( حكاية زينب ) عندما وصلت مولاتنا العقيلة لجسد الشريف للمولى | الشاعر حيدر الحلفي

( حكاية زينب )

عندما وصلت مولاتنا العقيلة لجسد الشريف للمولى ابا عبد الله الحسين ع ورأت جسده مقطوع الراس ومسلوب الثياب والخيل اخذت ما اخذت من صدره الشريف
قالت عند ذلك ...

أنحب گعدت اگباله . او لميت بيدي اوصاله . شمخلي بي كتاله . محبوب زينب
محتاره ادور اهدومه . لو لمه من الحومه . شو جثته مطمومه . محبوب زينب

وحدي اركضت وابلا راي . مجروحه كاتلني اظماي . او لن شاهديت احسيني
يمه اگعدت انحب حيل . وابجسمه آثار الخيل . آنه انظرتها ابعيني
گلبته يمنه اعله اشمال . واتطشرت منه اوصال . لنه اشعر ايحاچيني
ابخوتنه ياخويه اعليچ . جمعيني زينب بيديچ . من الترب لميني

يالحره كل خوفي امي . تحظر تشاهد جسمي . لمي يزينب لمي . محبوب زينب
____
بيمن ألْمك يحسين . او جسمك يخويه امطشرين . امنين ابدي المك گلي
طعناتك اتهد عيناي . ألف او تسعمية اهواي . إگعد يخويه اشرحلي
سالم كتر لا مابيك . مگطوعه چا ليش ايديك . يالغالي بس باوعلي
وين الجسد وين الراس . چتلك أشد من عباس . بيك الشمر شمخلي

لو شاهدن طعناتك . ايموتن ترى ابنياتك . ايحسن ترى ابشوغاتك . محبوب زينب
____
كلما ألمنة ايطيح . من ايدي جسمك وايسيح . ما تحملك چفيني
أوصالك اهوايه اثگال . مطمومه مابين ارمال . اعليهن يخي دليني
وين الرجل وين الإيد . منك گطع چم اوريد . ذباحك السابيني
وين الصدر وين اگفاك . ليش الشمر من طگاك . صد لية وايراويني

گلالي زينب شوفي . الزمت النحر بچفوفي . عوفي أخيچ عوفي . محبوب زينب
_
أتمنه المك وارتاح . او جسمك ولهَ اتشوفه الطاح . فوگ التراب ارقية
مارايده فوگ الگاع . جسمك تنظره ابهالساع . ابنيتك يبو الحنية
ابنيتك تجيلك ماريد . حتى انته ماتنظر ليد . بنتك لأن مچوية
ما عوزك اهوايه اجروح . بس تنظر الها ادري اتنوح . او تسأل عله الترچية

ماتعرف انته ابنيتك . لو هالمسه اتعنتك . تتوفه لو شافتك . مجبوب زينب
_
كلك يبو اليمه اسهام . وارقية چا وين اتنام . ماظل مكان ابصدرك
فوگ السهم تغفه شلون . ياخويه چفها ازغيرون . اشيحظن سهم لبنحرك
يچوي التراب الجواك . چم نبله خويه ابعيناك . واشچم رمح ظل حدرك
دمك جمد فوگ اشفاك . ميت واحسن بظماك . من فدوه اروح الثغرك

ابصدرك أثر للگاعد . فوگ الصدر ظل صاعد . ايحز ابوريدك رايد . محبوب زينب
____
ماعدنه ظلن خيمات . ابهذا المسه وين انبات . ياخويه جيت اشكيلك
نامت رباب اعله ارماد . خيمتنه يابو السجاد . او تنده سُكينه ادخيلك
كلما تنام الزغران . ايودونهم غير امچان . او هم يضربون اعليلك
وامگيديهم بحبال . ناموا على حر لرمال . ابهذا الظلام ابليلك

كل ساعة خويه ايونن . طفلاتك او ميگدرن . فوگ الترايب يغفن . محبوب زينب

حيدر الحلفي