17 شغله راح تلاحظيها من ترضعين طبيعي!! من تقررين ترضعين طبيعي | إستشارة طبية
17 شغله راح تلاحظيها من ترضعين طبيعي!! من تقررين ترضعين طبيعي راح تلاحظين بعض الأشياء الغريبه اللي ممكن تصير بالرضاعه الطبيعيه تعالوا نكتشفها سويه 1. بعض الالم و الحرقه البسيطه تصير عندك بأول ايام الرضاعه الطبيعيه من المعروف ان الرضاعه الطبيعيه تجربه عاطفيه جميله الا انها ممكن تكون مؤلمه و أحيانا مؤلمه جدا بس مع الأسف مع غياب دور المعلم للرضاعه الطبيعيه الموجود بكل دول العالم صارن الكثير من الأمهات يتركون الرضاعه الطبيعيه لهذا السبب من الطبيعي ان يصير بعض الالم بس من يصير ألم شديد هنا لازم نراجع طريقه التقام الحلمه و غيرها و اللي أكرر أسفي لعدم وجود معلمه رضاعه طبيعيه في الصفحه 2. طفلك سيرضع كثيرا بالبدايه هنا هم بعض الأمهات تترك الرضاعه الطبيعيه لان تشك انها حليبها ما يكفي لان الطفل حرفيا لازك بالام و يرضع السبب ان معدل النمو جدا عالي اول ٣ اشهر بحيث يضاعف وزن الولاده بأول ٤ اشهر و تخيلي الحجم اللي راح يصعد و يصعد كثيرا بس وره ٣ اشهر راح يقل بس صبرك و تسهل الرضاعه الطبيعيه 3. الكثير من التقلصات الرحميه من ترضعين طبيعي !! و هذا شي راح يرجع رحمك لحجمه الطبيعي و السبب هو هرمون الاوكسيتوسين اللي يحفز الحليب نفسه يقلص الرحم 4. بعض الحليب سيتسرب لوحده من تسمعين طفلك يبجي او من تفكرين بطفلك ! عجيب 5. راح تضعفين و تفقدين وزن و انت ترضعين طبيعي لذلك دائما اكول لا تستعجلين الريجيم بس رضعي طبيعي و اكلي صحي و هو وزنك راح ينزل الرضاعه الطبيعيه تحرك ٥٠٠ كالوري يوميا كووومه يعني 6. راح تفضلين بعض الاكلات المعينه مثل الحمل بس لا تنسين اذا تحبين الأشياء الحلوه جيكي سكرك ممكن صار عندك سكر حمل و كمل وياك و انت ما تدرين 7. اول ما طفلك يرضع طبيعي راح تجيك عاصفه عطش شديد !! عادي حضري كوب مي يمك 8. بعض اللخبطه بالدوره الشهريه طبيعي بس لا تعتمدين على غياب الدوره الشهريه كمانع حمل ابدا ابدا ابدا 9. الرضاعه الطبيعيه سوف تشعرك بالنعاس و هذا بسبب هرمون البرولاكتين اللي يخليك تشعرين بالنعاس 10. عند امتلاء الثدي و عدم تفريغه راح تحسين بشعور و كأنما حجاره و راح تشعرين ببعض الراحه عندما يرضع طبيعي 11. كلما تزداد خبرتك بالرضاعه كلما راح تحسين بالحليب شون ينزل و شلون يفرغ 12. و انت ترضعين طبيعي من جهه ممكن راح ينزل الحليب من الجهه الاخرى !! و هذا شي طبيعي 13. أحيانا راح تحسين بعدم الراحه او لنقل بعض الانزعاج اول ما ينزل الحليب و هذا شي راح يخف تدريجيا 14. ممكن تستمرين بالرضاعه الطبيعيه بعد عمر السنتين! و هذا شي يخصك لوحدك و محد يكدر يحاسبك دام نمو الطفل طبيعي اذا الطفل نموه مو كلش فيفضل الفطام 15. الاطفال ما يرضعون طبيعي فقط لان جوعانين فهم يرضعون فقط حتى يقربون منك او يحسون بالدفء و الحنان 16. اطفال الرضاعه الطبيعيه راح ينامون أثناء الرضاعه و هو شي طبيعي 17. عند إعطاء قطرات كوليف ماكو داعي للانتظار و إنما تخلط القطرات مع حليبك ثم تعطى للطفل ثم بعد ذلك مباشره رضعي طبيعي د. سيف سمير البياتي اخصائي طب الاطفال
