و رحت للطواريء و ما سوو شي لان الطفل مصخن ! طول فتره الاقامه | إستشارة طبية
و رحت للطواريء و ما سوو شي لان الطفل مصخن ! طول فتره الاقامه الدوريه و القدمى و البورد ما ورد في يوم اب او ام للطواريء لان ابنهم مصخن ! بس هسه دا اسمع من مراجعيني و من بوستات الفيس بوك انه اخذنا الطفل لان مصخن للمستشفى !! زين ليش ؟ علمود تحميله لو علمود كماده! الحراره معناها جسم الطفل دا يقاوم و الحراره ما تسبب ضرر على الدماغ الا اذا ارتفعت اكثر من ٤١ درجه اللي هي ما ممكن تصير الا بحالات خاصه بعد التخدير اما الحالات اللي سامعيها و صار بيها تلف بالدماغ فهذه حالات ارتفعت بيها الحراره لان صار عند الطفل سحايا اذت الدماغ مو لان ارتفعت حرارته ! زين اوكي ما نروح للطواريء بارتفاع الحراره شنسوي ؟ اولا نتاكد من عمر الطفل اذا اقل من 3 اشهر للطواريء اذا الطفل ما يشرب صار ١٢ ساعة اذا الطفل خامل و ما يتفاعل وياك اذا عنده قيء شديد او اسهال شديد او ضيق تنفس شديد هنا نروح للطواريء طبعا
زين اعترض شويه و اكول زين ما ممكن ينشمر الطفل؟ و اكيد اضيف معلومه انه الشمره تصير بالارتفاع المفاجيء و النزول المفاجي للحراره و مالها علاقه بدرجه الحراره ٣٩ او ٤٠ و انما الها علاقه بسرعه الصعود او النزول للحراره زين اوكي شنسوي ؟ 1. اول شي نقيس الحراره ممكن ما مرتفعه حراره الطفل و بلا احاسيس و مشاعر قيسي الحراره اولا 2. نراجع بوست الحراره لا تحفظون و لا تزيدون نص شكد يطلعلك هو الرقم بلا اضافه نصف الطفل يعتبر مصخن اذا طلعت حرارته 37.2 بدون ما نضيف نص او نشيل نص 3. نبدي ننطي تحميله باريستول بس على شرط نعرف الاوزان يعني مو ننطي تحميله لطفل وزنه اقل من ٨ كيلوات !! و هي تحميله ام ال 125 و لا ننطي تحميله ام ال 250 ملغرام الا اقل وزن للطفل هو 17 الى 18 كيلو و ما ننطي تحميله ام ال 300 الا وزن الطفل اكثر من 20 كيلو 4. انطيت تحميله بعد ٣ او ٤ ساعات بعدها الحراره ما نزلت تكدر تنطي بروفين الا اذا طفلك عنده تحسس قصبات او ربو فهنا تستخدمه بحذر و الافضل بعد استشاره الطبيب 5. بعد ساعه او ساعتين من الخافض و بعدها الحراره ما نزلت بس الطفل فرحان و يلعب و يريد نغسله ندخله نغسله جسمه و راسه بالحمام و نخفف ملابسه و نخليه يشعر بالراحه اهم لائات نكولها لا تسالين اذا طفلك اقل من ٣ اشهر و صخن راسا للمستشفى ما يحتاج تسالين لا للفولتارين للاطفال بدون وصفه طبيه لا لابر الباريستول و سوء استخدام جديد لا لشراب الالتهابات دون وصفه طبيه
