عدم مراجعتك للطوارىء قد تنقذ شخص اخر!! من الامور اللي لازم نت | إستشارة طبية
عدم مراجعتك للطوارىء قد تنقذ شخص اخر!!
من الامور اللي لازم نتفق عليها انه الطوارئ موجوده فقط للحالات الطارئه
وان الشخص لازم مايراجع الطوارئ الا اذا عنده شي طارىء جدا ومايتحمل يبات للصبح. وانه انت من تجي للطوارئ تاخذ مكان غيرك ربما يكون محتاج العنايه اكثر منك!
شغلات مايحتاج نراجع الطوارىء عليها؟ الامراض الجلدية عامة الاسهال البسيط التهابات المجاري البولية مثل حرگة الادرار حساسية الانف وحساسية العيون ارتفاع ضغط الدم المزمن انخفاض ضغط الدم مايحتاج طوارىء فقر الدم مايحتاج طوارىء الصداع البسيط مايحتاج طوارىء يكفي حبة براسيتول اي شغله صارلك فترة طويله تشكي منها، مو تتذكر بالليل، انتظر للصبح وراجع الاستشارية! النحول او التعب مايحتاج طوارىء الرعاف الانفي البسيط يعني نزف الانف البسيط جدا
ادري دكتور لعد شوكت نراجع الطوارىء ؟ اذا كان اكو الم شديد في اي وقت اذا كان اكو حاله ولاده طفل حديث الولاده اقل من شهر وحسينا وضعيته الصحيه مو مستقره ضيق نفس او الم في الصدر بالذات في الاشخاص كبيري السن او في الاشخاص اللي عندهم امراض مزمنه السكر العالي جدا،او انخفاض السكر ،او ارتفاع الضغط الحاد الشديد يعني مثلا 18 على 10 السخونة العالية جدا بالذات الاطفال النزف الحاد الشديد من اي مكان كذلك اذا عندك اي موضوع تحسه خطير ممكن تراجع الطوارىء وتستفسر واذا الطبيب طمنك وگالك الموضوع بسيط باجر راجع الاستشارية ،خلص اخذ مريضك وراجع الاستشارية ثاني يوم.
اسمع شخص يقول دكتور انتوا تريدون ترتاحون و ما تريدون تشوفون مرضى هوايه !!
راح اجاوبك مو صحيح ولكن تراكم الحالات الحادة او الشديده مع الحالات البسيطه يؤدي الى ضياع حقوق الافراد الي يحتاجون العنايه بصورة كبيره وراح اضرب لكم مثال: مرة من المرات اني خفر طوارىء وكان اكو احد المرضى كبير بالسن كان عنده جلطه قلبية ساكت وما يحجي شي، واحنا گاعد ننطي علاج حتى ندخله انعاش. وبالجهة الثانية كان اكو واحد شاب خابص الدنيا قيسولي ضغطي ماقيسولي ضغطي فاني كنت ملتهي ويا مريض الجلطة وهو يشوفني گاعد افحصة وانطيه علاج وهو ولا كانه قيسلي ضغطي ،فالتفتت عليه وگلتله يعني ياخي انت ماعندك احساس، منو اهم انت لو هذا المريض المجلوط!! گال اني اهم !!
واكو فد شغله مستفزة نشوفها هواية ،وهي بعض الناس يطب للطوارىء متعارك ويه حبيبته او بالعكس بس يشد كانيولا (كانونة) وياخذ صورة ويطلع ، والله هذا واقع الحال وللاسف.
راح يسأل شخص ليش ماتخلون اطباء هوايه بالطوارىء؟ والله هذا السؤال يتوجه للوزارة مو للموظف، الي ماكو بايده شي!
