الانتقائي #picky و منو ما عنده هذا الطفل اللي بس ياكل تمن و ل | إستشارة طبية
الانتقائي #picky و منو ما عنده هذا الطفل اللي بس ياكل تمن و لبن فقط او بس بيتزا هل هذا معناه اكعد و اسكت و ما اتدخل ؟ لا طبعا لازم نحاول و نظل نحاول بس اهم من كلها الصبر و التظاهر بعدم الاهتمام بالموضوع لان يعشقون شي اسمه عناد خلونا نستكشف شون نخلص او نقلل الانتقائيه ١. الروتين اهم شي الروتين فطور وجبه صباحيه غداء عصرونيه عشاء هيجي تتقسم الوجبات مع الاحتفاظ بتوقيتاتها ما اكل و ما عجبه ما اضغط عليه انتظر للوجبه التاليه يطلب وجبه اضافيه لا اسفين ممكن انطيه فاكهه او خضروات يسد بيها جوعه بس الوجبه تتقدم بوقتها حتى يعرف بالمره القادمه انه الاكل ما ينتظره حافظوا على وقت نوم ثابت وقت استحمام ثابت ٢. بلا كتل و ضرب و عصبيه الاكل تجربه اجتماعيه خليك ريلاكس و مرتاح كلما تكون مرتاح اكثر كلما طفلك ياكل اكثر اجبارهم على الطعام لا ينتج عنه شيء الا التوتر ٣. انت لا تكول على اي اكل مو طيب و اكل قبله خليه يتعلم منك نص الاكلات اللي ما يحبها اطفالكم لو انتوا تجربوها ما راح تحبوها انت ما تحبين البيض و تعال الا تاكل بيض لييييش؟ بنتي الكبيره عمرها ١٢ سنين و ما تحب البيض و اني ما احب البيض عادي و شنو يعني ؟!!! دكتور عفيه ما ياكل بيض ! و لا ياكل شنو المصيبه بالموضوع ! علميه انت تكونين مثال ابدا لا تكول على اي اكله ما طيبه حتى لو ما تحبها ممكن هو يحبها ٤. من تجيب الوجبه و تقدم الاكل قدم الوجبه اللي ما يحبها اولا دائما انطيها بكميه جدا قليله بالبدايه كان تكون بحجم لقمه واحده فقط ٥. دائما صغر حجم الطعام قدميه بطريقه كلشي صغير خصوصا الطعام اللي ما يحبه ٦. انطي خيارات متعدده من انواع الطعام المختلفه و دائما قدم الشي مثل ما يحبه مثلا يحب الاكل مقرمش قدم الطعام مقرمش يحبه مهروس قدمه مهروس ٧. قدم الاكل اللي يحبه يوميا و عده بطريقه تدخل بيه مختلف العناصر الغذائيه اكيد ما اعرف اعلمكم كيفيه الطبخ بس البيض اذا ما حبه تكدرين تخليه بالكيك او المعجنات ما يحب الحليب نكدر نخبزه بالمعجنات و هكذا ٨. خليه يشارك باعداد الطعام او ترتيب المائده ما تتخيلون شكد تنطيهم طاقه ايجابيه و تخليهم متحمسين للاكل ٩. ابدا لا تهدده و لا تضربه و لا الا تكمل صحنك !! اكره جدا هذه الطريقه تنطيهم ذكرى سيئه عن الطعام و يكرهون الاكل الى اخر يزم بعمرهم اسف لازم اكولك انت مجرمه اذا جبرتيه و عيطتي عليه انت مذنبه الاكل اختيار مو جبر دائما من يرفض الاكل اخذي نفس طويييل و ارتاحي و الله كريم فترة و تمر كانت بنتي الاولى مو انتقائيه و انما كلشي ما تاكل و الان الحمد لله هي تدعو اخوانها لتجربه كل شيء جديد ١٠. حبيبي اخذ عضه وحده مو بس صغر حجم الوجبه الجديده بس خليه يجرب عضه وحده فقط و شويه شويه تزيد و يحب طعم الاكل اخر ملاحظتين: قطعه شوكولاته صغيره تسد نفسه ٣ ايام لا تنطيه الاكل كمكافئه ابدا يعني تستخدم وياه طريقه اذا اكلت قرنابيط انطيك جبس !! العلم و التجارب تكول انه هذه الطريقة سيئه على المدى الطويل
