اكتبلكم كم ملحوظه عن ارتفاع الحراره فقط اولا ليش ترتفع درجه ا | إستشارة طبية
اكتبلكم كم ملحوظه عن ارتفاع الحراره فقط اولا ليش ترتفع درجه الحراره؟ الحراره يرفعها الجسم حتى يبدي يقاوم البكتريا او الفايروس هي معناها انه انا دا اقاتل الجرثومه الغازيه من اي مصدر كانت !!! هي جيده لان تساعد على التخلص من الجرثومه بس اكيد هذا ما يعني نتركها لوحدها بس ننطي الخافض حتى الطفل يرتاح شعله اخرى احيانا كثيره اشوف امهات من طفلهم يتالم لاي سبب كان مثلا التسنين اكولها اي انطيه خافض حراره يكولون دكتور بس هو ما مصخن خافض الحراره مسكن للالام كذلك يعني حتى يرجع نشط و ما يحس بالتعب و الخمول شغله مهمه اسمعها انه الحراره تسوي تلف في خلايا الدماغ !!! هذه الجمله صحيحه و غير صحيحه لان الحراره اللي تسوي تلف بالدماغ هي درجه حراره ٤٢ اي نعم ٤٢ الرقم اللي اني طبيب صارلي ١٥ سنه ما شايفها و لا مره اقصى حراره شايفها ٤٠.٦ و الطفل كان يلعب و يضحك و عنده انفلونزا المهم نرجع لموضوعنا فالحراره كعرض بحد ذاتها هذه ما تسوي تلف بالدماغ
شوكت نكول على الحراره عاليه؟ لا تدوخون بالارقام اولا اشتروا مقياس الكتروني عادي اللي يقيس تحت الابط ويه تجهيزات الطفل من اول يوم و قيسي الحراره الرقم احفظيه ٣٧.٢ تحت الابط هذا مصخن ٣٧.١ هذا ما مصخن لا تضيفين نص و لا تدوخين روحك بالارقام بس احفظي رقم ٣٧.٢ للاخوات اللي مصرات على اضافه النصف درجه او القياس من الفم او الشرج الدرجه هي ٣٧.٨ بس قياس تحت الابط كافي و الدرجه هي ٣٧.٢ مصخن و بس و بلا نصف شوكت اراجع الطبيب من يصخن الطفل ؟ اولا اي ارتفاع لاعمار تحت ٣ شهر ارتفاع حراره فوق ٣٨.٥ دون اضافه نصف خصوصا اذا مصخوب بخمول او ازرقاق او صعوبه نفس او طفح جلدي او بكاء مستمر او سهر و تعب او سعال شديد هسه شنسوي اذا ارتفعت الحراره اولا تاكدي انه انت ما مدفيه الطفل زايد قللي الاغطيه لربع ساعه و قيسي بعدها و هذا الشي يصير بالصيف اكثر اذا خلص تاكدتي حراره ابدي بخافض الحراره و لا تنسين حراره خفيفه و الطفل دا يلعب اتركيه لوحده نكمل القصه اذا الحراره جد عاليه و الطفل تعبان انطيه الباريستول الباريستول هو الامين نوعا ما هذا الامان لا يعني ابدا انه نبالغ بيه فكثرته تؤدي الى تلف الكبد و الكليه اشوف مع الاسف تصرف سيء جدا انه ينطون الشراب و التحميله سويه و اكولها خطا ما يصير تكولي لعد يبقى مصخن !!! و اكولها لعد نذب الكبد مالته ما نريده ! تكول لعد ينشمر ؟!!! اكولها خفضك للحراره لا يحمي ابدا من الشمره الشمره تصير بالارتفاع او النزول المفاجيء للحراره لذلك الباريستول امين و ممكن استخدامه كقطرات او شراب او تحاميل و اني افضل دائما التحاميل لان سهله بالاعطاء مو اسرع او اقوى كل شكد ننطي خافض الحراره ؟ كل ٤ الى ٦ ساعات بعد شنو خافض حراره موجود بالصيدليات؟ اكو عائله اسمها عائله ( مضادات الالتهاب الغير ستيرويديه ) و من اشهرها البروفين و الفولتارين و البونستان هذه العائله كذلك تخفض الحراره بس مشكلتها اعراضها الجانبيه كثيره و موانع استخدامها كثيره لذلك اطلب منكم الكف عن استخدامها الا بوصفه طبيه و للمرض المعين فقط يعني اني اكتبها مثلا لمره واحده و بالمره الثانيه اكول للاهل لا تستخدموها بعد بهذه الطريقه ثانيا لان بس بهذا المرض استخدمناها هيجي الطريقه الاخرى لخفض الحراره هي طريقه الكمادات و بيعا عده شروط اولا استخدميها بعد الخافض بعد ما تنزل الحراره شويه لان الطفل ينزعج منها اذا كان جدا مصخن ثانيا ابدا و لا يجوز استخدام الماء البارد فقط الماء المعتدله حرارته ثالثا بلا اضافات للكحول و غيرها شكرا ما نريد اي الاماكن زينه للكمادات؟ ممكن اي مكان مثل الرقبه او الجبهه او الفخذين او الذراعين نكدر نغسل للطفل؟ طبعا تكدرين ليش لا بحمام معتدل مو بارد لصقات الحراره تفيد؟ الصراحه لا و مالها اي اساس علمي اذا انشمر الطفل من الحراره شنسوي؟ اقلب الطفل على جهه اليسار و ارفع رقبته و راح انزل الرابط بالتعليقات لبوست قبل يومين توصيات اخرى؟ الحراره مو مخيفه الاهم هي معرفه السبب لان اكثر امراض الاطفال تسوي حراره مثل الانفلونزا و النشله و التهاب اللوزتين اللي يخوف هو فرط استخدامنا لخوافض الحراره بصوره خاطئه و صرفنا الخطا للمضاد الحيوي بدون اي داعي و شكرا د. سيف سمير البياتي اخصائي طب الاطفال و دمتم بلا حراره و لا امراض و لا انفلونزا
