عيدك مبارك دكتور شونك دكتور بنتي توا فاتت بال ٤ أشهر اوكلها؟ | إستشارة طبية
عيدك مبارك دكتور شونك دكتور بنتي توا فاتت بال ٤ أشهر اوكلها؟ بالمركز الصحي كالولي الا بال 6 أشهر ! ليش مو اهل قبل من ال 40 يوكلون ؟ ليش مستعجله خو بال 8 أشهر اوكلها؟ و شنو اوكل و كم وجبه و أكدر أضيف الحليب و شنو الممنوع ؟ و شنو تفضيلاتك؟ و شون ويه البيض ؟ الموز صدك يصير ؟ هذا البوست يجيب : متى ادخل الطعام ؟ هي فتره ممتده من ٤ أشهر إلى ٦ أشهر و حسب مواصفات خاصه اولها مضاعفه وزن الولاده ثانيها سيطره الطفل على رقبته و ثالثها تقبل الطفل و عدم رفضه بلسانه و رابعها قدره الطفل على رفع صدره و أعلى بطنه في حال نومه على بطنه في حال توفر كل هذه الشروط فممكن باي فتره من ٤ إلى ٦ أشهر قبل ال ٤ أشهر ممنوع و نجي نحسب العمر و اختصرتها سابقا و كلت بعمر ١٢٠ يوم يعني من يتم الشهر الرابع لان من يدخل الشهر الرابع عمره ٩٠ يوم و ممنوع و غير مقبول إعطاء اي شيء عدا الحليب للطفل قبل ١٢٠ يوم ! ليش خطر عليه ؟ طبعا خطر عليه اولا ما مستعد جهازه الهضمي و ثانيا راح يؤثر عليه بالمستقبل و يرفض الاكل و ثالثا بعده ما مستعد و ممكن يتشردق بالطعام و هي حاله خطره جدا بعمر صغير جدا زين دكتور بالمركز الصحي او الطبيب الفلاني كال بعد ٦ أشهر و انت تكول ممكن من عمر ٤ أشهر طبيبك صح و منظمه الصحه العالميه تكول هذا الشي حتى يكون أكثر مستعد و لتعزيز دور الرضاعه الطبيعيه بس اكو اكاديميات لطب الاطفال مختلفه تكول انه ممكن بعمر ٤ إلى ٦ أشهر اكو شغله أخرى احبها بإدخال الطعام بعمر ٤ إلى ٦ أشهر هي هذه الفترة يسموها فتره الشباك Window period تكول انه من تدخل الطعام بهذه الفتره احتماليه التحسس تقل لأسباب غير معروفه و هذا بصراحه حافز كبير لإدخال الاكل بهذه الفترة على كل ممكن تنتظرين او تستعجلين و هذا يفرق بين طفل و آخر و يعودلك القرار بس لا تستعجلين قبل ٤ أشهر و لا تاخريه بعد ٧ أشهر شنو اول وجبه ؟ براحتك بس صنف واحد و أفضل الحبوب و بعدها كل ٣ ايام صنف جديد و عادي ممكن استخدام حليبك او حليب الأطفال لتحضير الطعام مثال شوربه رز ٣ ايام بعدها ممكن اضافه جزر للرز او بطاطا للرز و تخفف بالحليب بعدها اضافه جزء من فخذ الدجاج للرز و خلطه بالخلاط و بعدها ممكن لحم مع الرز و يهرس بالخلاط لحم مبكرا شعجب؟ الطفل بعز احتياجه للحديد بهذا العمر لذلك مهم جدا إعطاء اللحم و لتذهب خرافه اللحم يسوي دود إلى الجحيم السيريلاك؟ ممكن بس ما افضل ماكو افضل من أكل انت تعرفين مكوناته لطفلك اي ممكن السيريلاك بس بعد انتظري شكو مستعجله عليه بعد ٦ او ٨ أشهر و ابدي بسيريلاك رز ثم شوفان و آخر شي الحنطه شرايك بالبسكت؟ بعد ٦ أشهر يلا تدخل الحنطه و يكون خالي من السكر و ممكن الصمون و الخبز و البسكت بعد ٦ أشهر و اذا تعرفين تسوين بسكت منزلي يا ريت بس بسكت و سكريات او مالح لا ما افضل الفواكه ؟ اي ليش لا بس فواكه الصيف بعد ٦ أشهر مثل الخوخ و المشمش و العنجاص و قبل ٦ أشهر ممكن التفاح و الموز و الرقي اكو علب جاهزه لأكل الاطفال تنصح بيها ؟ هن فواكه و بسكت اخلطهن طازجه افضل و ارخص و اكثر أمانا مو بالله؟ الحليب ممكن خلطه بالوصفات؟ اي ليش لا اللبن؟ 6 أشهر و ممكن خلطه بالموز او التفاح البيض ؟ بعد ٦ أشهر مثل الحنطه و اول ٣ ايام صفار و بعدها بياض البيض ب ٣ ايام يعني ما انطي سيريلاك؟ اني مو ضد السريلاك بس ضد انه نبدي خطأ و ننطيه كوم سكريات نروح للقسم الاخر كم وجبه باليوم؟ اول ايام وجبه وحده بوقت الغداء و كميه صغيره نزيدها حسب تقبل الطفل و بعدها نزيدها تدريجيا و نقلل الحليب على اساس طلب طفلك الماء ؟ من يدخل الاكل يزيد احتياجه للماء فيدخل الماء و حسب رغبه طفلك اسمع من هوايه أمهات انه طفلهم ما يحب الماء و بالأخص اللي رضاعتهم طبيعيه و نكول عادي لان حليبك مصنوع من الماء هدفنا بنهايه السنه الأولى كوبين حليب و ٣ وجبات طعام و يشرب بكوب ماء و يا ريت لو ياكل هو بايده حتى ننتقل إلى طفل قادر يطعم نفسه بعمر سنه إلى سنة و نصف شنو ممنوع قبل سنه؟ السكر الملح العصير العسل الدهون المشبعه و اي ماده ممكن تسبب خطر الاختناق مثل الفستق و اللوز ليش هلكد تنشر عن هذا الموضوع؟ لان سوء التغذيه بالعراق مستفحل مع نظريه ان الحليب زين و نجاح شركات الحليب الصناعي بالترويج للحليب الصناعي على انه البديل يرافقها تكاسل كبير من بعض الامهات و الآباء لان تحضير المميه اسهل من إطعام الطفل المهم ما علينا عيدكم سعيد يالفانزات د. سيف سمير البياتي اخصائي طب الاطفال
