محررررم 1444 هـ للگمر يا ناگة روحي . يمه خليني استراح أرد اگ | الشاعر حيدر الحلفي
محررررم 1444 هـ
للگمر يا ناگة روحي . يمه خليني استراح
أرد اگله ادريت بعدك . طاح اخوك وكلشي راح
إنتهينة . وانسبينة . اتعذبينة
وكلشي راح . كلشي راح
أرد اگللة يناگة هـــــــــاي هية
كلشي راح وجيتك ابهيئة سبية
لحظة كوم وشوف زينب صد علية
هاي مو إيدك ترى احبال ابإدية
ما تگوم .. امچتفة يمك إجيت
ما تگوم .. اعرفت اخيتك لو نسيت
ما تگوم .. خويه ها چنك رضيت
ما تگوم .. مثل اخوك آنه انحنيت
إفتح اعيونك ثواني . وشوفني كلي تراب
هذي رملة وهذي سكنة . امچتفات اويه الرباب
اتمرمرينة . وانسبينة . اتعذبينة
وكلشي راح . وكلشي راح
______
اخذيني يا ناگة أكله وين هِمنة
بالبراري وعالترايب گوه نمنة
ضعنة ياعباس ضعنة ما تلمنة
هاك شوف شلون محروگة هدمنة
وين اروح .. همي إلمن اشتكيه
وين اروح .. الشمر حظر سوط اديه
وين اروح .. ياكل ابگلبي حچيه
وين اروح .. ايگلي اخيچ ودعيه
امنين اجه الماي اعله بالي . وروح گتلك للفرات
اشبية ماضميت جودك . عنك وبچي البنات
واشبدينة . وانسبينة . اتعذبينة
وكلشي راح . كلشي راح
______
ابگد عذاب اخيامي تدري عذبتني
شلون اركض خويه حگك ما شفتني
الخيل فوگ النار واشگد طيحتني
لومه سكنة اتشيلني چا طشرتني
امحرگات .. اچفوفي وانته امگطعات
امحرگات .. اخيامي ويه الذكريات
امحرگات .. اهدومنة وحتى العبات
امحرگات .. تدري بيدين البنات
خويه ما متعودة أركض . بس ركضت اعله الحُسين
إمن اوصلتلة ما عرفتة . جسمة وين او راسة وين
امگطعينة . وانسبينة . اتعذبينة
وكلشي راح . كلشي راح
______
ماشفت ذباح اخيك وآنه شفتة
شلون حز راسة ويگلي إنتي إختة
خويه حار السيف چان وحز رگبتة
اتگربتلة ايصيح يا يمى سمعتة
أمي وين .. ايصيح يازينب وراي
أمي وين .. بلكي لو جت عدها ماي
أمي وين .. خل تسويلي فياي
أمي وين .. خل تجي اتشاهد دماي
طايح ويصرخ ييمى . ذبحوا احسينچ تعاي
حظري لميني يفاطم . وخلي إيديچ ابگفاي
يالحنينة . وانسبينة . اتعذبينة
وكلشي راح . كلشي راح
______
راح اروح وهذي آخر جية يمك
لو يخلوني يخويه چان المك
كلك اسهام آنه ودي حيل اضمك
خلي أصبغ شيلتي من هذا دمك
ألوداع .. وادري هذا آخر لقاء
ألوداع .. تعبتني كربلاء
ألوداع .. يحلى وياك البكاء
الوداع .. يمك اشمحلى الهواء
اوداعة الله ياحبيبي . رايحة الشام العذاب
للسبي ونوم الخرابة . وگعدتي فوگ التراب
امودعينة . وانسبينة . اتعذبينة
وكلشي راح . كلشي راح
حيدر الحلفي
