إستشارة طبية

2023-06-01 20:03:48 لكل ام جديده رغبتها بانه تشوف ابنها يكعد و يمشي و يحجي باول سنه
هذا البوست هو عن خطوات التطور ؟
ليش التطور مهم؟
لان نعرف من خلاله النمو و الحركه و كلشي
منزل اني الكثير الكثير من البوستات بخصوص التطور
و هذا بوست جديد عن الموضوع
نبدي اولا
السيطره على الراس
بنهايه الشهر الاول يرفع الطفل راسه من يوضع على بطنه
بنهايه الشهر الثاني يرفع راسه ٤٥ درجه من يوضع على بطنه
يبدي يسيطر على راسه بعمر ٤ اشهر ( ١٢٠ ) يوم و من يوضع على بطنه يرفع راسه و حتى اعلى صدره
٦ اشهر يبدي يسيطر على راسه بالتمام و يفر راسه يمين او يسار للتفاعل معاك
بنهايه ال ٧ اشهر يكون مسيطر على راسه كالبالغ
.
.
النقطه الثانية من التطور هي الصوت و الكلام
بالشهرين ٦٠ يوم يبدي يناغي
بنهايه الشهر الثالث يبدي يضحك و يبجي بصوت غير اللي متعوده عليه و السبب هو تطور الحبال الصوتيه
بنهايه الشهر الرابع يبدي يكون حروف العله الانكليزيه مثل o او A او E
بنهايه الشهر السادس راح يبدي يجمع ذني الحروف و يلفظ ewww او Aoeeee
بعدها يبدي يلفظ الحرف الصحيح da
او ma او ba يعني مقطع واحد
بعمر ٩ الى ١٠ شهور يبدي يكول ماما بابا دادا بس ما يقصدها ما يعرف منو
بس مجرد يكولها
. بعمر السنه يكول ٣ كلمات او ٢ اللي هن ماما او بابا او دادا
و ممكن وياها كلمتين مثل لا او تعال او جدو
.
.
التقلب
و هذا يصير من الظهر للبطن بعمر ٤ اشهر
و من البطن للظهر بعمر ٦ اشهر
و ممكن جدا يتركوه و يعبروه الى خطوه تطور اخرى
.
.
الكعده
بال ٤ اشهر يلا نبدي نكعد الطفل بالحضن
المثل الوحيد الصحيح اللي سامعه من اهلنا " بالاربعه ربعوه"
بعمر ٦ اشهر يكعد بخلفيه مقوسه و تكون ايده على ساقه للاتزان
بعمر ٧ الى ٩ اشهر يبدي يكعد و هو مستقر و ما يحتاج ابدا للاتزان
بعمر ١٠ اشهر يبدي يكعد وحده و ما يحتاج مساعده
و بعمر ١٢ شهر يكدر يكعد بعد ما كان واقف
.
.
تطور حاسه النظر
بعد الولاده يكون نظرهم ضعيف و الرؤيه عدهم مغوشه
ما يجذبهم غير الاضاءه القويه
بعمر شهر يبدي يحب الوجوه
بعمر شهرين ما تنتظم حركه العين فعادي تشوف حول يروح و يرجع
بعمر ٣ اشهر يصير توافق بين العين و اليد فيبدي يشوف و يلمس
بعمر ٤ اشهر النظر يتحسن و يشوف الصوره ب ٣ ابعاد احسن مما قبل و يعرف البعد و العمق للصوره تقريبا
بعمر ٥ اشهر يبدي يعرف الوجه المالوف اله اذا مجرد يمر بالغرفه
و يبدي يضحك للاشخاص اللي يحبهم
بعمر ٦ اشهر يشوف و بوضوح كبير الغرفه و غيرها و ابعادها
بعمر ٩ اشهر يكدر يقدر المسافات فتشوف اذا تخليه على مكان عالي يخاف ينزل
بعمر ١٢ شهر يشوف مثل البالغ تماما
.
.
تطور حاسه اللمس
اول ما يولد الطفل من تخلي ايدك على راحته يبدي يسدها
نفس الشي يصير لاصابع القدم
هذا منعكس يختفي مع الايام
بعمر ٦ اشهر يبدي يلزم الاشياء
بعمر ٨ اشهر يبدي يستخدم قاعده الابهام
و بعمر ٩ الى ١٠ اشهر يبدي يستخدم الابهام و يلتقط الاشياء الصغيره
بعمر ١٢ شهر المسكه ممكن تكون معقده و يبدي يستخدم الابهام و الاصبع الوسطي مثلا بالالتقاط
.
.
تطور الوظيفه العقليه
يبدي مبكرا بعمر ٢ شهر و يبدي يتعرف على المحيط و يعرف شنو اللي حوله
اهم وحده بالتطور بالوظيفه العقليه تصير بعمر ٤ اشهر فيبدي يختبرك
يعني يضحك و يشوف شنو استجابتك
او مجرد ينظرلك و يشوف شنو استجابتك و هكذا
بعمر ٦ اشهر يبدي الفضول و يبدي يلمس الاشياء و يكتشفها شويه شويه
بنفس العمر تقريبا يبدي يعرف اسمه
بعمر ٧ الى ٨ اشهر يبدي عنده مبدا الاشتياق و يعرف يلعب الغميضه
بعمر ٩ اشهر يبدي يقلدك بالتصرفات و الحركات لذلك دائما تصرف بوعي امامه لان راح يتعلم منك الاكل و كل العادات الجيده و السيئه
بعمر ١٠ اشهر راح يتصاعد ذكائه اكثر و اكثر و بالتالي اذا خبيت شي عنه كدامه راح يجي و يلكاه
بعمر ١٢ اشهر يبدي يعرف اسماء بعض الاشياء مثل الباب و الشباك و غيرها و وظيفتها
يعرف مثلا انه المشط يستخدموه للتمشيط
و انه التلفون للاتصال
و هكذا
.
.
#baby_development
الزحف
منزل عن انواع الزحف اللي هوايه انواع بيه
يتم الزحف بعمر ٧ الى ٩ اشهر و ممكن جدا يتاخر الى ١١ شهر
الاعتماد على الساقين
ممكن جدا انه بعمر ٤ اشهر انه توكف الطفل على ساقيه
الحركه اللي ابدا ما انصح بيها
بس هي ممكن بهذا العمر
بعمر ٦ اشهر من توكفه يبدي يركص نصيحلها
اللي هي يحرك نفسه وقوفا و جلوسا
Bounces
بعمر ٩ اشهر راح يبدي يوكف لوحده بانه يسحب شي او يرتكز على شي
بعمر ١٢ شهر راح يبدي يوكف وحده و مو الا يمشي
اذا مشى كم خطوه فمعناها الامور جيده و التطور ماشي بصوره صحيحه باز کردن / نظر دهید

2023-05-31 23:01:41 13 نصيحه للتعايش مع مغص الثلاثه أشهر!!!
كتبت الكم عن مغص ٣ أشهر العديد من البوستات
هذا البوست هو للتعايش مع المغص
1. هذا لن يدوم للأبد
من المعروف ان المغص اسمه ٣ أشهر
و ممكن يستمر اي لغايه ٦ أشهر
بس هو المغص شدته اول شهرين وراها يقل و يقل
لذلك كوني مطمئنة
ان هذا لن يدوم للأبد
2. لا تفكرين كثيرا باللي كاعد ترضعيه
هل يناسبه او لا
طبيعي لو صناعي
اي أطفال الرضاعه الطبيعيه مغصهم بالمجمل اخف
بس اكو اطفال يرضعون طبيعي و مغصهم جدا جدا جدا شديد
لذلك لا تظلين تقفزين من حليب لآخر
المغص يصير عند كل الاطفال بغض النظر عن رضاعتهم
3. كون طفلك صار عنده مغص
هذا ابدا لا يعني انه راح يكون طفل صعب المزاج
المغص يصير عند الطفل الهاديء او العصبي
عند الشاطر و اللي مستواه مو جيد
لذلك لا تبنين نظرتك عن طفلك كونه صار عنده مغص
4. لا ترضعين هوايه
لطفا توقفي عن ذلك
اغلب أسباب المغص من كثر الرضاعه
اللي توقت موبايل و اللي ما اعرف شتسوي
و اللي تكول خطيه صارله هوايه نايم
تذكري دائما
#حليب_اكثر_مغص_اكثر
احملي طفلك
استخدمي اللهايه
و لا ترضعين بنسق ثابت
ما راح يكبر اسرع
الرضاعه هي عند الحاجه فقط
5. ما بيها شي اذا راجعتي الطبيب
الموضوع مو معيب
و حاليا توفرت العديد من حلول المغص عدا المعتاده منها
يعني السيمثكون صار قليل الاستخدام
و صرنا نستخدم قطرات الكوليف و البروبايوتك
6. احملي طفلك قدر الإمكان
و اذا عندك حماله طفل استخدميها
و لتذهب مقولة #يتعود_على_الحضن إلى الجحيم
طفلك يحتاجك
7. ممكن تكون الضوضاء هي السبب بزياده المغص !!!
اي ممكن
ممكن يكون الضوء العالي هو السبب
اي ممكن
يوم من أيام الابوه كنت خارج البيت بالخفاره رجعت لكيت زوجتي حايره بمغص ابني و الطفل ما يسكت
دخلت كلتلها ممكن تسدين الضوء!
و بكل بساطه نام حسن
مره اخرى كنت افتح الباب او الشباك لتبريد الغرفه شتاءا
و انتهى الموضوع
موضوع الجو الملائم الأقرب للبرد
و اللبس الخفيف
و الغرفه المظلمه مو رفاهيه إنما ضروره
8. فكري بنفسك
انت توا طالعه من تجربه الولاده
هرموناتك مخربطه
و وضعيتك النفسيه بالناقص
لا تفكرين انه انت السبب
فكري بس ان هذا الوقت سيمضي
اسمعي اغاني
موسيقى
اهدي و ارتاحي
9. التربيت على الظهر بمنتصف الرضعه و بنهايه الرضعه مهمه و وضع طفلك بزاويه ٣٠ درجه ممكن يقلل الارتجاع هم مهم و مفيد
بس تذكري طفلك ما يحتاج للمخده لغايه عمر السنه
10. عيشي حياتك و تعايشي ويه الموضوع
اطلعي
افتري
اطلعي ويه صديقاتك
ارجعي لدوامك
اخذي حمام مريح
استجمي
روحي صالون
اي شي يريحك سويه
#الطفل_المرتاح_هو_اللي_امه_مرتاحه
11. اخذي نفس عميق
من توصل لحدها الوضعيه
اخذي نفس عميق و ارتاحي
12. امنحي لنفسك هديه
انت مو ام سيئه لان طفلك عنده مغص
انت ام عظيمه
13. كوني منفتحه للعلاجات الجديده للمغص
و اللي ممكن مناقشتها ويه طبيبك
مثل البروبايوتك اللي بصراحه صار المغص اقل و اقل لما نبدي بيها مبكرا
و قطرات الكوليف اللي غيرت مسار المغص


د. سيف سمير البياتي اخصائي طب الاطفال باز کردن / نظر دهید

2023-05-29 18:39:11 و كعد الولد ساعه 7 الصبح
ماما ماما
ماما كعدت
ماما اريد حليب
دروح هسه مو وكت حليب ارجع نام
راح الولد
فتح التلفزيون
كعد شويه ع التلفزيون
راح للمطبخ يدور اكل
جاب الكرسي و صعد ع الكاونتر
وكع الكورن فلكس على الأكواب و كسر المواعين
كعدت الأم من الصوت
لزمته صرخت عليه
و ليش ما كلتلي اريد ريوك
انطته قطعه كيك و باكيت عصير
شربهن و سكت
صار الظهر و اجه الاب من الشغل
استقبل ابوه بضحكه
ابوه شاله و راح يتغدى
دا يتغدى وكع الاكل على نفسه
صيحوا الأم و الاب عليه
و خاف الطفل و راح يختل و دمعته على خده
نام الاب
اجه يلعب وياه
كعد الاب من النوم منزعج و صرخ على الولد
ليش كعدتني و اني تعبان
انكسر خاطر الطفل
و راح يتفرج تلفزيون منا للعصريه
جتي العصريه و قرروا يطلعون
و كالعاده لازم تتوسخ ملابسه
و اخذله ضربه زينه من أمه
و رجعوا للبيت
اجه وقت العشا
و راد الطفل يسأل كم سؤال
سكته الاب و كاله لا تدوخني حبيبي باجر ورايه دوام
نام الطفل حاضن العابه و هو يومه كله تعيس
أخذته امه لفراشه و هي تبوسه و تكوله حبيبي شكد احبك بس وكيح
ابوه كال اي و الله وكيح الله يساعدنا على تربيته
تربيته؟
هي هذه التربيه؟
هيجي نربي بهذا الاهمال و هذه القسوه ؟
اعتبروه كلام على ورق بس تفكروا بيه شويه
د. سيف سمير البياتي اخصائي طب الاطفال باز کردن / نظر دهید

2023-05-26 00:21:38 Say no to juice
قل لا للعصير
جمله قد تبدو كفرا بالعادات المعتاد عليها كون العصير بقى لزمن طويل من المحرمات اللي لا يجب ابدا الحديث عنها و خط أحمر و برتقالي
العصير هو العصير الطبيعي الغير مضاف له سكر
و اكيد ما اكتب هنا عن العصير المعلب بباكيت او اكواب او علب و اللي هي عباره عن ماء و سكر
لا لا
اكتب هنا عن عصير طبيعي مصنوع بالبيت سواء بخلاط او ماكنه عصائر
نجي و نسولف ليش العصير سيء؟
1. حتى تحضر عصير تحتاج ل ٣ او ٤ ثمرات من الفاكهه و هذا يزيد المحتوى السكري
2. نزع الياف الثمار بعصرها يفقدها فائدتها
3. تؤثر على ذوق الاطفال كون الطفل سيفضل العصير و بالتالي يفضل كل طعم حلو
4. يفقد الطفل الشهيه
5. يزيد نسبه الاصابه بتسوس الاسنان
6. آخرها و اهمها فان العصير يسد الشهيه و لا يعطي قيمه غذائية مهمه للطفل
و يبقى تناول الفاكهه كاملا افضل من العصير بعده مرات
الصوره من سنه 2019 لمنظمه التغذيه الوطني الامريكي و اللي مكتوب بيها
Say No to juice
اي قل لا للعصير
الاكاديميه الامريكيه لطب الأطفال مو بعيده عن الموضوع و كالت ان العصير ممنوع تحت عمر سنه
جمعيه القلب الامريكيه تكول اذا انطيت عصير انطي مره بالأسبوع فقط على شرط يكون طبيعي و غير مضاف له السكر
د. سيف سمير البياتي اخصائي طب الاطفال باز کردن / نظر دهید

2023-05-24 14:25:06 باز کردن / نظر دهید

2023-05-24 14:25:02 جبر الاطفال على الطعام لا ينتج عنه الا اطفال لا ياكلون اكثر
نشرت هذه الأم الصوره لطفلها ضاحكه و هي تقول ( لم ياكل شيئا في اول مره )
اي من العادي ان لا ياكل شيء بأول مره
و لا ثاني مره
و لا عاشر مره
و ممكن ما يحب البيض حتى لو جربتيه 15 مره بس يحبه بالمره ال 16
و ممكن ما يحب الفاكهه طول عمره
الاطفال لا تقارن شهيتهم باي شخص بالغ
الاطفال ياكلون او لا ياكلون
ياكلون بين الوجبات او ياكلون وجبتين بوقت واحد
الاطفال لا يشبهونا ابدا
معدلات نموهم و افراز هرمون النمو عدهم يفرق جذريا عننا
تشوفه يوم ياكل كثيرا
و يوم ما ياكل اي شيء
بس بصوره عامه
للحصول على طفل ما عنده مشاكل بالأكل عليك بالتالي :
1. لا تجبريه
2. علميه مثل الصوره يستقل بنفسه
3. لا تبدين بالسكريات
4. ابدي مبكرا من عمر 4 إلى 6 أشهر
5. نوعي الطعام كثيرا بأول سنه
6. قللي الحليب تدريجيا بعد عمر 6 اشهر
7. الحليب مرتان فقط بالكوب بعد عمر سنه
8. قولي لا للعصير طبيعي او صناعي
9. قطعه شوكولاته صغيره تسد الشهيه كثيرا و الجبس بعد اكثر
10. دائما فكر بمكان طفلك و تأكد انك كطفل كنت تفضل قطع جبس على شوربه العدس مثلا
11. لا تقدم الطعام بوجبات كبيره
12. معده الطفل هي بقدر يد طفلك مقبوضه
13. عضلات الطعام هي نفسها عضلات الكلام فكلما ابتعدت عن المميه و الملهيه و الطاقه المشروبه كلامه و اكله سوف يتحسن
14. الاطفال يفضلون الاكل ليلا و برفقه الأصدقاء من عمرهم اكثر
15. لا للجبر لا للضرب لا للمكافئه بعصير او حلويات لانه اكمل صحنه
و بالاخير اهم شيء هو المتابعه مع طبيبك من اول يوم
صور الاطفال اللي تاكل مثل صوره لوكاس اللي نشرته قبل كم يوم اكيد بعد تعب و اصرار من الأم حتى توصل لمرحله لوكاس
مو اني انطي سيريلاك و اكل جاهز و انطيه مميه و اكول ما ياكل
الاكل تجربه اجتماعيه تحتاج لصبر طويل


د. سيف سمير البياتي اخصائي طب الاطفال باز کردن / نظر دهید

2023-05-23 23:03:43 اكتب هذه المره عن اهميه اللحم بالنسبه للاطفال
و بالأخص الأطفال الرضع تحت عمر سنه
تعرفون يمكن أن نسبه الدم اول ما يجي الطفل للدنيا هي كلش عاليه و تبدي شويه شويه تنزل و طبعا هذا الدم العالي راح يتكسر و ينخزن كحديد بالجسم
و يبدي بحوالي ٤ إلى ٥ اشهر يخلص الحديد من الجسم
و هنا لازم نضيف الحديد
لان اكيد تعرفون انه حتى الحليب المدعم بالحديد همين ما بيه كميه حديد كافيه
و اما اللي يرضعون طبيعيا فيحتاجون اكيد لاضافه الحديد على شكل قطرات بعمر ٤ شهور ١٢٠ يوم
نقطه اخرى اكو جدول صغير بالصور شوفوا شكد يحتاج حديد بعمر ٧ إلى ١٢ شهر و بعدها يقل الاحتياج
و احنا حارميهم علمود خرافه انه اللحم ما يصير قبل السنه
المهم ما عليكم بالشرح الفوك
شنو المطلوب دكتور؟
المطلوب هو تزويد الطفل باللحم بعمر ابكر من اللي تعودنا عليه
و قسم من خبراء التغذيه يكولون لازم اول اكله تدخل للطفل هي اللحم
اني رأيي انه اول اكله هي الرز و مشتقاته مثل الفوح و شوربه الرز و غيرها
و بعدها بحدود ال ٥ إلى ٦ اشهر دخلي اللحم
و اول لحم هو الدجاج و بعدها اللحم الاحمر و اخرها السمك
طبعا اكيد راح يجي سؤال
دكتووووور شون مو ما عنده سنون؟
اكيد باستخدام الخلاط
او تكدرين تسويه بيوريه بعد ما تكسرين اللحم على النار
او اقلها المي مالته
انتبهي طبعا و بكل حذر اذا اكو قطع لا يغص بيها الطفل
ملاحظه : الدود عدوى و اللحم المسكين ماله علاقه بالدود فاللي تكولك شووون مو يصير بيه دود كوليلها عيب هالخرافات
د. سيف سمير البياتي
اخصائي طب الأطفال باز کردن / نظر دهید

2023-05-23 00:21:16 بدا موسم الحر
و الصيف
نذكر بالاساسيات
الطفل يتأثر بالحر اكثر من الكبير لأنهم ببساطه ما عدهم القدره على تنظيم درجه الحراره بالتعرق مثلنا فتصعد حرارتهم اكثر
ثانيا مساحه جسمهم السطحيه مقارنه بالوزن أكبر من عندنا فيحتاج جهد أكبر لتنظيم الحراره لذلك كلما الطفل أصغر كلما مساحته السطحيه أكبر و بالتالي صعوبه السيطره على الحراره أكبر ( تذكروا الخدج)
و ثالثا و هي اهمها الطفل ما عنده القدره انه يكولك انه الجو حار او ما يناسبني
لذلك تذكروا التالي:
ملابس خفيفه و نوعيه جيده قطنيه و بلا طبعات و الياف نايلون و لصقات كبيره و مزعجه
نظام تهويه جيد و المروحه ضروريه
قول لا لأي غرفه ما بيها تهويه
خصوصا اذا عندك طفل حديث الولاده
فارتاحي انت و طفلك بمكان بارد بيه تهويه جيده
اجهزه التبريد لا باس بها و نخليها على درجه معتدله بين ٢٠ إلى ٢٤ و حسب جو غرفتك
قولي لأي غطاء إضافي فلا ننسى ان كثر التغطيه مرتبطه بملازمه موت الفجاءه للرضع
اذا يرضع طبيعي فكثفي الرضاعه الطبيعيه بالاجواء الحاره
و اذا يرضع صناعي كثفي الرضاعه الصناعيه
للاطفال الأكبر عمرا اللي ما يرضعون كثفوا من إعطاء الماء
عند الخروج من المنزل اختار الأماكن البعيده عن الشمس
و اذا اضطر طفلك للخروج في الشمس استخدم واقي الشمس المرخص للاطفال
ابدا لا تترك اطفالك بسيارة مغلقه بدون تهويه و بدون رقيب أكبر من ١٤ سنة
الماء هو الأفضل لطفلك مقارنه مع العصير الطبيعي لتبريد طفلك
اذا الحراره عاليه بالبيت اخذ طفلك للحمام
لا تترك طفلك بعربه مغلقه حاره
وداعا للجينزات و الملابس الضيقه و الاحذيه الغير ضروريه فالاهم راحه طفلك
اخر ملاحظه طفلك باللعب و التمارين بالجو الحار ما يكدر ينظم حرارته اكثر من هو مرتاح
لذلك بالحر لا تخليه يلعب هوايه و الا بالتالي يتعرض لضربه الشمس او الجفاف الشديد
د. سيف سمير البياتي اخصائي طب الاطفال باز کردن / نظر دهید

2023-05-21 16:37:09 اللي بالصورة حليب
الحليب حليب ام
حليب طبيعي
مو شي جديد
بس الجديد انه هذا الحليب عمره ٨ سنوات
تخيلوا اللي صار
الام راح يجيها مولود جديد فطلعت الجنطه ( جنطه الحفاظات ) مال الاخ الكبير من ضمن الاغراض كانت هذه المفاجئه
لا فطريات
لا عفن
لا تغيير باللون
الحليب اللي حافظ على نفسه ٨ سنين
راح يحافظ على طفلك لسنين اطول
د. سيف سمير البياتي
اخصائي طب الاطفال باز کردن / نظر دهید

2023-05-20 10:21:49 اليوم نحجي عن موضوع اللقاحات
اولا و قبل كل شيء
الالتزام بالموعد جدا جدا ضروري
٦ ملاحظات عن الموضوع
حبيت انوهكم عليها
١. اهم شي الالتزام بالموعد
مثلا لقاح الفايروس العجلي الدوار
اذا عبر ٣ اشهر و ما تلقح طفلك
بعد ما يصير يأخذه
و هذا اللقاح يحمي من الاصابه بالمسبب الأول الاسهال في العالم
فإذا ما اخذه راح تزيد احتماليه الاصابه بالإسهال
المهم حافظي على نظافه بيتك و اكدي على موضوع غسل اليدين
.
٢. حسب اخر تحديث لا يحتاج لقاح السل اعاده اذا ما ظهر الاثر
يعني رحتي لقحتي طفلك لقاح السل و بعد شهرين ما ظهر الاثر
هل معناه انه طفلي ما استفاد من اللقاح؟
لا خطا ما يحتاج اعاده حسب اخر تحديث لسنه ٢٠١٩
.
٣. أعرف جيدا انه لسبب من الأسباب ما تلقح الطفل و عبر عليه اللقاح مثلا الطفل مصخن او مريض او مسافر او اللقاح غير متوفر
ممكن جدا يعوض اللقاح الا لقاح العجلي الدوار
و من يعبر هذا اللقاح راح يقل تطعيمه و تقل حمايته من هذا المرض فيعني سؤال فلان لقاح ما تلقحه ياثر عليه غير منطقي؟
لان واضح جدا جواب السؤال انه ما راح تصير مناعه من هذا الفايروس او المرض فإذا تعرض لهذا المرض ممكن يكون شديد عليه او ممكن بسيط حسب مناعته
و اكيد اللي ماخذ جرعتين مناعته احسن من اللي ماخذ جرعه وحده
.
٤. ارتفاع درجه الحراره العاليه فوق ٣٨ و نص هو تقريبا المانع الوحيد لعدم لقاح الطفل
و الا لا النشله او الأمراض البسيطه الأخرى تمنع اللقاح
.
٥. إعطاء خافض الحراره يفضل بعد ما تظهر الحراره و اذا ما صعدت الحراره ما يحتاج ابدا
لان اكو اكثر من دليل ان إعطاء خافض الحراره بدون حراره فان ذلك يتعارض مع فعاليه اللقاح
يستثنى من ذلك الاطفال اللي عدهم تاريخ طبي للشمره الحراريه فذوله تكدرين تنطيهم خافض حراره قبل اللقاح او بعد اللقاح عادي
.
٦. اذا ما ارتفعت حراره الطفل بعد اللقاح فابدا مو معناها اللقاح ما اشتغل . الحراره بعد اللقاح أعراض جانبيه ممكن تظهر و ممكن لا
شكرا الكم
و تبقى الرضاعه الطبيعيه اول لقاح ياخذه طفلك
د. سيف سمير البياتي
اخصائي طب الأطفال باز کردن / نظر دهید