سمعو صوت تصفيق وتصفير ورأوا منذر واحمد وامجد ويزن ومعهم ملاك و | رواياتي📖📚
سمعو صوت تصفيق وتصفير ورأوا منذر واحمد وامجد ويزن ومعهم ملاك وجوان وتالين يخرجون من بين الشجر وتقدموا نحوهم.....وضحكت جوهرة على منظرهم إياد لجوهرة : دا شنو كنتي متفقة معاهم ولا شنو؟ جوهرة : أبداً والله انا زاتي مخلوعة زيك منذر : احم طبعاً دي فكرتي إياد : اصلا كنت حاستغرب لو ما انت سيد الفكرة منذر : والله شفتك طلعت من جنبنا وبعدا بي دقايق شفت جوهرة لحقتك وكانت مبتسمة فحسيت انها حتوافق جوهرة : ولو كنت رفضت كان عملتو شنو؟ منذر : بسيطة طبعاً كان رجمناكم رجماً بالحجار احمد : اهم شي انو مجهز لي اي حال يحصل منذر : طبعاً دا كلامك! جوهرة : يعني جيتو من البداية؟ منذر : اي وما يفوتك حضرنا اي شي
ضحك إياد وتلوّن وجه جوهرة خجلاً منذر : وازيدك من الشعر بيت سمعنا اي شي كمان إياد بشقاوة : كدي سمعتو شنو وريني؟ منذر وهو يحاكيه : حنجيب شفع! ونتشاكل في الاسم! وخضر وعشة! ضحك الجميع ورفع امجد هاتفه أمجد : صورة جماعية لي تخليد الذكرى يا جماعة
اجتمعوا حول جوهرة وإياد والتقط لهم العديد من الصور.....جلسوا بعدها جميعاً على الأرض وبدأوا يخططون لزواجهم واتفقوا على أن يكون بعد شهرين......
بعد مرور يومين.....
كانت ملاك جالسة في إحدى مائدات مطعم للوجبات السريعة ويجلس أمامها مهند وأروى.......استأذنت أروى لتذهب إلى الحمام وتركتهم.....اخرج مهند سيجارة لنفسه واشعلها ونظر إلى ملاك التي نظرت إليه ايضاً
مهند : شايفك مبسوطة مع يزن ملاك بتوتر : كيف عرفت؟ مهند بابتسامه ساخرة : يزن بي نفسو كلمني.....قال انك بتبادليو المشاعر! عشان كدا رفضتي كريم؟ نسيتي سنينك معاو كلها عشان خاطر يزن الجا قبل كم شهر؟ ملاك بغضب : ما فرقت الفترة المهم اني مرتاحة ومبسوطة معاو مهند : عارفة كريم لو عرف حيعمل شنو؟ حينسى انو يزن كان في يوم صحبو وصدقيني حتترحمي على شبابو ملاك بخوف : وانت لي توريو؟ ماف داعي يعرف
ضحك مهند بصوت عال وشعرت هي بالسخرية والاستهزاء بسبب ضحكته
مهند : كدي دقيقة! دايرة تقنعيني انو غاشة نفسك بأنو كريم ما حيعرف؟ ما اتوقعتك غبية للدرجة دي تصدقي؟ ملاك : انت ما توريو وخلي الباقي علي مهند : صدقيني كدا كدا حيعرف ما فرقت وريتو هسي ولا عرف بكرة بي نفسو الموضوع مسألة وقت فعشان كدا لسة ما فات الأوان ممكن تصلحي غلطتك دي الليلة قبل بكرة ملاك : دقيقة قصدك اني انهي علاقتي بي يزن؟ مهند : بالظبط كدا واوعدك انو حيكون سر بيناتنا وحيتدفن وكريم ما حيعرف بي شي ملاك بانفعال : مهند انا مستحيل انهي علاقتي بي يزن! انا بحبو
اخذ مهند نفساً عميقاً من سيجارته ونفث الدخان وانحنى للأمام نحو ملاك متحدثاً بهدوء
مهند : لو بتحبيو بالجد حتنهي العلاقة! لو بتخافي عليو بالجد حتنهي العلاقة! ملاك بعد أن تجمعت الدموع حول عينيها : ما حاستسلم اكيد لي قدام كريم حيلقى بت تانية تستاهلو ويكمل حياتو عادي! مهند : ملاك عايني حولينك واوعي! البتقولي فيو دا بتغشي بيو نفسك وانتي بالعلاقة دي ما بتدمري نفسك ويزن بس حتدمريني انا معاك! ملاك : كيف ما فهمت؟ مهند : انا عملت العلي وحذرتك ولمن الموضوع دا يتفتح انا ما حاتدخل ابداً! رأى أروى قادمة نحوهم وهي تبتسم...ابتلع ريقه وتحدث بنبرة مليئة بالألم وهو لا يزال ينظر نحوها مهند : ولا حأسمح انو أروى تكون ضحية انتقام
وسعت عينا ملاك بدهشة.....اذاً لذلك هو يريد منها انهاء العلاقة.....بسبب خوفه على أروى.....مهلاً أيقصد ان كريم سينتقم من يزن ويشرك أروى بذلك؟ مستحيل كريم ليس من هذا النوع! هذا بجانب أنه يعلم مدى حب مهند لأروى فمن المستحيل أن يفرّط بها أليس كذلك؟
جلست أروى بجانب مهند ونظرت إليهم وتحدثت : فشنو مالكم سكتوا كنتو بتقولو فشنو؟ ابتسم مهند وحاوط كتفيها بذراعه مقبلاً خدها مهند : كنت بسألا اذا حتساعدني اخطفك لانو الوضع الختانا فيو يزن بقا بضايقني الصراحة أروى : معليش عشان خاطري فترة وحتعدي اصلاً الامتحانات قربت وبعدا حنرجع زي الأول مهند : زي الاول؟ على اساس كنتي شغالة بي في الأول! أروى : اكتر من كدا كيف؟ مهند بغمزة : كدي خلصي امتحاناتك الم بتخلص وبتتوالد دي بعداك نتفاهم
ضحكت أروى وضحك هو معها.....ابتسمت ملاك بسعادة وهي تنظر إليهما....رأت كيف تبدّل مزاج مهند بثانية بعد أن أتت أروى رغم النقاش الحاد الذي دار بينهما.....هذا هو الحب الحقيقي.....اروى محظوظة لأن مهند يعشقها فبالرغم من قساوته التي بداخله يعاملها كالأميرات.....يعاملها كزجاج رقيق يخاف من أن يكسر بين يديه.......
في المساء.......
فتح كريم باب منزل والديه بهدوء كي لا يسمعه احد....دخل بخطوات هادئة متجهاً نحو السلم
هدى : كريم!
تباً هذا ما كان يحاول تفاديه.....التفت ببطء ورأى هدى واقفة أمام باب غرفة المعيشة وهي تنظر إليه بسعادة.....تقدم نحوها وسرعان ما احتضنته هي بقوة وبدت الدموع تتسلل من عينيها.....اشتاقت إليه بشدة......
