#كعدة_للعباس ع ماي النهر راد .. من جفك امراد والمشرعة تريد | الشاعر عمار العيساوي الكربلائي

#كعدة_للعباس ع



ماي النهر راد .. من جفك امراد
والمشرعة تريدك .. تتروة بوريدك
بزودك يعباس
. . . . . . . . . . . . . . .

يلي محتل الشريعه والنهر ممتلك مايه
من سماء اخيام اخوك حسين مرسول اويه رايه
ومصحفك جود التحمله وجفك ال بالماي آيه
ضويت والجيش انطفه
وابنيت كعبه امن الوفه
امن اهل الكهف عندك صفه .. استوطنت وسط المنايه

سيفك السجّيل .. جفك ابابيل
والتِرجمه تصيبه .. ما تخطه تصويبه
بزودك يعباس
. . . . . . . . . . . . . .

من صدى زينب تردد هِمس باذنك صوت حيره
ومن عرفت بهظم اختك دخنت ابراسك الغيره
وانبعث وحي الاخوّه بينك وبين الاميره
جانت اذا تطلع امس
تصير الها ظل امن الشمس
بس كلي ياخوها شتحس .. لو مشت اختك اسيره

بيديها الحبال .. مابين الرجال
المحد كشف ظلها .. تريدك ترد الها
بزودك يعباس
. . . . . . . . . . . . . .

يلي جفك جف ابوك المرتضى و تشبه صفاته
منهو مثلك حيد ضيغم أسد متكفل خواته
الجعفر الطيار عمك جسدت بالطف ثباته
عمك على الرايه سِعه
وجفين منه امكطعه
مثله هون عالمشرعه .. اجفوفك وموتك مماته

يا ثابت الراي .. صورتك بالماي
والصوره معكوسه .. المي خدك ايبوسه
بزودك يعباس
. . . . . . . . . . . . . . . . . .

يا عضيد حسين بالطف سند صرت انته العضيدك
وفَرزَن بعينك شهامه حين حط الرايه بيدك
وسِمع جودك يابو فاضل بسمك يصيح و يريدك
بعيون الموادع صور
متجسده فوك النهر
تلتقي الشمس اويه الكمر .. والخضاب ابدم وريدك

من هِون جفين .. هل دمع الحسين
ومن ينكسر ظهره .. بس انته التجبره
بزودك يعباس
. . . . . . . . . . . . . . . .

يالهويت اعله الشريعه كمر ومخضب ابدمك
جن اجتي تريد تحضر فاطمه الزهراء يمك
اتحظنك اتظمك تكلك يولدي هاي آنه امك
من ام البنين العذر
يوليدي يمجبر الكسر
عالشاطي ابنيلك قبر .. وعالفرات انكتب اسمك

اسمك يعباس .. للخوه نبراس
يالوافي لعضيدك .. خط الوفه بجيدك
بزودك يعباس
. . . . . . . . . . . . . .

خادم اهل البيت عليهم السلام
عمار العيساوي الكربلائي





#لك_الفداء_سيدي_اباعبدالله
#خدر_الفواطم_لنشر_القصائد_الحسينيه

____
لمن يجد صعوبة بالحن اطلبه من


@moatmed2