2023-03-12 21:08:58
#ريلاكس 4
في حب ضغوط الحياة
احنا النهارده هنبقى ريلاكس خالص بعد ما نتكلم عن الضغوط بمنظور مختلف تماما عن المعتاد...
كلنا بلا استثنى عندنا ضغوط في حياتنا واللي يقولك تعالي اعلمك ازاي تتخلصي من ضغوطاتك سيبيه واجري لأن ما فيش حياة خالية من الضغوطات غير في عالم الأحلام
احنا دايما بنتعامل مع الضغوطات كأنها البعبع اللي مهدد حياتنا...
بنتعامل مع الضغوطات كأنها هي السبب في وتيرة احزانا ومتاعبنا...
والحقيقة ان الكلام ده مش صح لان لولو وجود الضغوطات في حياتنا كنا بقينا بدون اي مهارات
يعني ايه الكلام ده
خلونا ناخذ مثال
دلوقتي لو انا عاوزه اطلع رخصة قيادة هدخل الإمتحان وهيبدأو يمتحنوني في «العقبات» يحطوا بقى مطبات صناعية والذي منه واكون مطالبة اني اتخطى كل هذه العقبات ببراعه علشان انجح واخذ الرخصة وابقى اكتسبت مهارة جديدة
هو ده بالظبط اللي بيحصل في حياتنا الحياة ان مكنش فيها ضغوط عمل مش هتعرفي تتعلمي وتكتسبي مهارات عديدة خاصة بهذا الضغط زي مهارة ادارة الوقت والتواصل الاجتماعي.... وهكذا
لو معندكيش ضغط في حياتك الاسرية مكنتيش اكتسبتي مهارات زي مهارة الحوار البناء و تحليل الشخصيات وازاي اكون افضل نسخة مني وهكذا...
فالفكرة الجوهرية اللي المفروض تتعاملي بيها مع ضغوطات حياتك انك تفتحي لها ذراعيك وتحمدي ربنا على وجودها وتدعي ربنا انه يلهمك البصيرة في كيفية التعامل معها
صدقا لو غيرتي فكرتك هترتاحي بنسبة كبيرة جدا اصل الإنسان الصحيح نفسيا مش هو الانسان اللي حياته خالية من الضغوطات لا ابسلوتلي ده انسان بيعاني من ضغوطات كثير بس عارف ازاي يتعامل بشكل صحي مع الضغوطات والمسؤوليات دي..
انا سامعه واحده بتقولي بس كثرة الضغوطات دي بتكون متعبة جدا وبتحسسنا بتوتر وقلق وتعب و إجهاد مستمر...
معاكي حق جدا وده علميا شئ صحيح لكن الصح اننا نتعلم كيفية الحد من هذه الأعراض بشكل صحي مش الخوف والفزع والهلع من الضغوط
تعالي اقولك على تمرين لو طبقتيه بجد انا بوعدك ان هتحققي راحة وسلام بنسبة عالية جدا
السر في الصلاة ايوه الرسول صل الله عليه وسلم كان بيقول لسيدنا بلال "ارحنا بها يا بلال"
خدي الجملة دي واكتبيها وخليها شعارك من النهارده...
لكن تعالوا معايا في جولة سريعه اوضح لك اكثر ايه اللي بيحصلنا بالظبط من بداية الاذان لما بنسمع الاذان ونردده احنا عقلنا بيعمل استوب لكل حاجه ويبدأ يركز ويبقى في حالة سكون واستعداد وبعدها تأتي مرحلة الوضوء وكأنك بتدلكي اعضاءك بماء بارد يسحب منك شحنة الضغط وسبحان الله اللي بيوضح الموضوع ده حديث بن مسعود رضي الله عنه "تحترقون تحترقون فإذا صليتم الصبح غسلتها ثم تحترقون تحترقون فإذا صليتم الظهر غسلتها ثم تحترقون تحترقون فإذا صليتم العصر غسلتها.... الى اخره"
وكأن الحديث بيصور حالة ارتفاع الادرينالين اللي بتكون عندنا من الضغوطات والمعاصي وتأتي الصلاة لتخفف عنا وتجعلنا نهدأ...
ثم تأتي إقامة الصلاةوهي حالة من شد العضلات المشحونة بالتوتر وسحب الادرينالين الزائد في الجسم وشد الانتباه من الفص الشمال للفص اليمين...
وتبدأي تتلو كلام ربك فتزيد السكينة وتزيد الراحة ويتحقق الاطمئنان والهدوء...
الله كفيل بك وبضغوطاتك وبمشاكلك وبرزقك فمتضيعيش الدقائق الجميلة دي في التفكير في اي امر من امور الدنيا هو حسبك
عاوزين من النهارده نصلي بخشوع وباستشعار عظمة الخالق صدقا هتلاقي راحه اكثر مما تتوقعي
دمتم بخير ومعذرة على الاطالة
منتظره تطبيقاتكم
مي محمود
نسمح بإعادة الإرسال مع الاحتفاظ بجميع حقوقنا أسفل كل موضوع
جروبات التميز
*كوني أنثي*
بقيادة المدربة
*أ.مي محمود*
*ماجستير صحة نفسية*
للإشتراك *واتس اب*
الرقم
*00201128497494*
كوني انثي
*فيس بوك *
https://www.facebook.com/groups/986982618000858/
كوني انثي
*تليجرام *
https://t.me/connieansa
كوني أنثي
*انستقرام *
http://instagram.com/connieansa
إدارة كوني أنثى
تتمنى لكم الفائدة والمتعة
283 views18:08
ك
