وقفت الرضاعة الطبيعية لاسباب معينه وهسه اريد أرجعه اكو امل؟
هواي من المثبطين حيكولون ليش تعذبي ميحتاج هاهيه تعود على الممه خلي مرتاح .. او يطلعون بنظرية السم ويكلج ميصير بعد يرجع يرضع حليبج صار سام
والحقيقة لايصير سام ولا شي بالعكس كلما رجعتي حاولتي ترضعي حتحصلين فوائد اعلى من التعب
الابحاث كانت ولازلت تؤكد ان الرضاعة الطبيعية تؤثر بشكل مباشر على صحه الطفل الرضيع لطول عمره مو فقط وهو صغير واهم هاي التاثيرات هو تزويد الطفل : بالدهون المهمه جدا لذكاءة ونموه العصبي والاجسام المناعيه والبروبايتك والبروبايتك نقصها حاليا يرجعوه لهواي امراض ف الرضاعة الطبيعية اول مصدر تزودين طفللك بي حتى تطورين من صحه امعائة
ندخل بالشرح العملي مباشره :
قد يستغرق الموضوع اسبوع أو قد يأخذ اشهر..
الخطوة الأولى : ملامسه skin to skin (ملامسة الجلد للجلد) يعني تنزعين الملابس الفوك والطفل تبقي بالحفوظة وتحطي على جسمج يم گلبج..
هالشي جدا جدا مفيد من هواي جوانب : ١.يحفز ادرار الحليب بصدر الام حيث تعمل الملامسه على رفع هرمون الحب (الاوكسيتويسين) وهو ايضا مسؤول عن ادرار الحليب.. ٢.شعور الطفل بالحب والحنان وبقربه من دقات قلب امه ٣.تنظيم حراره جسم الطفل ٤. الشعور بالراحه والسكينه للام ٥. يزيد من ترابط الام بالطفل ( يعني الموده والحب مو تكولون لاااا بعدين يلزك بيها ويتعلق ) ٦. ينقل البكتيريا النافعة من جلد الام وبالتالي تحسن المناعة ٧. مهدئ للطفل ومقلل للبكاء ومسكن طبيعي للالم.
هاي الخطوه اتمنى كل الامهات تسويها حته الي ترضع بس صناعي .. لاتحرمين الطفل من هاي الفوائد ..
وكلش انصح تستخدمين شيالة كوكو لتطبيق هذا الشي لان المدة لازم طويلة والشيالة تفيدج تتحركين براحتج اضافه الى انه طريقة استخدامها ماتخلي حاجز بينك وين الطفل مثل الانواع الاخرى الي تصير مثل حقيبه حعتزل الطفل عن جلدك
المهم نرجع لموضوعنا .. شكد يبقى الطفل هيج ؟ ٤٥ دقيقه.. فما فوق اقل من هالمده ما ينطي المفعول المطلوب
زين شوكت اسويها؟ وقت الطفل شبعان ونظيف ومرتاح ميهم سواء ليل أو نهار
هاي الخطوه تستمرين عليها اسبوع أو اقل حسب كل طفل.. بعض الأطفال سبحان الله مجرد يصير بهيج وضع تلقائيا يكوم يدور على الصدر.. واكو يطول يلا..
الخطوة الثانية : انطي الرضعة المعتادة بس قللي شوي منها أو قبل ميكملها شيلي وحطي على صدرج..
ومره على مره قللي الحليب وطولي مده بقاءه على صدرج
ليش نسوي هيج؟ لان اصلا الحليب عندج قل، وبالتالي مرح يشبعه لو حطتي مباشرة .. لكن بهاي الطريقة رح يتحفز الصدر بالتدريج..
زين ليش ما أحطه راسا على صدري؟ غالبا رح يرفض لان الطفل من يكون جوعان ومتعود على طريقه سريعه ميتحمل يكعد يبذل جهد ويرضع ..
زين لعد خوب اجوعه .. ورح ينجبر على صدري هاي الطريقة ما احبذها لان هالشي رح يصير غصب والطفل يكره الغصب ويكره الشي الي انغصب عليه حاله حال الكبار .. واحنا منريده يكره صدر امه.
الخطوة الثالثة : طبعا يفضل استخدام الشفط (المضخه الإلكترونية أو التفريغ اليدوي، ولا انصح بالأداة التي تحتوي على جزء سيليكون مثل الكره) (اي وقت وشكد متكدرين مده) حته يزيد انتاج الحليب الي بصدرج .. بس مو شرط هالخطوه.. ممكن الزيادة بالتدريج بأن كل مره يرضع الطفل أكثر رح يزيد الحليب.
الخطوة الرابعة :اذا منجحت الخطوه السابقه (الثانيه) وبقى الطفل يرفض يرضع مباشر نستخدم جهاز nursing system (NS)
شنو هذا الجهاز؟ جهاز بسيط متكون من : ١.قنينه أو وعاء ٢.صونده رفيعه ( مثل مال مغذي) ٣. شريط لاصق
وين الكاه؟ حسب علمي غير متوفر بالعراق (موجود بامازون) .. لكن تكدرين انتي تسوي لان بسيط..
زين شلون يستخدم؟ نحط بداخل الوعاء (سواء علبه عاديه او ملعقه سيريلاك أو ممه او كلاص) الحليب الي اعتاد الطفل يشربه ونحط بداخله الصونده ونثبتها باي طريقة ونخليهم بمستوى أعلى من مستوى صدر الام .. ونلزك طرف الصونده بصدر الام (بحيث حللك الصونده يصير وي الحلمه) واللصق يصير بالجانب حته لايأذي لثه الطفل .
من يبدي يمص رح يطلع له راسا الحليب الي متعوده فحيتشجع ويبقى يمص وبالتالي حيتحفز الصدر اكثر واكثر ورح يرجع يربط مصدر الغذاء من صدر الام مو مو زجاجه...
نستمر فتره ونقلل الحليب الي بالقنينه بالتدريج إلى أن يصير بصدر الام كميه جيده من الحليب نستغني عن الجهاز ونكون رجعنا الطفل لحضن امه
