2021-12-09 14:05:09
طيب .. لقيت وقت أسمع حوار محمد صلاح كاملا ..
والحقيقة طلعت لنفسي بهذه النقاط ..
(خذ ما ينفعك أو تستفيد منه .. وعدّي اللي مختلف معاه .. اعتراضك في التعليقات لن يغير شيئا).
١) صلاح كقصة ومسيرة وتغير حال = عبرة وآية للتدبر والاستفادة.
٢) فيه ألف صلاح (في كل المجالات) موصلوش .. وما يقلوش بذل جهد وطموح .. لكن الفرصة فعلا مجتش!
٣) لو كان الزمالك مثلا خد صلاح من الأول فغالبا كان زمانه من النمط اللي انتقده هو في اكتفائه بالسيارة والراتب والشهرة المحلية.
٤) الناجح بيعرف يستغل الفرصة ويطوع الظروف اللي خدمته لطموحه ونجاحه .. وده اللي ميز صلاح عن أي محترف تاني.
٥) ربنا بيكافئ الإخلاص وصدق السعي في أي مجال، دي قوانين الدنيا .. الحسنات والسيئات في الآخرة.
٦) النجاح ممكن ييجي مرة، ضربة حظ .. لكن الاستمرار فيه محتاج عمل مستمر ومنهج ثابت.
٧) بالتالي يا بختك لو إخلاصك وصدق سعيك واستمرار وثبات عملك ومنهجك = تريد به -في الأصل- الجنة.
٨) صلاح -رغم التطور الكبير في تفكيره وأسلوبه- يبقى الشاب الريفي بتاعنا.
٩) بالتالي هو اختار كفلاح حريص ومركز في مصلحته، مصلحته وبس (مش تنمر طبعا ولا سخرية .. أنا فلاح ابن فلاح) يكون لاعب عالمي .. له بصمة في تاريخ اللعبة .. وبس.
١٠) بالتالي لا تحملوه أي مسؤولية خارج إطار ما اختاره لنفسه .. مصلحته وتاريخ اللعبة .. وافرحوا به وشجعوه -وعن نفسي بفخر كمان إنه مصري مسلم- من خلال هذا الذي اختاره لنفسه أيضا.
١١) أيوه زي ما بتشجعوا رونالدو وميسي وغيرهم من خلال هذه النقطة أيضا .. وبتغمضوا عن بلاوي سودة في حياتهم وسيرتهم .. صلاح بعيد عنها تماما.
١٢) إجابته عن سؤال (حد هنا بيجبرك تشرب خمرة؟) هكذا كان نص السؤال .. ومن خلال سياق الكلام والنقطة ٨ ، ٩ = شايفها عادية جدا .. ومش محتاجة كل اللي اتعمل في وسائل الهري الاجتماعي.
١٣) المقارنة هنا بنموذج أبو تريكة لو فهمت النقاط اللي فاتت = هتعرف إنها مقارنة ليست في محلها أبدا.
١٤) استفدت على المستوى الشخصي مسألة تجاوزه لحاجز اللغة وهو تعليم حكومي مجاني عادي جدا -مع الاستزادة والمجهود-، نفس التعليم اللي أنا مسنود عليه برضه في سعيي لتجاوز نفس الحاجز هنا .. والحقيقة لقيته سند مش قليل أبدا.
١٥) استفدت من نقطة بذله كل هذا الجهد الذي تعرض له في حديثه مش في التدريب بس، لكن في التأمل والتركيز وأسلوب الحياة .. عشان كورة في الآخر!
وأسأل الله العفو والمدد .. آمين.
الخلاصة:
نقدر دايما ناخد اللي نستفيد منه وينفعنا .. ولو بمجرد إنه يفرحنا ..
ونحط كل حاجة في نصابها بدون إفراط ولا تفريط .. ولا تشنج ولا تنطيط!
والحكمة ضالة المؤمن.
وشكرا
3.4K views11:05
م
