2022-02-26 13:48:06
وحشه دنيانه عليكم حلوه جانت حيل بيكم
هم يجونه لونسونه
----------------------------
حله الموت ابعينكم يالرحتو عنه
عمر وياكم كَضينه شننسه منه
اشكَد حبايب بالنجف منكم دفنه
ياعجيبه الموت ماعنده محنه
جم عزيز الباك عمره خله بالدلال جمره
بس جفونه لونسونه
----------------------------
الدنيا لليفكَد عزيز اتصيرظَلمه
ايعيش لو تخلص حياته مايهمه
هو المضيع ضوه عيونه اشينيمه
ندري بكلوب المكَابر ماكو رحمه
التاخذه مايرجع ألنه ماشبعنه اوداع منه
فاركَونه لونسونه
----------------------------
والله مشتاكين الكم كافي فركَه
حكَه المفاركَ حبيبه ايموت حكَه
لا امل يجمعنه بيهم لاكو ملكَه
اشكد جبيره الدنيا بس من رحتو خنكَه
يعني خلصت هاي هيه بعد منكم ماكو جيه
اتذكرونه لونسونه
----------------------------
بس صوركم ظلت اتهيج المواجع
الهن اشكد ينكسر كَلبه أليباوع
عن قهرنه تسولف اوياهه المدامع
الميت اترد روحه لهله آنه سامع
وانتو ماواحد اجانه والبجي اعليكم عمانه
ماخذونه لونسونه
----------------------------
مااخذتونه اشبقه هـالدنيا بيها
يمته هاي عيونه يخلص بجيها
الروح تحجي اويه المكابر من يجيها
سكته ماغير الصدى يرجع عليها
اه يفراكَ الحبايب يعينه الله العنده غايب
الله عونه لونسونه
----------------------------
اشكبر واحدكم يموت ازغير بعده
الف هنياله الكَبر شايله ورده
شلون واحدكم تضم الكَاع خده
كلها ترجع اله اليموت اشيرده
ماترد ذيج الليالي الدنيا وحشه ابدون غالي
ضيعونه لونسونه
حيدر حسين الكرعاوي
75 views Haider Haider , 10:48