشه اللي قياساتها خطأ و مع الأسف هي منتشره بشكل كبير
المميه زجاج لو نايلون افضل؟
ما يفرق دام النايلون مكتوب عليها BPA free
كل شكد ابدل المميه ؟
من تنكسر او من تنحذف الارقام
حجم حلمات الببرونات؟
توجد ٣ أحجام للحلمه مال مميه
تبدي من اقلها و اضعفها للاعمار من 0 إلى 3 اشهر
إلى متوسطه للاعمار من ٣ إلى ٩ اشهر
و اخيرا أكبر حجم للاعمار أكبر من ٩ اشهر إلى سنه
و بعد السنه؟
مع السلامه مميه
الحليب يعطى بالكوب و فقط كوبان باليوم
حجم المميه ؟
اول ٤ إلى ٦ اشهر تكفي الطفل المميه ام ٤ ارقام
بعدها ممكن تغير إلى حجم أكبر اذا طفلك يحب
أكدر اخزن الحليب بالثلاثه؟
نعم اي أكدر و تبقى لمده ٢٤ ساعه عادي
ضروري احمي المميه من اطلعها من الثلاجه؟
لا مو ضروري اذا طفلك يحبها
كيف اعطي طفلي الرضعه ؟
اولا ارفعي راس طفلك
ممكن ان تجلسيه بحضنك بعد ما تكونين كاعده بكرسي مريح و ترفعين راسه
ممكن تخلين راسه على ذراعك
ممكن تكعديه على صدرك
او على ركبك و انت متمدده
تأكدي كلما ترفعين راس طفلك اكثر
كلما الغازات اقل
اي ارفعي طفلك
و بالأخص اذا طفلك عنده ارتجاع
و بعد ما قررت ارفع راس الطفل كيف انطيه الرضعه ؟
أقلب المميه و امليها بحيث ما يشفط اي كميه هواء و تكدر تميلها بحيث تكون الحلمه دائما ممتلئه
أكدر اخلي المميه على وساده و هو الطفل يرضعها؟
اذا اهلا بالتهاب الاذن الوسطى
أكدر اخلي الطفل يرضع مميه و هو بفراشه و راسه ما مرفوع ؟
اذا اهلا بالتهاب الاذن الوسطى
رفع راس الطفل ابدا مو رفاهيه
معدات تساعد الرضاعه ؟
مخده الارضاع اختيار جميل و لطيف
أكدر اخلي بعض القطرات مع الحليب ؟
بعض انواع السيمثكون ممكن اضافتها للحليب و مكتوب هالشي بالنشره المرفقه
قطره كوليف ما تشتغل اذا ما تضيفها للحليب لذلك واجب اضافتها
قطره فيتامين دي كذلك ممكن اضافتها للحليب
قطره البروبايوتك مثل اوبتيباك ممكن اضافتها للحليب
كافيسكون الاكياس ممكن اضافته للحليب
أحيانا نضيف سيريلاك رز او شوفان للحليب في حالات الارتجاع
د. سيف سمير البياتي اخصائي طب الاطفال
#دليلك_الشامل باز کردن / نظر دهید

2023-06-04 00:16:11 البروبايوتك
نشرت يوم أمس صباحا عنه
و كانت المعرفه مع الأسف قاصره بيه
بين شنو و منو و ليش البروبايوتك!
راح اكتب عن البروبايوتك
و فجاءه و بين ليله و ضحاها
كمزت البروبايوتك بحليب الاطفال و بالمكملات الغذائيه و حتى باصناف الاغذيه اللي يتناولها الاطفال
شنو هي البروبايوتك ؟
البروبايوتك هي بكتريا نافعه او بكتريا جيده
تساعد اكيد الجهاز الهضمي و تنظم عمله
البكتريا النافعه عليها بحوث هوايه
بحوث عديده عن انه تقلل المغص
و بحوث تكول انه اعطاؤها بالبدايه للطفل تقلل الارتجاع و تقلل المغص و تحسن طبيعه الخروج و تقلل الحزق
هل هي امينه ؟
المنظمه الامريكيه للغذاء و الدواء اعتبرت البروبايوتك كمكمل غذائي و ما اعتبرتها علاج فلذلك لا كالت عليها سليمه و لا كالت عليها ضاره
شنو انواع البكتريا اللي تعتبر مفيده ؟
هي وحده من ٣ فصائل
اما لاكتوباسلس
او بافيدوبكتريا
او سايكرومايسز بولاردي
شنو استعمالاتها؟
الفكره و ما بيها انه الامعاء مستوطنه بالف نوع بكتريا و كلما تزيد البكتريا النافعه كلما يتحسن النظام الغذائي
و بالتالي يتحسن الأيض و تقل المضاعفات المعويه
مفيده جدا اذا طفلك او انت تأخذ دائما مضاد حيوي
مفيده جدا لحالات القولون العصبي بالكبار
دراسات عديده نشرت عن فائدتها بتقليل نوبات الالتهابات التنفسيه البسيطه
دراسات عن تقليل التهاب المسالك البوليه
استعمالات أخرى؟
بيها استعمالات أخرى واعده
مثلا شافوا انه تقلل الاكزيما
تقلل نوبات التحسس للقصبات
تقلل معدل الحساسيه الغذائيه
تمنع التهابات المسالك البوليه
و تقلل تسوس الأسنان
مصادر طبيعيه للبروبايوتك؟
اللبن
بعض انواع الجبن مثل الموزيرلا و الشدر و الكوتج
و المخللات
موانع استخدام البروبايوتك؟
-الطفل عنده عمليه كبرى قريبه
-قله المناعه المثبته مثل الطفل المصاب بالسرطان او اللي ياخذ علاج كيمائي او عدهم ايدز
- الطفل اللي عنده التهاب بنكرياس
- اللي عدهم خروج دموي
- اللي عدهم قثطره دمويه
- اللي هم راقدين الان في وحدات الإنعاش الرئوي
هل هي امينه ؟
بصوره عامه هي امينه
بس احيانا تسبب اسهال و انتفاخ اذا بدت بجرعه عاليه و لتجنب هذا الشي ابدي تدريجي
كيف اعرف ان البروبايوتك امنه؟
اولا العمر مكتوب على العلبه العمر المسموح منه
ثانيا اذا كتبه الك الطبيب فاستمر عليها دام اطلع عليها طبيبك
محاذير أخرى؟
اذا تاخذ مضاد حيوي اخذ البروبايوتك قبل او بعد المضاد الحيوي بساعتين او اكثر
د. سيف سمير البياتي اخصائي طب الاطفال باز کردن / نظر دهید

2023-06-02 23:47:42 و هسه ؟
تعرفين لو لا انه اول شي تجيكيه بعد الولاده هو انه طفلك لازم ياخذ ١ ملغرام فيتامين k عضلي ؟
تعرفين او لا انه اول جرعه لقاح لطفلك هو أول رضعه من صدرك؟
تعرفين ان ماكو اي داعي للمي و شكر و فقط رضاعه؟
و اكيد صرتي تعرفين انه لازم طفلك ياخذ لقاح التهاب الكبد بأول ساعات بعد الولاده لو بعدك؟
و لازم طفلك ياخذ فيتامين D من اول يوم اذا ناويه ترضعين طبيعي ؟
و ان افضل ختان هو الختان المبكر بأول شهر ؟ اذا ماكو مانع طبي يمنع
و انه اذا دمك سالب او دمك O جيكي فصيله دم طفلك قبل ما تطلعين من المستشفى؟
و اكيد صرتي تعرفين انه الرضاعه هي عند الحاجه و ماكو رضاعه بنسق معين الا في حالات معينه؟
و ان اعراض التسنين ممكن تبدأ من عمر شهرين أو ٣ أشهر؟
و على طاري التسنين تدرين انه التسنين ممكن يتأخر لغايه ١٨ شهر عادي؟
ها صدك تعرفين انه ما يصير تنطين خافض حراره قبل اللقاح لان يؤثر على فعاليه اللقاح الا في حالات معينه سيخبرك بها طبيبك ؟
زين فهمتي زوجك انه مو كل ما يبجي الطفل يعني الطفل جوعان ؟
الطفل يبجي لان جوعان
و لأن بردان
و لأن حران
و لأن متوسخ
و لأن ضايج
و لأن مل من النظر للسقف و محد يحجي وياه
و من الغازات
و من كثر اللف
و من الكماط
و اكيد عرفتي انه مو احسن حليب هو أغلى حليب و إنما احسن حليب ممكن يكون ارخص حليب بس شرط يحقق وزن و نمو جيد ؟
و هسه اكيد عرفتي انه الحليب بيه نوعيتين كيلات
كيله تكفي رقمين مثل سيميلاك
و كيله تكفي رقم واحد مثل كيكوز و نوفلاك
و هسه اكيد ما يحتاج أسألك تعرفين شون تحسبين عمر طفلك ؟
لان اكيد تعرفين من يكمل الشهر يلا يسمى عمره كذا
يعني من يصير عمره ٣٠ يوم تسميه عمره شهر
و من يصير عمره ٦٠ يوم تسميه عمره شهرين
و من يصير عمره ٩٠ يوم تسميه عمره ٣ أشهر
و من يصير عمره ١٢٠ يوم تسميه عمره ٤ أشهر
يعني الطفل بهذا العمر و لغايه ١٨٠ يوم ممكن ندخل الاكل
و ما نحسب من بدايه الشهر و إنما على العمر المكتمل
اخر شي اكيد صرتي تعرفين انه الامومه مو سهله و اصعب من الصعبه شرط تؤديها بشروطها اللي تضمن صحه طفلك


د. سيف سمير البياتي اخصائي طب الاطفال باز کردن / نظر دهید

2023-06-01 20:03:49 اذا ما مشى من العادي جدا انه يتاخر الى ١٨ شهر
التبسم و الضحك
اول ضحكه هي ضحكه ال ٤٠ مثل ما اغلب اهلنا يسموها اي بعمر ٤٠ يوم
ممكن تتاخر الى شهرين
هذه تكون مجرد ابتسامه
الضحكه تتاخر الى ٤ اشهر ووتكون
اخر نقطه بهذا الموضوع
هو التفاعل الاجتماعي
من اول ايام عمره يعرف يتواصل حسيا ويه الناس اللي يحبهم لذلك تشوفه يسكت من امه تحجي وياه يسكت
او من يصير بحضن والده يسكت

بنهايه الشهرين تقريبا يعرف انه هذوله والده و والدته و يبدي يعرف انه هم ذوله اللي يوفروله العنايه
بعمر شهرين يبدي يضحك للاخرين و هذه من التطورات اللطيفه اللي تصير
بعمر ٤ اشهر يبدي يضحك للاخرين و يتفاعل وياهم و يبجي باصوات مميزه عند الجوع او الضجر
هنا احب اوضح نقطه هوايه يكولون انه ابنهم اجتماعي
و الحقيقه هي انه مثل ما قريتوا هذا شي عادي بكل الاطفال بعمر ٤ اشهر
.
بعمر ٦ اشهر راح يبدي ينزعج من الغرباء و ما يحب يتفاعل وياهم و ممكن اصلا يبجي
بهذا العمر ممكن تحدد طفلك هل هو خجول او ودي او جريء او متعاطف
بعمر ٨ اشهر يعرف انه يحس بالامان بوجود والديه
بعمر ٩ الى ١٠ اشهر يبدي توتر الفراق اللي هو يصير من ما يشوف والده او والدته و بالتالي يضوج و يزعل و ينتحس
اخر شي
لا تنسون هذا مو قانون
طفل يختلف عن الثاني
د. سيف سمير البياتي
اخصائي طب الأطفال باز کردن / نظر دهید

2023-06-01 20:03:48 لكل ام جديده رغبتها بانه تشوف ابنها يكعد و يمشي و يحجي باول سنه
هذا البوست هو عن خطوات التطور ؟
ليش التطور مهم؟
لان نعرف من خلاله النمو و الحركه و كلشي
منزل اني الكثير الكثير من البوستات بخصوص التطور
و هذا بوست جديد عن الموضوع
نبدي اولا
السيطره على الراس
بنهايه الشهر الاول يرفع الطفل راسه من يوضع على بطنه
بنهايه الشهر الثاني يرفع راسه ٤٥ درجه من يوضع على بطنه
يبدي يسيطر على راسه بعمر ٤ اشهر ( ١٢٠ ) يوم و من يوضع على بطنه يرفع راسه و حتى اعلى صدره
٦ اشهر يبدي يسيطر على راسه بالتمام و يفر راسه يمين او يسار للتفاعل معاك
بنهايه ال ٧ اشهر يكون مسيطر على راسه كالبالغ
.
.
النقطه الثانية من التطور هي الصوت و الكلام
بالشهرين ٦٠ يوم يبدي يناغي
بنهايه الشهر الثالث يبدي يضحك و يبجي بصوت غير اللي متعوده عليه و السبب هو تطور الحبال الصوتيه
بنهايه الشهر الرابع يبدي يكون حروف العله الانكليزيه مثل o او A او E
بنهايه الشهر السادس راح يبدي يجمع ذني الحروف و يلفظ ewww او Aoeeee
بعدها يبدي يلفظ الحرف الصحيح da
او ma او ba يعني مقطع واحد
بعمر ٩ الى ١٠ شهور يبدي يكول ماما بابا دادا بس ما يقصدها ما يعرف منو
بس مجرد يكولها
. بعمر السنه يكول ٣ كلمات او ٢ اللي هن ماما او بابا او دادا
و ممكن وياها كلمتين مثل لا او تعال او جدو
.
.
التقلب
و هذا يصير من الظهر للبطن بعمر ٤ اشهر
و من البطن للظهر بعمر ٦ اشهر
و ممكن جدا يتركوه و يعبروه الى خطوه تطور اخرى
.
.
الكعده
بال ٤ اشهر يلا نبدي نكعد الطفل بالحضن
المثل الوحيد الصحيح اللي سامعه من اهلنا " بالاربعه ربعوه"
بعمر ٦ اشهر يكعد بخلفيه مقوسه و تكون ايده على ساقه للاتزان
بعمر ٧ الى ٩ اشهر يبدي يكعد و هو مستقر و ما يحتاج ابدا للاتزان
بعمر ١٠ اشهر يبدي يكعد وحده و ما يحتاج مساعده
و بعمر ١٢ شهر يكدر يكعد بعد ما كان واقف
.
.
تطور حاسه النظر
بعد الولاده يكون نظرهم ضعيف و الرؤيه عدهم مغوشه
ما يجذبهم غير الاضاءه القويه
بعمر شهر يبدي يحب الوجوه
بعمر شهرين ما تنتظم حركه العين فعادي تشوف حول يروح و يرجع
بعمر ٣ اشهر يصير توافق بين العين و اليد فيبدي يشوف و يلمس
بعمر ٤ اشهر النظر يتحسن و يشوف الصوره ب ٣ ابعاد احسن مما قبل و يعرف البعد و العمق للصوره تقريبا
بعمر ٥ اشهر يبدي يعرف الوجه المالوف اله اذا مجرد يمر بالغرفه
و يبدي يضحك للاشخاص اللي يحبهم
بعمر ٦ اشهر يشوف و بوضوح كبير الغرفه و غيرها و ابعادها
بعمر ٩ اشهر يكدر يقدر المسافات فتشوف اذا تخليه على مكان عالي يخاف ينزل
بعمر ١٢ شهر يشوف مثل البالغ تماما
.
.
تطور حاسه اللمس
اول ما يولد الطفل من تخلي ايدك على راحته يبدي يسدها
نفس الشي يصير لاصابع القدم
هذا منعكس يختفي مع الايام
بعمر ٦ اشهر يبدي يلزم الاشياء
بعمر ٨ اشهر يبدي يستخدم قاعده الابهام
و بعمر ٩ الى ١٠ اشهر يبدي يستخدم الابهام و يلتقط الاشياء الصغيره
بعمر ١٢ شهر المسكه ممكن تكون معقده و يبدي يستخدم الابهام و الاصبع الوسطي مثلا بالالتقاط
.
.
تطور الوظيفه العقليه
يبدي مبكرا بعمر ٢ شهر و يبدي يتعرف على المحيط و يعرف شنو اللي حوله
اهم وحده بالتطور بالوظيفه العقليه تصير بعمر ٤ اشهر فيبدي يختبرك
يعني يضحك و يشوف شنو استجابتك
او مجرد ينظرلك و يشوف شنو استجابتك و هكذا
بعمر ٦ اشهر يبدي الفضول و يبدي يلمس الاشياء و يكتشفها شويه شويه
بنفس العمر تقريبا يبدي يعرف اسمه
بعمر ٧ الى ٨ اشهر يبدي عنده مبدا الاشتياق و يعرف يلعب الغميضه
بعمر ٩ اشهر يبدي يقلدك بالتصرفات و الحركات لذلك دائما تصرف بوعي امامه لان راح يتعلم منك الاكل و كل العادات الجيده و السيئه
بعمر ١٠ اشهر راح يتصاعد ذكائه اكثر و اكثر و بالتالي اذا خبيت شي عنه كدامه راح يجي و يلكاه
بعمر ١٢ اشهر يبدي يعرف اسماء بعض الاشياء مثل الباب و الشباك و غيرها و وظيفتها
يعرف مثلا انه المشط يستخدموه للتمشيط
و انه التلفون للاتصال
و هكذا
.
.
#baby_development
الزحف
منزل عن انواع الزحف اللي هوايه انواع بيه
يتم الزحف بعمر ٧ الى ٩ اشهر و ممكن جدا يتاخر الى ١١ شهر
الاعتماد على الساقين
ممكن جدا انه بعمر ٤ اشهر انه توكف الطفل على ساقيه
الحركه اللي ابدا ما انصح بيها
بس هي ممكن بهذا العمر
بعمر ٦ اشهر من توكفه يبدي يركص نصيحلها
اللي هي يحرك نفسه وقوفا و جلوسا
Bounces
بعمر ٩ اشهر راح يبدي يوكف لوحده بانه يسحب شي او يرتكز على شي
بعمر ١٢ شهر راح يبدي يوكف وحده و مو الا يمشي
اذا مشى كم خطوه فمعناها الامور جيده و التطور ماشي بصوره صحيحه باز کردن / نظر دهید

2023-05-31 23:01:41 13 نصيحه للتعايش مع مغص الثلاثه أشهر!!!
كتبت الكم عن مغص ٣ أشهر العديد من البوستات
هذا البوست هو للتعايش مع المغص
1. هذا لن يدوم للأبد
من المعروف ان المغص اسمه ٣ أشهر
و ممكن يستمر اي لغايه ٦ أشهر
بس هو المغص شدته اول شهرين وراها يقل و يقل
لذلك كوني مطمئنة
ان هذا لن يدوم للأبد
2. لا تفكرين كثيرا باللي كاعد ترضعيه
هل يناسبه او لا
طبيعي لو صناعي
اي أطفال الرضاعه الطبيعيه مغصهم بالمجمل اخف
بس اكو اطفال يرضعون طبيعي و مغصهم جدا جدا جدا شديد
لذلك لا تظلين تقفزين من حليب لآخر
المغص يصير عند كل الاطفال بغض النظر عن رضاعتهم
3. كون طفلك صار عنده مغص
هذا ابدا لا يعني انه راح يكون طفل صعب المزاج
المغص يصير عند الطفل الهاديء او العصبي
عند الشاطر و اللي مستواه مو جيد
لذلك لا تبنين نظرتك عن طفلك كونه صار عنده مغص
4. لا ترضعين هوايه
لطفا توقفي عن ذلك
اغلب أسباب المغص من كثر الرضاعه
اللي توقت موبايل و اللي ما اعرف شتسوي
و اللي تكول خطيه صارله هوايه نايم
تذكري دائما
#حليب_اكثر_مغص_اكثر
احملي طفلك
استخدمي اللهايه
و لا ترضعين بنسق ثابت
ما راح يكبر اسرع
الرضاعه هي عند الحاجه فقط
5. ما بيها شي اذا راجعتي الطبيب
الموضوع مو معيب
و حاليا توفرت العديد من حلول المغص عدا المعتاده منها
يعني السيمثكون صار قليل الاستخدام
و صرنا نستخدم قطرات الكوليف و البروبايوتك
6. احملي طفلك قدر الإمكان
و اذا عندك حماله طفل استخدميها
و لتذهب مقولة #يتعود_على_الحضن إلى الجحيم
طفلك يحتاجك
7. ممكن تكون الضوضاء هي السبب بزياده المغص !!!
اي ممكن
ممكن يكون الضوء العالي هو السبب
اي ممكن
يوم من أيام الابوه كنت خارج البيت بالخفاره رجعت لكيت زوجتي حايره بمغص ابني و الطفل ما يسكت
دخلت كلتلها ممكن تسدين الضوء!
و بكل بساطه نام حسن
مره اخرى كنت افتح الباب او الشباك لتبريد الغرفه شتاءا
و انتهى الموضوع
موضوع الجو الملائم الأقرب للبرد
و اللبس الخفيف
و الغرفه المظلمه مو رفاهيه إنما ضروره
8. فكري بنفسك
انت توا طالعه من تجربه الولاده
هرموناتك مخربطه
و وضعيتك النفسيه بالناقص
لا تفكرين انه انت السبب
فكري بس ان هذا الوقت سيمضي
اسمعي اغاني
موسيقى
اهدي و ارتاحي
9. التربيت على الظهر بمنتصف الرضعه و بنهايه الرضعه مهمه و وضع طفلك بزاويه ٣٠ درجه ممكن يقلل الارتجاع هم مهم و مفيد
بس تذكري طفلك ما يحتاج للمخده لغايه عمر السنه
10. عيشي حياتك و تعايشي ويه الموضوع
اطلعي
افتري
اطلعي ويه صديقاتك
ارجعي لدوامك
اخذي حمام مريح
استجمي
روحي صالون
اي شي يريحك سويه
#الطفل_المرتاح_هو_اللي_امه_مرتاحه
11. اخذي نفس عميق
من توصل لحدها الوضعيه
اخذي نفس عميق و ارتاحي
12. امنحي لنفسك هديه
انت مو ام سيئه لان طفلك عنده مغص
انت ام عظيمه
13. كوني منفتحه للعلاجات الجديده للمغص
و اللي ممكن مناقشتها ويه طبيبك
مثل البروبايوتك اللي بصراحه صار المغص اقل و اقل لما نبدي بيها مبكرا
و قطرات الكوليف اللي غيرت مسار المغص


د. سيف سمير البياتي اخصائي طب الاطفال باز کردن / نظر دهید