التنقيب في مواقع الويب web mining من المجالات البحثية الجميلة | Mohammed Eydan

التنقيب في مواقع الويب web mining
من المجالات البحثية الجميلة ويعتبر تطبيق لتقنيات التنقيب عن البيانات Data Mining على المواقع الالكترونية .
بصورة خاصة يركز على دراسة محتوى الموقع او الاعمال Actions التي تحدث على السيرفر المستضيف للموقع .
هنا السؤال شنو الفائدة منه ؟
جرب تتصفح بالفيس اعلان عن بيع الحاسبات الشخصية ، وبعد وقت راح تشوف هواي اعلانات ممولة يعرضها الفيس عن متاجر الحاسبات ! هذا هو الويب مايننك .
انواعه ثلاثة :
١- نوع يهتم بدراسة محتوى المواقع ، يعني مثلا اذا ملاحظ بالفيس من تنشر بعض الاشياء مباشرة يجيك تنبيه من ادارة الفيس وممكن يحظروك .
٢- نوع يهتم بدراسة هياكل المواقع وشلون هذي المواقع تتفاعل مع بعض او مع اجزائها وهذا بالاغلب غايته تحسين المواقع Web Optimization .
٣- نوع يهتم بدراسة سلوك مستخدمين الموقع وهذا اكثر الانواع استخدامها خصوصا بموضوع التسويق .
النوع الثالث ياخذون بيانات من السيرفر الي يسجل كلشي تسويه على الموقع مثلا من تنقر على رابط او تقرا منشور .. الخ ، بس شلون يعرفون انت ؟ كل ما تفتح الموقع السيرفر يفتح جلسة بينه وبين المتصفح الخاص بيك وينطيه رقم فريد او عن طريق الكوكيز (اذا ملاحظ بعض المواقع من تفتحها تظهرلك نافذة اسفل الصفحة تطلب منك توافق على الكوكيز ) .
هذا الموضوع ممكن يستفاد منه طلاب الدراسات العليا او الباحثين كموضوع لمشروعهم خصوصا اذا كدرو يستفادون من بعض خوارزميات تحسين البحث مثل الخوارزميات الجينية او PSO .
على سبيل المثال التنقيب في منصات التواصل الاجتماعي عن الارهابيين او المبتزين او المحتالين .. الخ .