بسم الله كالعادة ملخص من ملخصاتنا اللي تحتاجها لمدلولات نتايجك | مختبرات. طبيه عملي

بسم الله
كالعادة ملخص من ملخصاتنا اللي تحتاجها لمدلولات نتايجك، وحاجه ترجعلها بسرعة وأنت ف معملك

غااااااازات الدم
Blood gases


هنتكلم عن 6 نقاط وهما
ايه هي التحاليل دي
توازن درجة الحمضية والقلوية في الدم
ازاي اسحب عينة من الشريان
فكرة التعويض
الاحتمالات
أفهم النتايج ليه و إزاي

النقطة الأولى
ايه هي التحاليل دي

الأس الهيدروجيني
pH
دا حكاية لواحده وزي مابيقولوا 80% مش فاهمينه
لكن باختصار هنقيس تركيز ايونات الهيدروجين في الدم، ومنه هعرف الدم حمضي
Acidic, acidosis, acidity, acidemia
او قلوي
Alkaline, alkalosis, alkalinity, alkalimia
والطبيعي بتاعه
7.35 – 7.45


ثاني أكسيد الكربون
PCO2
وعشان دا غاز فهنقيس الضغط الجزئي the partial pressure ليه، واللي بيتحمل في الدم عشان يروح يخرج من الرئة ومعروف بالمعامل التنفسي
respiratory parameter
والطبيعي بتاعه
35 – 45 mmhg
ثاني أكسيد الكربون بيكون مركب حمض الكربونك «حط خط تحت حمض دي» هنحتاجها بعدين


الأوكسجين
PO2
وعشان دا غاز بردو فهنقيس الضغط الجزئي the partial pressure ليه، واللي دايب في الدم، واللي بيعكس قدرة الجسم على حمل الأوكسجين من الرئة
والطبيعي بتاعه
80 – 100 mmhg


الباي كربونيت
HCO3
دا مركب ناتج من التمثيل وعشان كدا اسمه معامل التمثيل the metabolic parameter ، وبيعكس قدرة الكلى على حفظها واخراجها للباي كاربونيت
bicarbonate
وهو إما بيتقاس فعليا أو بيتحسب
والطبيعي بتاعه
22 – 28 meq/L


نسبة تشبع الدم بالأوكسجين
SaO2
من اسمها واضحة جدا
The arterial oxygen saturation
والطبيعي بتاعه في الدم الشرياني
>95%

دمتم بخير محمد سليم


النقطة التانية
توازن درجة الحمضية والقلوية في الدم
Acid base balance

عرفنا ان الدم قلوي بسيط 7.4، وعشان نوازن pH دا هنتعب شويه

في عضوين وهما الرئة والكلى وظيفتهم يحافظوا على درجة pH بتاعة الدم


الرئة بتظبط pH بسرعة، بس مش بتظبطها اوي، عن طريق التنفس، ولو الرئة فيها مشكلة هيحصل
Respiratory acidosis
أو
Respiratory alkalosis

الكلى بتظبط pH بس ببطء يعني تاخد يوم كامل مثلا، ولو الكلى او غيرها فيها مشكلة هيحصل
Metabolic acidosis
أو
Metabolic alkalosis


طيب ازاي الرئة بتظبط الpH
هنفترض ان حصل acidosis
يعني الpH قليلة
يعني الأحماض في الدم عالية
وعندنا أهم مصدر من مصادر الأحماض في الدم هو CO2
فالرئتين تشتغل بقوة وعمق وبسرعة عشان تخرج ال CO2 مع النفس عشان يقل من الدم، فتقل الأحماض، فيرتفع الpH ويظبط


طيب نفترض العكس ان عندي alkalosis
يعني الpH عالية
يعني الأحماض في الدم قليلة
وعندنا أهم مصدر من مصادر الأحماض في الدم هو CO2
فالرئتين تشتغل ببطء عشان تقلل خروج ال CO2 مع النفس عشان يزيد في الدم، فتزيد الأحماض، فيقل الpH ويظبط


طيب ازاي الكلى بتظبط الpH
هنفترض ان حصل acidosis
يعني الpH قليلة
يعني الأحماض في الدم عالية
تقوم الكلى ترمي H ions في البول وتسيب HCO3 القلوي في الدم ، فتقل الحمضية ويزيد الpH


طيب نفترض العكس ان عندي alkalosis
يعني الpH عالية
يعني الأحماض في الدم قليلة
تقوم الكلى تقلل إخراج H ions في البول وترمي HCO3 في البول ، فتزيد الحمضية ويقل الpH

دمتم بخير محمد سليم


النقطة التالته
ازاي اسحب عينة من الشريان

ارجوك بلاش تسحب الا لما تكون محترف ومتخصص
الوريد تحت الجلد ظاهر، انما الشريان جووووه مش باين، عشان ربنا يحميه
الوريد بياخد الدم لفوق ناحيه القلب، الشريان العكس الدم طالع من القلب للأعضاء
الدم في الوريد احمر غامق، إنما في الشريان لسه بخيره هنلاقيه أحمر فاتح اووي


اشهر الاماكن اللي هتسحب منها
radial artery
الشريان الكعبري عند بطن معصم ايدك
Brachial artery
عند ثنية مرفق الايد لجوا
Femoral artery
الشريان الفخذي جنب مفصل الورك


حضر أدواتك
قلب جامد
عقل مصحصح
سرنجة
أنبوبة فيه مانع تجلط هيبارين
قطن
كحول
لاصقة


في طريقة كنا بشتغل بيها إني أهبرن السرنجة «يعني اسحب ملي هيبارين في السرنجة وافضيه تاني واسيب قيمة 0.2 هيبارين في السرنجة واسحب على طول وادخل العينة للجهاز على طول من السرنجة» بس انسى الكلام دا