محررررم 1444 هـ ( حسرة زينب ) سامحني يحسين . راح ابعد اسنين . | الشاعر حيدر الحلفي

محررررم 1444 هـ ( حسرة زينب )

سامحني يحسين . راح ابعد اسنين . وبيدية ما لميتك
من حَر التراب . ما شلتك وطاب . صدرك ولا داويتك
عاتبني ما لومك . من سلبوا اهدومك
سامحني ما غطيتك

بية حسرة امثگلّة جرحي وانته جرحي الما يطيب
من تركتك لسه تدري گلبي نبضاتة ثغيب
إنتة اخوي او إنته ابوي او إنتة أكثر من حبيب
اگبالي نايم عالتراب وما گدرت افراش اجيب

يضي عيني عمت عيني . نمت بتراب يحسيني . شمر ما بينك وبيني . حرامات
أشوفك من بُعد وانحب . سمعت اشگد صحت زينب . أموتن ضامي ما أشرب . حرامات

أنظرلك اتلوب . مرات الغروب . بس ماگدرت اوصلك
واعرفتك اتريد . ما أرحل ابعيد . رايد عباتي افرشلك
يالضيعوا ارسومك . من سلبوا اهدومك
سامحني ما غطيتك
__
اشما أحاول يمك اوصل خيل گدامي او وراي
أركض اعليك او يجرني حرملة سوطة ابگفاي
صوتك ابگلبي أسمعة اتگلي يازينب تعاي
شلون اجيك النار يمي والدخان اصبح هواي

بعد ياحيل ظل بية . واطفي النار بيدية . واشوفن بنتك ارقية . تناديك
أجيلك لو أجي إلها . مشت عالنار اصد الها . حرت مدري شگللها . تناديك

مابينك وبين . زينب يالحسين . عشرة خيول اگبالي
أركض تجي احذاي . أوگف شمر جاي . وين اتجه يالغالي
خَلّص دمع يومك . من سلبوا اهدومك
سامحني ما غطيتك
__
صعبة أنظرلك يخويه وانته گدامي تموت
حرمة واشبيدية تدري غير يحسين السكوت
أللطم ابحرگة اعله صدري الخيل چيه فوگك تفوت
اشگد صحت يحسين لكن ما وصلك مني صوت

أباوع جسمك اتفتت . الخيول اعليك ما وخرت . چفوف او چم ضلع كسرت . أويلاه
دماك شلون تتبده . اليظل خوان ماعنده . الخيول اعليه تتعده . أويلاه

من صحتك ادريك . تحضرني لو بيك . ضليت اشوفك تحبي
أنظرلك اتلوج . والخيل اجت فوج . صدرك تدچ ابگلبي
ما أدري شعلومك . من سلبوا اهدومك
سامحني ما غطيتك
__
خويه سامحني بدية ما حملتك للخيام
وينها اخيامي واحملك عالترب هالليلة نام
بلكي أوصلك يخويه من يجن وكت الظلام
بس اخافن ما أعرفك من كثر هاي السهام

أخافن ما أعرفنك . وانه أمنيتي ابوسنك . يخي وابحضني احطنك . وحاچيك
يخوفي انگطعت انفاسك . يخويه ومنگطع راسك . اتعرفني بلكي بحساسك . وحاچيك

أمنيتي ألگاك . واشتم هوى اوياك . باليوجعك تشكيلي
وابروحي اغطيك . من عيني أرويك . عن ما جرى تحچيلي
يمي ردت نومك . من سلبوا اهدومك
سماحني ما غطيتك
__
اوياك اجيت وصعبة اودعك ياحبيبي من بعيد
كونك اوياي انته هسه وحاطين ايد اعله إيد
راح اعوفك مرمي خويه وحِرگة افراگك تزيد
ما إجيتك ما حضنتك ما گلتلك وشتريد

أحسك رايد اتگلي . يزينب عينچ اعله اهلي . ورقية ابكربلة خلي . أوصيچ
ترى ماتگدر ابدوني . إذا ما تنظر اعيوني . اعله بنتي لا تبعدوني . أوصيچ

بس مايقبلون . يمك يخلون . لا بنتك ولا آنه
سامحني ناديت . لو بيدي خليت . يمك رقية اهنانة
ما يگضن اهمومك . من سلبوا اهدومك
سامحني ما غطيتك

حيدر الحلفي