2023-03-09 21:00:09
ريلاكس 3
الMood
تقلب المزاج مشكلة كبيرة بتواجه النساء بنسبة اكبر من غيرهم..
يعني ايه تقلب المزاج وليه بيحصل وازاي احل المشكلة دي...؟
ده اللي هنعرفه مع بعض ف البوست ده
خلونا نوضح الأول ازاي اعرف اني شخص مزاجي او متقلبه المزاج او مودي... ايا كانت المسميات
الشخص اللي عنده المشكلة دي ممكن يبقى سعيد جداً في وقت وفاجأة وبدون مقدمات يحس انه تعيس وعاوز يعيط...
ممكن يبقى هادي وحاسس بروقان وفاجأة متعصب جدا وزهقان..
وهكذا من حالات شعورية غير منضبطة
طيب ايه الأسباب؟
طبعا معرفة السبب مهمه جدا علشان هتخلينا نعرف كيفية التعامل مع هذه المشكلة
1- اضراب الهرمونات
يعني حضرتك قبل الدورة الشهرية او بعدها او في فترة انقطاع الحيض او في مرحلة البلوغ او فترة الحمل...
بتلاحظي في الاوقات دي تغير كبير ولخبطة في مزاجك..
2- التعب والإجهاد
لو انت متعبه بدنيا او ذهنيا او حاسه بضغط واقع عليك ده هيأثر على مزاجك بشكل ملحوظ
(هنتكلم عن الضغوطات في بوست قادم بالتفصيل ان شاءالله)
3- اختلاف المواسم
في ناس مزاجها بيتأثر في موسم عن موسم اخر يعني في ناس مزاجها في الشتاء مثلا بيبقى متقلب بصورة اكبر من الصيف وفي ناس العكس... مهم انك تعرفي مزاجك بيتأثر من ايه..
4- اضطراب الانسولين (مستوى السكر)
لو نسبة السكر في الدم ارتفعت او انخفضت بشكل غير طبيعي ده بيؤدي الى تقلب مفاجئ في المزاج..
في اسباب تانية مرضية بس انا هكتفي بالأربع اسباب دول لانهم هما الشائعين...
مهم اوي تعرفي الاسباب وتحدديها علشان تقدري تكوني دعم لنفسك في الفترة دي وتتبعي الحلول المناسبة اللي هنتكلم عنها...
قبل ما نتكلم عن حل المشكلة عاوزاك تعرفي ان الشخص المزاجي ده بيكون حساس جدا اتجاه اي موقف او حدث.. حتى لو الحدث ده مش خاص بيه يعني ممكن واحده صاحبتك تحكي لك مشكلتها فتلاقي نفسك اتأثرتي ومزاجك اتغير تماماً... او ممكن تشوفي حدث على السوشيال ميديا فيأثر على مودك طول النهار...
تعالوا نشوف الحلول
اولا: الحد من وقت المزاج المتقلب..
مهم تحددي الوقت اللي مزاجك فيه متقلب وتحاولي تفكري في اشياء جميلة ومواقف حلوه عيشتيها علشان نحد من الوقت ده -يعني- انا حاليا مودي مش حلو خلاص هتصل بصديقة ليا... اخرج اعمل حاجه بحبها.. ارسم... اعمل اي نشاط بحبه علشان احد من الوقت اللي بيكون فيه مزاجي مش تمام
ثانيا: اوعي تتشحني
ازاي انا لسه قايلالك انك شخصية حساسة بتتأثر من الاشياء حواليها... فخليكي مركزة دايما انت بتابعي ايه وابتعدي عن المؤثرات اللي ممكن تأثر عليك سلبا قدر الإمكان...
وخليكي منتبهه كمان لطريقة افكارك لانها ممكن تكون بتشحنك بردو وانت مش واخده بالك...
ثالثا: الأكل الصحي والرياضة
دي من العوامل اللي هتفرق معاك جدا في ضبط مزاجك وهيظبطوا كمان مستوى الانسولين اللي اتكلمنا عنها...
رابعا: الروتين
ابتعدي تماما عن الحياة الروتينية... حاولي تنوعي نشاطاتك وتغيري وتنجزي وتحققي اهداف وتتعلمي حاجات جديدة لانك لو حسيتي برتابه في يومك هيأثر اوي على مزاجك...
بس كده دي اهم الطرق اللي ممكن ببساطة تساعدك على ضبط مزاجك...
ده هيساعدك انك تعرفي نفسك اكثر وتعرفي ازاي تتحكمي فيها وازاي تتعاملي في الوقت اللي مزاجك فيه متقلب بدون ما تلجأي للانفعال السلبي على الاشخاص اللي حواليك...
اشوفكم على خير
مي محمود
نسمح بإعادة الإرسال مع الاحتفاظ بجميع حقوقنا أسفل كل موضوع
جروبات التميز
*كوني أنثي*
بقيادة المدربة
*أ.مي محمود*
*ماجستير صحة نفسية*
للإشتراك *واتس اب*
الرقم
*00201128497494*
كوني انثي
*فيس بوك *
https://www.facebook.com/groups/986982618000858/
كوني انثي
*تليجرام *
https://t.me/connieansa
كوني أنثي
*انستقرام *
http://instagram.com/connieansa
إدارة كوني أنثى
تتمنى لكم الفائدة والمتعة
#ادمن
126 views18:00