مساء الخير دكتور ابني صار عمره سنه و دا يكولون انه الحليب مو | إستشارة طبية
مساء الخير دكتور ابني صار عمره سنه و دا يكولون انه الحليب مو كلش مفيد و اني إلا انطي حليب فشنو رأيك ؟ فعلا الحليب هو الغذاء الرئيسي قبل عمر السته اشهر بس بعد عمر السنه يصير شي ثانوي فلا تضغطين على طفلك انه يشرب حليب . زين دكتور شكد كميته للحليب بعد عمر السنه ؟ كميه الحليب الموصى فيها بعمر السنه تتراوح بين 8 الى 12 رقم اللي يعادل بحدود 300 سيسي و يقل تدريجيا بحيث بسنه و نص كوب واحد فقط إلى حد السنتين بعد السنتين يصير نص كوب إلى 3 أرباع الكوب يعني 180 سيسي يعني هاي بالزايد ما يصير أكثر حتى لا يشبع من الحليب و يصير بيه فقر دم و إمساك . دكتور و الله دخت بالأرقام كم كوب انطي؟ حتى أكون واضح كوب واحد أو 2 بعمر السنه و يقل الى كوب واحد فقط بعمر السنتين بعدها نص كوب فقط إلى 3 أرباع . زين دكتور مو قليل الحليب لأن الحليب ضروي لعظمه؟ لا امي الحليب ضروري لعظمه بس تدرين انه لازم يشرب لتر حليب يلا يطلع احتياج اليوم الواحد من الكالسيوم و الفيتامين دي ؟ يعني 35 رقم يلا فلا تظلميه بالحليب يعني هيجي هيجي ما راح ياخذ اللتر و حتى اذا اخذه ما راح ياكل . صدك دكتور الحليب يسوي فقر دم؟ كثرة الحليب و عدم إلتزامك بالتقليل مثل ما كلت فوك ممكن يسوي فقر دم لأن ما راح يأكل اللحوم و الخضروات الغنية بالحديد فبطريقه ما يسوي فقر دم طريقه أخرى قبل كم يوم كتبت عنها انه الحليب يسوي فقر دم هو أن الحليب و اللبن و الجبن يقلل امتصاص الحديد . دكتور يصر انطيه حليب مطعم؟ اي نعم دامه فوك السنه ولو نفضل بعد سنتين . دكتور يصير انطي لابن اخويه عمره 11 شهر و نص حليب أكياس أو حليب باكيت مطعم ؟ لا إلى أن يعبر السنه . دكتور الصدك غير هو ما يحب الحليب شاسوي؟ و إذا هو حساس للحليب شاسوي ؟ و إذا ما يحبه أو متحسس منه انطيه ما يعادله من الأجبان و الألبان مثل قطعه جبن كيري أو قطعتين مثلثات أو لبن بالأخص للمتحسس من الحليب . دكتور صدك اذا فوك كلت الحليب بالكوب ليش شوكت افطمه؟ مو كلنا يا اختي العزيزه الفطام من الرضاعه الصناعيه يتم بعمر سنه و 3 اشهر بالزايد حتى لا يخرب شكل أسنانه الحلوه لأن الأسنان الدائميه (تخيلي الدائميه ) بدت تتكون . زين و امهات الرضاعه الطبيعيه؟ توصي الجمعيه الامريكيه لطب الأطفال بالرضاعه الطبيعيه إلى عمر سنه بعدها اذا حابه تكملين براحتك ما تجبرك ثم رب العالمين مخلي القرار الك بالايه الكريمه من كال عز و جل لمن أراد أن يتم الرضاعه يعني الخيار بيدك . دكتور راح تعترض الأمهات و تكول مو دكتور الحليب بيه كالسيوم ؟ اكول فعلا الحليب بيه كالسيوم بس فقير جدا بالحديد و لهذا تشوف الطفل سمين بس نسبه دمه قليله أو يعاني من أعراض نقص الحديد تحياتي الكم و تمنياتي بصحه دائمة و لاتنسون المشاركه من الصفحه مباشره دكتور سيف سمير البياتي اخصائي طب الأطفال
