#مسلم_بن_عقيل ع اجيت بقافلة عشقي اسيرك .. امهد الكوفة تستقب | الشاعر عمار العيساوي الكربلائي
#مسلم_بن_عقيل ع
اجيت بقافلة عشقي اسيرك .. امهد الكوفة تستقبل مسيرك
انه بحُسباني خادم بس حسابك .. يبو الاكبر يسميني سفيرك
. . . . . . . . . . . . . . . . . . . . . . . . .
عشك خادم عشكتك وامتثل لامرك
ورحت للكوفه هايم سيدي بسرك
بسمه العصمه إمام ومكتمل بدرك
وانه المتفاني عمري مقدمه لعمرك
اطوف ابعصمتك واشرب عذب صبرك
برحابة صدري ارخص نحري يم نحرك
ابن عمي وولي امري واميري .. يتارس گلبي وعيوني و ضميري
محبتك بوصلة رُشدي بطريقي . . وارافگ اسمك المُهدي بمسيري
. . . . . . . . . . . . . . . . . . . . . . . .
دخلت الكوفة و الناس التبايعني
لان باسمك اجيت العالم اتحبني
هاني ابلهفه يتلگاني و يظمني
اعله ريحة حيدره ميثم يجي يشمني
محبتهم الك كامت تحاوطني
وسليمان و حبيب وصحبك اتحفني
احس كل واحد ايهيم بصفاتك .. ويقدم الروح الك من گد غلاتك
وانه المتربي بين ايدك واسولف .. نفس حچيك وابسمل بسملاتك
٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠ ٠
جره اللي ما جره من غدرة الكوفة
وعليّ عسكر تحاوط مشهر اسيوفه
شفت طوعه علي دمعتها مذروفه
وتحرم بالحزن والمصرع اتطوفه
الكثرة تغلب الشجعان معروفه
وانه الوسط العساكر زارع الخوفه
اسل سيفي وترد خوف الجحافل .. وانه بيا حيدر اتقدم واقاتل
الحسن علمني اكرم ديني روحي .. واشد عزمي واصول بيا بو فاضل
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عطش سيفي برگاب العسكر ارويته
انه الچف يمنتي من علي تربيته
اوگفت جن عمي حيدر واكشخ بصيته
انه العزمي بعزم عباس شديته
خطيت و عسكر ابن زياد حاچيته
يمن خنتوا بمحمد واهل بيته
اشتريتوا جهنم ابسعر الخيانه .. عبيد الدنيا بالذل والمهانه
توابع للشياطين ابعماكم .. ضماير ميته و تحلل دمانه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
خضت ساعة نزال ورضخت العسكر
وابطال النزالي ادعوها تتعذر
قلعت اول كتيبه چن حصن خيبر
ومثل صولة حُنين امعلم اعله الكر
ولكن بالغدر طحت ابمكيدة شر
وانه البيه الضمه وثگل الحديد اثر
رسالة ابمدمعي رد لا تجيهم .. الغدر عدهم كذب اصبح حچيهم
وعد قطعولي بس خلفوا وعدهم .. خيانتهم تفوق اعله وعيهم
. . . . . . . . . . . . . . . . . . . . . . . .
خادم اهل البيت عليهم السلام
عمار العيساوي الكربلائي
#لك_الفداء_سيدي_اباعبدالله
#خدر_الفواطم_لنشر_القصائد_الحسينيه
____
لمن يجد صعوبة بالحن اطلبه من
@moatmed2
