وينك يعباس زينبكم بحيره ضلت يبو الغيره | الشاعر والرادود الحسيني ابو مجتبى الرماحي
وينك يعباس
زينبكم بحيره ضلت يبو الغيره
وينك يعباس
~~~~~~~~~~~~~~~~~~~~~
زينب ابين العساكر و المخاطر
واليتامه والارامل
صاحت اهنا ياهلي يهل المفاخر
والكرامه والمراجل
ترضه غيرتكم يروعون الحراير
يالنشامه منهو قابل
ياخيرة الناس
ماظن تقبلوها للعيله يسبوها
وينك يعباس
~~~~~~~~~~~~~~~~~~~~~
وينه كافل خدري والرايه بيمينه
والحرايب ما تهمه
من يهد غيره وشرف ينضح جبينه
والكتايب ما تلزمه
ما معودني اصيحه وما يجينه
بالنوايب انخه بسمه
للخوه نبراس
من اوكع ابشده الكه الفرج عنده
وينك يعباس
~~~~~~~~~~~~~~~~~~~~
انه زينب ها يعباس اعله بختك
نظره منك تطفي جمري
ترضه من بعد الخدر يسبوها الاختك
مااضنك لا يذخري
الموت مايعذر وانه ابجيت و عذرتك
وهذا حزنك حاني ظهري
خدر اختك انداس
لاخيمه لا والي ياهو اللي يبرالي
وينك يعباس
~~~~~~~~~~~~~~~~~~~~~
خويه بعدك حار ابو اليمه بزمانه
وضل ينادي وسفه وسفه
منكسر ظهره للمخيم لفانه
حاله يصعب من اوصفه
ناده يا زينب تره الغالي جفانه
وهذا جوده وهذا جفه
مكطوع الانفاس
يم النهر عفته متكطعه جثته
وينك يعباس
~~~~~~~~~~~~~~~~~~~~~
خويه حال حسين ياريتك تنظره
صدره داسوه بالحوافر
والشمر كدام عيني ايحزله نحره
وانه اصيحن لا يكافر
كالي كلبج يزينب الا اكسره
ماكو رحمه ولامشاعر
راح ارفع الراس
يازينب كبالج وتشمت بحالج
وينك يعباس
~~~~~~~~~~~~~~~~~~~~~
خويه صعبه المثلك ايضيع خواته
ياكفيلي يامهجتي
والله تكسر كلبي نظرات الشماته
راح اموتن من حسرتي
سور خدري اتهدم وراحو حماته
ومابقتلي بس دمعتي
ماعندي حراس
دار الوكت بيه وراح امشي مسبيه
وينك يعباس
~~~~~~~~~~~~~~~~~~~~~~
الشاعر ابو مجتبى الرماحي
