القلق زاد وكثر نوحي وديتة  ولمت  روحي تأخر  كثرن  جروحي        | الشاعر احمد عباس الحساني

القلق زاد وكثر نوحي
وديتة  ولمت  روحي
تأخر  كثرن  جروحي         ابوفاضل
~~~
أسولف  وية روحي وين اخو گلبي - تأخر ليش -  ومتاني
يجي لا ما يجي اي خاف يتأخر - قلقت اهواي -  ماجاني
أنا المتعوب گلبة او تعبة خوانة - من يمشون - خواني
بقيت أصفچ بدية راح أبوفاضل - وحدي اعضيدي خلاني

أعز  إنسان  بإخواني    
تأخر  ليش ما  جاني
اباب الخيمة ومتاني         ابوفاضل
~~
سمعتة ايگول اشوف احسين اتمنة - لكن منطفي شوفة
أصعب  موقف ايمر بالاخو  لمّن - تروح اخوانة واتعوفة
لگيتة  ايريد يمسح  دم  البعينة - و اهو متگطعة اچفوفة
بشر دم اولحم ما أحمل الفرگة - شلون اعضيدي ماشوفة

وجهة  ضايع  ابدّمة
سهم بالعين ويلچمة
فرصة  لو متت  يمة          ابوفاضل
~~~
ترة العباس   روحي  وگلبي  الثاني - وچنة نگعد ابفيّة
اوصلت يمة وگلت لا هذا مو هوة -  شعجب متغير اعلية
گوم  لخاطر  الخوة  يبو  الخوة - عدواني اشمتت بية
يبعد  الدگة  البگلبي  يبعد  أهلي - يبعد الروح والرية

أكثر    من    إخو    انتة
گلب واضلوعي حاضنتة
دمع  بين   الجفن  شلتة       ابوفاضل
~~~
اگعدت يمة وندهتة ياگمر اگعد - تعب حيلي ياعمري 
أصيحن يابوفاضل ماكو رد منّة - كسر گلبي وكسر ظهري
أصيح وصوتي ضاع اوما يجاوبني-وبالعبرة اختنگ صدري
طلعت روح اخوي اومات بين ايدي - عفية وما خلص صبري

اوگفت بس الظهر محني
اجدامي     ما     يعينّنّي
صحت  راح  الگمر   مني        ابوفاضل
~~~~
ارجعت لخيامي بالي كله يم زينب - حيرة اشلون أگللها
أگلها  هسة  يرجع  لو  أگلها  مات - الچان بعينة شايلها
راح   الماكو   بالدنية  اخو  مثلة - راح الجاب محملها
ترة صعبة أخوك ايموت بين ايدك - زينب مات كافلها

أحاول اخفي بدموعي
وإيدي لازمة اضلوعي
تعرف هيّة  موضوعي           ابوفاضل
~~~~
أحمد عباس الحساني
{ث.ابوفاضل}