2023-05-24 12:09:54
امتى أعرف إني محتاجة أهتم بنفسي وبس
لما التفكير الزايد "over thinking "مايفارقش دماغي
حتى وأنا نايمة
لما أصحى من النوم أحس إن اليوم خلص
لما أكره يوم السبت عشان بعديه الأحد وورايا مليون
حاجة عايزة تخلص
لما أكلم حد وعنيا مابتركزش فيه وعمالة تلف في
كل مكان وأنا بتكلم
لما أقعد اليوم كله بقول ورايا الف حاجة عايزة تتعمل وماعملش ولا حاجة
لما اخرج اتفسح ومحسش بالفسحة
لما افتح كل فيديو عايزة اسمعه اسمع فيه ٥ دقايق واقفله تاني من تأنيب الضمير
لو دا حصل معاكي وقفي لحظة
واعرفي إن "الأنثى خلقت لتستمتع "
ودا معناه آن كل أدوارك اللي بتقومي بيها بتعمليها بحب عشان كدة بتستمتعي بيها
لو بقيتي مرهقة وتعبانة من ادوارك اللي بتقومي بيها
معناها إنك جيتي على نفسك لحد ماتعبتي
كل أدوارك مهمة بس أهمهم هو اهتمامك بنفسك وصحتك لأنه هو اللي هيديكي الطاقة والراحة وانتي بتعيشي أدوارك في الحياه
خللي نفسك أولوية عشان تقدري تساعدي اللي حواليكي
وإن فعلا تعبتي و بقيتي مرهقة سيبي كل شي وارتاحي
إزاي ترتاحي
ثبتي عادة واحدة بس واعمليها كل يوم تساعدك على الاسترخاء وتجديد طاقتك وخليها أولوية في يومك رغم كل الظروف
اعملي تمارين تنفس عميق كل يوم
خدي شاور بأملاح spa
اخرجي كل يوم نص ساعة في مكان بتحبيه
روحي Spa
اعمليلك خلوة فيها ذكر وقراءة قرآن
اتمشي كل يوم ٢٠ دقيقة
إغزلي تريكو أو كروشيه أو ارسمي
مارسي هوايتك المفضلة
اعملي تحاليل واطمني على نفسك
خدي مكملات
اعملي سموزي
باختصار قدمي لنفسك رعاية
دايما خللي عندك قائمة بالمغذيات اللي بتغذي روحك وتعملك تعافي وتساعدك على التدفق في الحياه
الجسم بيتغذي بالأكل
وبرده النفس والروح ليهم غذا وغذاهم الحجات اللي بتحبي تعمليها والحجات اللي بتوصلك ب ربنا
وماتنسيش تطلبي المساعدة والدعم من الناس اللي بتثقي في مساعدتهم ليكي
خللي بالك من نفسك عشان تبقي #أقوى_من_جوة_لبرة
#امرأة_متميزة
http://T.me/moslamawoman
4.4K viewsedited 09:09
