و بدا الليل و بدت المعزوفه وبدأ البجي و العياط و الصراخ للاط | إستشارة طبية
و بدا الليل و بدت المعزوفه وبدأ البجي و العياط و الصراخ للاطفال طيب تعالوا نشوف شنو نسوي يا جماعه ؟ اللي عليك تسوي هو تمشي بالخطى التاليه هن 18 نقطه تباعا نبدي خطوه خطوه 1. هل حاجات طفلك الاساسيه متغطيه؟ يعني جوعان؟ نرضعه بردان ؟ ندفيه حفاظه متسخ؟ ننظفه متعب ؟ نريحه 2. ممكن اكو شي زاعجه؟ الغازات؟ ممكن بطرق عديده منزلها ببوستات منفصله جربتي قطره سيمثكون؟ اذا ما فادت جربي كوليف ارتجاع مريئي؟ ارفعي راسه و طبطبيه هوايه حرارته مرتفعه ؟ انطيه خافض حراره تسنين؟ انطيه باريستول بمختلف اسماؤه التجاريه 3. اخذ طفلك و افتر بيه خارج المنزل هذه طريقه طبيعيه و مفيده جدا ما اعرف ليش هذا الخوف المبالغ من البرد او الطلعه بره طلعت من صار عدهم مغص بالبرد و بالحر و بالوحده ليلا و بال ٥ فجرا و بشهر ال ١٢ و بشهر الواحد و عادي سكتوا و رجعتهم لأمهم نايمين 4. غير جو و ضوء و صوت الغرفه الكثير من الاطفال يتأثرون جدا بالأماكن اللي الإضاءة بيها قويه او صوتها صاخب كل اللي عليك هو تغيير مكان الطفل إلى غرفه أخرى و راح تشوف فرق 5. المساج طريقه لطيفه للعب و اراحه طفلك فليش لا جربيها و اكو زيوت خاصه للمساج و رخيصه و دا اكتبها و دا اشوف عليها نتيجه للاطفال اللي يعانون من مغص 6. شيلي طفلك بالحماله مال الاطفال بس موجوده و مفيده للامهات اللي عدهم شغل هوايه و للاطفال اللي يبجون هوايه 7. الكماط يضمن نومه هانئه بس لازم يتم بطريقه صحيحه و ما يشمل الساقين 8. الضوضاء البيضاء و الموسيقى شي لطيف و رائع و مفيد ممكن اي موسيقى ممكن صوت مجفف الشعر او مروحه سقفيه تريح طفلك 9. السياره للسياره مفعول سحري بتهدئه الطفل يلا اركب سيارتك و اخذ فره 10. أغلق الاضاءه لسه اتذكر شون نام ابني اول ما طفيت الضوء بعد ما كان يبجي لفتره طويله و بعدين عرفنا انه ما يعرف ينام إلا نطفي الضوء 11. استخدم الملهيه بعد عمر الشهر الأول اذا الطفل يرضع طبيعي و مالها داعي بعد عمر ٦ اشهر اني و انت ما نحبها ممكن بس العلم يكول انه هي تقلل المغص و تقلل ألم التسنين فاي نستخدمها لفتره محدوده 12. جربتي تحمميه هسه؟ الكثير من الاطفال ينامون جيدا بعد حمام دافي لا عيني دكتور مو يتمرض ؟ المرض ما يجي من الحمام يجي من الاشخاص الاخرين اعرف العشرات من الاطفال اللي ما ينامون الا يتحممون ليلا رغم انه اني ما انصح بالحمام اليومي للاطفال علمود صحه جلدهم 13. خلي جلده على جلدك راح يرتاح و يحس بالأمان 14. جربتي المرجوحه او الكرسي الهزاز او سرير الطفل المتحرك ؟ جربيه ممكن يهدأ و ينام 15. جربتي تغيرين وضع الطفل ؟ يعني ينام على بطنه مثلا تحت اشرافك اكيد او ينام على ذراع والده 16. من تتعبين انت و توصلين لاخرك انسحبي و اخذي نفس عميق و انطي الطفل لشريكك فالطفل مراه والديه من نفسيتك تتعب هو راح يتعب 17. جربتي البروبايوتك؟ البكتريا النافعه ممكن ببساطه ان سوء الهضم هو تغيير بطبيعه المايكرويكتريا اللي موجوده بالامعاء اسماء التجاريه مثل انتيرولاكتس و اوبتيباك 18. راجعي الطبيب اذا ظل الوضع على ما هو عليه فالطفل يحتاج ان ينفحص اذا استمر الموضوع اكثر من الحد الطبيعي
