يكولون مشت زينب سبيه يكولون وياها الفا | الشاعر والرادود الحسيني ابو مجتبى الرماحي

يكولون مشت زينب سبيه
يكولون وياها الفاطميه
عجب وين الكفلها عجب جا وين اهلها
ميدرون يكولون
~~~~~~~~~~~~~~~~~~~~~
هاي الجان اخوها مايفاركها
ولو تنخاه بشده الدنيه يحركها
راحت للسبي والشمر رافكها
وهاي متونها من السوط زوركها

اويلاه على مصابج يزينب
اويلاه على الخدر التسلب
غريبه وياهو الها عجب جاوين اهلها
ميدرون يكولون
~~~~~~~~~~~~~~~~~~~~~
جانت كبل جانت هسه راح الجان
لادار التلمها ولابكت خوان
راحت كل زلمها وظلت النسوان
وبس ضل العليل من المرض نحلان

ينادي يعمه لا تونين
ينادي بجالج راس الحسين
فجعتيني يكلها عجب جا وين اهلها
ميدرون يكولون
~~~~~~~~~~~~~~~~~~~~~
يادرب اليسر مشتول بالالام
طول الجرح من طف كربله للشام
وزينب مثل ابوها كهف للايتام
تسهر عينها حته اليتيم اينام

دللول عله عيون اليتامه
دللول تصبحون بسلامه
تظللهم بظلها عجب جاوين اهلها
ميدرون يكولون
~~~~~~~~~~~~~~~~~~~~~
كلساعه طفل يصرخ دلحكيني
يعمه من العصي مااحس بيديني
واليضربني ما يرحم دمع عيني
ومن اطلب رحمته اكثر يأذيني

يعمه ضربني ومارحمني
يعمه واذا ابجي شتمني
عن الوالد سئلها عجب جاوين اهلها
ميدرون يكولون
~~~~~~~~~~~~~~~~~~~~~
سوط الشمر من يضربها عالمتنين
زينب تلتفت وتشوف راس حسين
يصد الراس اخوه عباس عين بعين
يكله منين اجيب السيف والجفين

تمنيت ترد الروح بينه
تمنيت نحامي هالظعينه
ونكص ايده اليصلها عجب جاوين اهلها
ميدرون يكولون
~~~~~~~~~~~~~~~~~~~~~

مرت عله الكوفه وريت لامرت
شافت دار ابو الحسنين وتحسرت
حنت للزمان الراح وتذكرت
من جانت اميره مدلله وكبرت

هضيمه الكبل جانت اميره
هضيمه يشوفوها اسيره
ويكودوها بحبلها عجب جا وين اهلها
ميدرون يكولون
~~~~~~~~~~~~~~~~~~~~~

الشاعر ابو مجتبى الرماحي