طفله و ضهدها الشوك و تريد اهلها اتنادي بضعيف الصوت من ي | الشاعر والرادود الحسيني ابو مجتبى الرماحي
طفله و ضهدها الشوك و تريد اهلها
اتنادي بضعيف الصوت من يسمع الها
طول غياب حسين ماضل دمع بالعين
___________________
مشه حسين بضعونه و غايته الكوفه
وظلت فاطمه بالدار ملهوفه
على افراش المرض دمعتها مذروفه
و كلبها عالجفوها ايذوب من خوفه
تتمنه يرد حسين و تشوفه
ويداوي مرضها ابلمسة اجفوفه
الغالي من يروح يصعب غيابه
و ما تطمئن الروح الا ابأيابه
اخذوني يالماشين ماضل دمع بالعين
___________^___^___
تحاجي الدار يادار الاهل ظلمه
خنكه و ماتمر بربوعج النسمه
كبل جنتي ملاذ ومكصد الامه
وصرتي موحشه بغياب ابو اليمه
وين ابدور جانت بيج ملتمه
طشت و الشمل هيهات شيلمه
جان بوجود حسين عامر مضيفج
وانس وملك يادار جانت تضيفج
اهل المكارم وين ماضل دمع بالعين
___________________
ويلي من زماني و سطرته التعمي
وياكوسه اللي بسهام الهجر يرمي
المرض هدم اركاني وياكل بجسمي
وجفني من البواجي اعله الاهل مدمي
ظلمه الدنيه من بعد الكمر عمي
انطيه العمر لوبس يرد يمي
مشتاكه للعباس زايد حنيني
لوبس تشوفه العين يسكن ونيني
عباس اجيبه منين ماضل دمع بالعين
___________________
تالي وياك ياجور الزمن تالي
ما صحت ضميرك دمعتي وحالي
ما ترحم جسم من المرض بالي
ما ترحم وحيده متيها الوالي
ما خليتلي من الاهل غالي
خذت حته الطفل والمهد ضل خالي
جم لوعه جم مصاب راواني دهري
تتصدع الاوتاد لومرها قهري
ظهري انجسم نصين ماضل دمع بالعين
___________________
وحيده بكيت ياهو اللي يدك بابي
يعاوني و يواسيني عله امصابي
اشد من جمر علتي فركة احبابي
عمري من بعدهم كل نفع مابي
ياهو اللي يصل لضعون غيابي
وياخذ لبو اليمه دموعي وكتابي
و يكله تترجاك طفله بوجلها
بس رجعتك يحسين تشفي عللها
ملهوفه عالغالين ماضل دمع بالعين
___________________
الشاعر ابو مجتبى الرماحي
