#تربية_الاطفال كلما اكول كافي ننزل عن اطفال حديثي الولادة وخل | t.me/doctoristishara

#تربية_الاطفال

كلما اكول كافي ننزل عن اطفال حديثي الولادة وخل ننطلق لعمر 4 و5 وفما فوق
ارجع اشوف جرائم وحرفيا جرائم تمارس ضد الاطفال بعمر مادون السنة

طفلك في السنه الاولى من حياته هي اهم سنه في حياته كلها
هي السنه الذهبية
وستؤثر على كل حياته لاحقا
اذا انطيتي حقه وحقه كامل
حتحصلين طفل متزن ، مستقر ، ذكي، شجاع
اذا ظليتي تتهزمين من حقوقه بمختلف المسميات حتحتاجين من 3 الى 7 سنوات حد ادنى من الاصلاح والترميم
ويا تصيب يا تخيب

زين شنو حقه؟
حقوقه بسيطه جدا
لكن الزامية جدا
وبنفس الوقت ذات رتيبه مكرره ومكرره ومكرره
واهمها
واهمها اطلاقا
هي التواصل الجسدي // المعنوي بين المربي والطفل
يعني رب العالمين من خله معدته صغيره وكلساع يجوع ، مصار هالشب عبث!!
هالشي صار حتى الام كلساع كلساع تتقرب من الطفل وتشيلة وتحضنه وترضعه
كلنا اكو امهات متكدر ترضع طبيعي امنا بالله
شرحنا وعدنا وكلنا يا اختي يا امي رضعي اي طريقة شرط
شرط
شررررط
تخلي بحضنج
وعينج بعينه
والله العظيم مو صعبة

اي اوكي هواي وتكرر باليوم هواي
بس هذا ابسط حقوقة
وجريمة نكراء
جريمممممة
نحرمه منها

يوميه مطلعين منتجات يوميا مخترعين افكار سخيفة وعذرا على الكلمة كل هدفها ان يبقى الطفل اطول فتره ممكنة بعيدا عن حضن الام
من اختراع مسند الرضاعة الاختراع الاجرامي الي مدري شلون مصرين يستورودة والامهااات تشتتررررري خاطر تشمر الممه بحلك الطفل
يختنك، يموت ، يشهك
مو مهم
المهم متبقى لازمته

واليوم شفت هذا المنتج التافه الاخر

يعني ما معقول شنو هالتكاسل والعجز !
يعني لهدرجه ماكو صبر ان يتعلم الطفل يلزم وممكن نخلي شوي يرضع لوحده ؟؟
قبلها لازم نعتبرة ريبوت نحشي حليب شلون ماجان باي طريقه باي وسيلة واهم شي مو بحضن امه!!

ياريت لو الامهات توعى شويه وتبطل تشتري كلشي تشوفه وتفكر بطفلها قبل ما تفكر بشغل البيت الي عمره محيخلص
ياريت لو تفكر بطفلها الي هو حاليا ماريد غير بس حضن
شوي مشاعر حب واحساس حتى ينمو كطفل سوي مستقر انسان عنده اتزان
مو ريبوت ميدي شنو هي المشاعر اصلا!

ملاحظة : عقل الطفل ماينمو بشكل طبيعي اذا ما استقبل هرمونات الحب وما استشعر الاستقرار والامان الي هو بالنسبه اله يتحقق بمجرد وجودة بحضن امه
هالله هالله باطفالكم باول سنه بحياتهم

د.اسماء اسماعيل البدري