2022-06-15 12:34:01
بفترة من الفترات كنت كتير أعطي أهمية لزعل كم شخص مقرب مني
خاف كتير أحكي شي كلمة غلط ممكن تدايقهن
وعلى أبسط المواقف روح أعتذر منهن
على الرغم من إني
كنت أتناسى وأعمل تخطي لكل موقف وكلمة غلط قالوها بحقي
ممكن يكونو قاصدين المزح بس هالكلمات بتحفر بروحي
وبيعز عليي روح خربها عليهن وإنزعج..
كنت خبي وطبق المواقف المزعجة بقلبي
ومع كل موقف كنت إخترع حجة لصاحبو ومبرر
حتى وصلت للحظة كان بيني وبين الإنفجار فيها كلمة
انقالت هي الكلمة
وكانت السبب بخسارتي لشخصين بحياتي
طبعاً صرت حدا إنفعالي،عقلي صغير،نكدي ومابلقى مزح "بنظرهن"
هنن مابيعرفو إني صار مخترعلهن فوق الألف مبرر
ومتخطي كتير مواقف كان ممكن تكون ردة فعلي من بعدها قاسية كتير
مابيعرفو إني خسرت كتير كرمال ما أخسرهن
راكمت كتير مشاعر مؤذية بقلبي كرمال علاقتي الطويلة معهن
وبالنهاية
طلعت أنا المذنب والمو منيح ..
بس وصلت لقاعدة مهمة بالسلام الداخلي بتقول:
لاتعطي مبررات لحدا مهما كانت غلاوتو عندك كبيرة
لأنو لو بيبادلك نفس هالغلاوة ماكان تصرف غلط معك
لا تأجل كلمة اليوم ل بكرا
وماتخاف من خسارة أشخاص وجودهن صار مؤذي لروحك
اتخلى عن كل الشغلات المؤذية
وعلى رأس القائمة هي
الأشخاص المؤذية
مهما كانت علاقتك فيهن قوية..
لـ عبدالرزاق سيد عمر
317 viewsعبدالرزاق سيد عمر, 09:34