قصيده على طور عتابي يخوتي ويامن عتابي للاستاذ باسم الكربلائي | الشاعر والرادود الحسيني ابو مجتبى الرماحي
قصيده على طور
عتابي يخوتي ويامن عتابي
للاستاذ باسم الكربلائي
احن الشوفتك وينك يغالي
وعاين للمهد وشكيله حالي
يعبد الله زماني خيب ضنوني
*******************
ماني الوالده البالفركه مفجوعه
احس عمري ظلام وطافيه شموعه
يعبد الله اون والونه مسموعه
انه ابدالك ركبتي كون مكطوعه
وحك دم الحسين و كسرت ظلوعه
على مصابك ابد ما تبرد اللوعه
حرام انجان تهنالي حياتي
وضل انحب عليك الحد مماتي
ودمع حزني ابد ميفارك جفوني
*******************
شريد انسه يعبد الله اشينسيني
اخلافك كون ابد لا طالت سنيني
جنت لو لحظه يبني تغيب عن عيني
اضيع بيها روحي ويمك الكيني
ردتك بالكبر عون و تباريني
ترد حك الربه وتعبه وتفك ديني
ذخرتك عونه للشيبه ذخرتك
مبالي السهم يكطع ركبتك
وكبل دفنك يريت الناس دفنوني
*******************
حنينه الروح ما تصبر على هجرك
تمنيتك ترد يبني وشم عطرك
لون غايب اكضي سنيني انتظرك
شلون تعود وانته موسد بكبرك
يعبد الله اذا تنساني ماعذرك
ولو بالطيف مر خل انظر البدرك
مرني بالحلم خليني اشوفك
امانه يبني لا تكطع طيوفك
اذا ماشوف وجهك تنعمي عيوني
*******************
اويلاه من زماني ومن مراميه
حرمني شوفت احبابي وكطع بيه
عفت جثتك على التربان مرميه
اوي راسك رحت للشام مسبيه
اصد العينك وعينك تصد ليه
وغسل راسك بدمعاتي ليليه
نايم يالولد والرمح مهدك
وانه الوالده السهرانه بعدك
فجعوني ابمصابك يبني فجعوني
*******************
اظل انحب عليك واهمل المدمع
لحد ما روحي يبني من الجسد تطلع
والتفكد ضناها لاتظن تهجع
ونتها الصخر من عدها يتصدع
اتمناك لحظه من الزمن ترجع
اسمع ضحتك وبوجهك اتطلع
ناري موجره و ماتطفه ناري
وعكبك موحشه و مظلمه داري
وصيح بصوت يم وليدي ودوني
******************
الشاعر ابو مجتبى الرماحي
