اكو اشخاص من يزيلون الشعر يعانون من نمو الشعر الداخلي ، يعني | إستشارة طبية
اكو اشخاص من يزيلون الشعر يعانون من نمو الشعر الداخلي ، يعني الشعرايه تنمو جوه الجلد وما تطلع على سطح الجلد .وخاصه منطقه اللحيه عند الرجال ، منطقه الساقين عند النساء، المناطق الحساسه عند الرجال والنساء. بس ممكن يصير باي مكان بالجسم مثل الابط والذراعين والظهر.
شنو انواعه نمو الشعر الداخلي :
١/ ممكن يجي بشكل حبوب ملتهبه كبيره وخاصه نشوفها منطقه اللحيه عند الرجال والمناطق الحساسه تحت الجلد هنا النمو يكون داخل الحويصلة
٢/تجي بشكل حبوب لون الجلد ومرات لونها احمر ملتهب حجمها صغير واكثر شي نشوفها منطقه اللحيه الي موجوده باعلى الرقبه وايضا نشوفها ب العانة وبالساقين . هنا الحبوب تكون بارزة مو تحت الجلد يعني خارج الحويصلة
. هذوله النوعين يسببون التهاب الحويصلات الكاذب وكذلك التهاب الحويصلات.
٣/ الشعره تنمو جوه الجلد .تكون واضحه بس تحت الجلد وما تسبب حبوب او احمرار او التهاب مجرد نمو تحت الجلد ونشوفها هوايه بمنطقه الساقين وخاصه البنات.
شوكت تصير حالات نمو الشعر الداخلي : ١/ اذا الشخص بشرته دهنيه ٢/ شعره كيرلي ٣/ تقنية ازاله الشعر :
حلاقة قريبة ع سطح الجلد او عكس اتجاه الشعره او الحلاقة ع جلد جاف
وايضا الاشخاص الي يستخدمون مكائن مثل مكينه براون وغيرها والي مرات تسبب عند البعض شعر ينمو تحت سطح الجلد لان يبقى جزء من قطع الشعر تحت الجلد
الشمع بي هواي آراء اكو اشخاص الشمع ما يسبب شي واكو يسبب نمو الشعر تحت الجلد
العلاجات :
١/ لازم قبل ازاله الشعر تستعمل ماده مرطبه لمده ٢ دقيقه مثل كريم حلاقه وبعدين تزيل الشعر . ولازم مو قريبة ع سطح الجلد وخلي اتجاه الموس بكل الاتجاهات وليس باتجاه واحد . ولازم ما تشد الجلد اثناء الحلاقه . الافضل استعمال موس كهربائي افضل من الحلاقة وتجنب الشفره حاده جدا وايضا وره كل حلاقة تنغسل زين .
استخدم كريم بي ماده(eflornithine) هذه تقلل نمو شعر . بعد الازاله ، انتظر ١٥ دقيقه وخلي الكريم واتركه اقل شي ٤ ساعات قبل ما تغسله . يستخدم مرتين باليوم لمده لا تقل عن ٨ اسابيع . وطبعا افضل علاج هو ازاله الشعر بالليزر . والليزر يختلف عن IPL لان ممكن يرجع الشعر يطلع من جديد وبكثافه اكثر . ولازم نعرف انه الليزر بي انواع منها اندياك والكسترايت ودايويد
وايضا لازم نعرف احنا من لون الجلد حتى ما يصير اسمرار بعد الليزر .
