#للانصار ع هاي الليلة أنصار حسين .. يم خيمة زينب ملتم | الشاعر عمار العيساوي الكربلائي

#للانصار ع






هاي الليلة أنصار حسين .. يم خيمة زينب ملتمين
يم خيمتها الراية ايهزوها .. و المگصد بس كون يطمنوها
. . . . . . . . . . . . . . . . . . . . . . . . .

تعنت زينب الانصار وتحزمت ابشيمتها
وهز الراية بيمينه حبيب اباب خيمتها
وهوس ها يهل غيره الما تتثانة جلمتها
جلمة لزينب احجوها تصبر من هضيمتها

منهو اول واحد بالميدان .. يفدي بنحره حسين العطشان
لاجل حسين اركاب ايضحوها .. و المگصد بس كون يطمنوها
. . . . . . . . . . . . . . . . . . . . . . . . . .

عد عيناج كلها بصوت واحد والعهد واحد
وباجر كل نحر منهم وية الموت متواعد
وناده نافع ابن هلال الباجر للحرب گاصد
خل من هسة انه وياه نربط ساعد ابساعد

خل تنظر زينب شنهو الراي .. احنة الانصار العفنه الماي
غايتهم بدماهم كتبوها .. و المگصد بس كون يطمنوها
. . . . . . . . . . . . . . .. . . . .

بعلو صوته هتف عابس انه المجنون سموني
انه الليلة يا زينب ابد ما تغمض عيوني
اتاني الفجر و بطرته اناديهم يلاگوني
اذب درعي واذب سيفي واراوي العسكر اجنوني

بصدري اتلگه سهام وما ميل .. دون الصدره ايرضوا بالخيل
خل من عدنا اصدور ايرضوها .. و المگصد بس كون يطمنوها
. . . . . . . . . . . . . . . . . . . . . .

برير وجون وابن القين وكل انصار ابو الاكبر
طمنوا زينب وكتبوا فدائيين بالمنحر
شنهو الموت قليل الموت دون حسين نتوذر
يوذرونة ويرجعونه ويخيرونه ونعيد الكر

لو مو موتة يصيرن الفين .. دون حسين انحس امقصرين
كلهم هاي الدنيا يطلكوها .. و المگصد بس كون يطمنوها
. . . . . . . . . . . . . . . . . .

امني يا بنت حيدر ما نخلف عهد للدين
وباجر كلنه بالارواح لاجل القائد امضحين
امنه الامام حسين دنيا واخرة اموالين
ولو نضمن الف جنة قيمتها بوجود حسين

زينب سمعت حجي الانصار .. عرفتهم تربات الكرار
أرواح اعله الموت ايروضوها .. و المگصد بس كون يطمنوها
. . . . . . . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي





#لك_الفداء_سيدي_اباعبدالله
#خدر_الفواطم_لنشر_القصائد_الحسينيه

____
لمن يجد صعوبة بالحن اطلبه من



@moatmed2