س: انا كنت علي علاقة بشاب من اولي جامعة لآخر سنة وكنت ببعد وار | محمد عطية - الآسك

س: انا كنت علي علاقة بشاب من اولي جامعة لآخر سنة وكنت ببعد وارجع علشان عارفة انو حرام ومرة واحدة تقدم لي شخص محترم جدا وأهلي وفقة وشاب دا رفض يكلم بابا بسبب دراسة ودلوقتي انا مخطوبة هو كويس جدا بس انا بحس بذنب انو أتقدم ليا مخصوص علشان انا مؤدبة واني مش مرتبطة اعرفة ولا وساعات كتير بحس اني لسة بحبه

ج/ تصدقي بالله ؟

أنا فعلا قرفت .. ولولا ما أحتسبه عند الله في كلمة يهديني لها ممكن تفوق حد زيك = ما كنت قدرت أفضل متحمل حرق الدم ده كل شوية من اللي بتعملوه في نفسكم !

انسي يا بنتي .. انسي اللي فات كأن لم يكن ..

ربنا أراد لك (تنضفي) وتعيشي حياة طبيعية كريمة في كنف رجل طيب .. فما ترجعيش برجليك للعك، ولو بمجرد التفكير.

لا تحكي له .. ولا تحكي لنفسك حتى .. واقطعي الصفحة دي من دفتر حياتك .. واستغفري عنها وتوبي .. وبس.

أخلصي لخطيبك وركزي على مميزاته وأبشري بالخير.

أي حاجة غير كده = هتضيعي سعادتك واستقرارك وهتكوني رفضت بإيدك نعمة ربك.

.....

س: بتخيل الي كانت بتكلمه باعتلك سؤال بيقولك انه حبها 5 سنين وسابته مع اول عريس اتقدم

ج/ هقوله لو كنت بتحبها فعلا = كنت صمتّ للوقت المناسب !

ولم تتسلل من النوافذ كلص ..

اتركها لنصيبها .. وستجد الأفضل وقت تقدر تدخل البيوت كرجل.

....

س: هو حضرتك بقيت عصبي جدًا الايام دي ليه..غ.س صلي ع النبي وإبشر!

ج/ ما هو لو ما اتعصبتش على المصايب المتكررة السيناريوهات اللي بتعملوها في نفسكم دي = أبقى بارد .. وقاعد هنا بتسلى !

.....

س: أنا بقى ياشيخ عمري ماارتبطت بحد علشان حرام وعلشان ربنا يكرمني في زوجي واتجوزت صالونات وطلع سئ جدا وعلى وشك الطلاق بعد مااتنازلت عن كل حاجه .. ليه ربنا ماكرمنيش باتقائي له وليه حصل لي كده واكيد طبعا حضرتك متخيل حالتي النفسية عاملة ازاي ليه ربنا ميخليش التقي يروح للتقي والسئ يروح للسئ

ج/ فهمك السيء ده للأسف كفيل لوحده إنك تعاقبي بسببه !

أولا: أنت لما تعففت وعملت الصح .. كان عشان ربنا يرضى، مش عشان يكرمك في زواج وغيره (ده هدف فرعي ممكن يحصل وممكن لأ).

ثانيا: ما دمت عملت اللي يرضي ربنا = يبقى ما عليك خالص من نصيبك في الدنيا بعد ذلك؛ الأصل فيها أنها مفطورة على الابتلاء ..

وما تعرفيش ربنا صرف عنك إيه بالابتلاء ده.

اوعي تندمي على استقامتك !

لعل ربنا كاتبلك خير كبير جايلك عوضا وجبرا .. ولعله بمنه مدخر لك أجرك كاملا بين يديه فتقر به عينك .. بنعيم مقيم.

ثالثا: وده مهم جدا .. ما تلوميش حد على سوء اختيارك وسوء تقديرك وضعف قدرتك على اكتشاف حاجات كتير أو تطنيشك لحاجات أكتر طول فترة الخطوبة إلا نفسك.

عموما هو نصيب .. والمهم نتعلم ونستفيد من أخطائنا ..

ومن رضي فله الرضا .. ومن سخط فله السخط.