محررررم 1444 هـ صحت نحت من ضربوا اگبالي رقية صيحه اللي ما صاي | الشاعر حيدر الحلفي
محررررم 1444 هـ
صحت نحت من ضربوا اگبالي رقية
صيحه اللي ما صايحها اخو ابطيحة أخية
بنتي بنتي بنتي . من الناگة طحتي
اگبالي رقية
وآنه اعله الرمح شفت السياط ابمتنچ اتدور
ما أنزلج وما شيلچ ابإيدية معذور
طحتي وضلعچ اشعر بويه مثل اضلوعي مكسور
كل ساعة ابحبلهم آنه جسمچ شفته مجرور
ألم سهم بيه ولا شوفچ بچيتي
إمن الناگة من طحتي اسمعت بويه اشحچيتي
وينك بويه صحتي . من الناگة طحتي
اگبالي رقية
____
طحتي اعله الترب موش اعله ادية وضهرچ انصاب
متروسة الخرايب شوك بويه وحار التراب
محترگات ادينچ والسياط اتشگگ اثياب
شيطيب جروحچ يالفگدتي أغلى لاحباب
متت حرت من بالحبال اهناكى نمتي
وموش ابصباح الخير يرقية گعدتي
ابسوط الشمر گمتي . من الناگة طحتي
اگبالي رقية
____
من طحتتي يبوية گلبي يمچ عالترب طاح
محد مدلچ ايدة والدلال ابطيحتچ راح
طحتي والشمر لتگوموها أسمعة صاح
ختموت ونخلها ويه ابوها فوگ الرماح
سلب ضرب خدچ يبوية اتوجعيتي
ابگد الخيول العشرة طگ اتحمليتي
آه اشگد صرختي . من الناگة طحتي
اگبالي رقية
_
يالچنتي اعله صدري اتغمضين اعيونچ ابليل
نمتي بالخرايب بالشموس او ماكو تضليل
غمضتي العيون او دمچ إمن اچفوفچ ايسيل
كلما غمضيتي تحلمين ابركضة الخيل
ذبح جرح أحلامچ ابهالفترة صارت
أصعب حلم صوب الخيام الخيل غارت
ابنار اشگد حلمتي . من الناگة طحتي
اگبالي رقية
____
من الطف يبوية للخرابة اتدوري الماي
عطشانة وشفافچ فطروها تشبه اشفاي
من حرگ الخيم لا ماگعدتي لحظة بفياي
بوية والسناسل ظلت ابإيدينچ اهواي
ظمه دمه من الطفوف الهسه شفتي
الله اليساعد گلبچ اهواية تعبتي
ماي اشگد عطشتي . من الناگة طحتي
اگبالي رقية
____
ناگتهم هزيلة وتعبتچ بين الدروب
مثلچ من رمحهم بويه احسن حيل متعوب
اشگد اشتاگ اشمچ يالحبيبة وكت الغروب
مامتعودة تبقين بوية ابلايه محبوب
أون أحن يحبيبة اظمچ بين ادية
مشتاگ البسچ شيلتچ بوية رقية
عني ابعيدة صرتي . من الناگة طحتي
اگبالي رقية
حيدر الحلفي
