زينة : بدي روح على جامعتي ، اسحب الفصل و قدم وراق نقلي لهون و | • حِگايتي 💚🌸
زينة : بدي روح على جامعتي ، اسحب الفصل و قدم وراق نقلي لهون و كمان ….
نوال : كمان شو ؟
زينة : بدي مر على بيت احمد بس خلص
نوال : لشو ؟ ما قلنا رح نسكر قصص الماضي كلا و نبدا حياة جديدة ؟
زينة : لا تخافي مو رايحة قلو يرجعلي ، احمد كان انسان شهم و كريم معي و ساعدني بمحنتي ، لهيك مو حاببتو يبقى اخد عني صورة مو حلوة و يفكرني كنت عم اخدعو
نوال : مع انو مو شايفة في داعي لهالحركة ، بس اذا هيك بترتاحي ….. خلص عملي اللي بدك اياه
زينة : لكن انا رايحة ، بدك جبلك شي بطريقي ؟
نوال : لا ، بس ما تتأخري ، لانو بدي فضي البيت و ضب تيابنا بالشنط الليلة
زينة : يعني خلص نويتي انو ننقل لشقة البحر ؟
نوال : اي ، رح بيع هاد البيت ، لقينالو شرا ، منعيش في الشقة و منتصرف بحقو لبين ما تجي المصاري ، و مندفع اتعاب المحامي
زينة : حل منطقي ، لكن ما رح طول
نوال : الله معك
:
طلعت زينة على جامعتا هي و حاسة حالا متل فراشة نقية ، خالية من الذنوب ، بالا مرتاح و نفسيتا هديانة ، عم تشوف الحياة بمنظار التفاول لاول مرة ، من بعد سنين قهر و ذل طويلة .
فاتت الجامعة هي و عم تسترجع ذكريات كتيرة ، منها السعيد و منها المؤلم ، وجوه بتعرفا و وجوه لاول مرة عم تشوفا ، سلمت على رفقاتا و زملائا ، فتشت بيناتن عن جيهان بس للاسف ما لقيتا
زينة : كسرت خطي و ضيعت رقما ! هلا كيف بدي حاكيها ؟
سألت عنا بين الطلاب بس الكل اكد انو محد شافا اليوم ، بس يئست من البحث عنا ، توجهت لدائرة التسجيل و قدمت طلب نقل لجامعة تانية ، خلصت امورا و توجهت لبيت احمد ، دقت الباب و نطرت ، طلعتلا خالتو
زينة : خالة رغدة كيفك ؟
رغدة : منيحة
احست عليها زينة انو ما انبسطت بشوفتا ، و شكت يكون احمد مخبرا
رغدة : خير يا بنتي شو جابك ؟
زينة : كنت جاية شوف احمد ، هوي موجود ؟
رغدة : اتركي احمد بحالو ، ما بكفي ضحكتي عليه و استغليتي طيبتو و كنتي رح تخدعيه و هو ما قدملك غير كل خير ؟
زينة : انا مو جاية لشي من اللي ببالك ! انا بس كنت بدي ….
و قبل ما تكمل جملتا ، طلع احمد من ورا خالتو ، انصدم بس شافا ، لكنو حاول يخبي صدمتو
احمد : خالتي انتي فوتي جوا ، انا بحكيها
رغدة : بس…
احمد : خلص فوتي
فاتت خالتو لجوا على مضض و احمد حاول يتصرف بشكل طبيعي مع زينة ، رحب فيها و قعدا بالحديقة
زينة : كيفك يا احمد
احمد : كتير منيح ، عايش و مكمل حياتي
غصت زينة بس حست عليه متضايق و بعدو متأثر بسببا
زينة : رح قول و اختصر
احمد : عم اسمعك
زينة : احمد انا جيت اليوم لاعتذر منك ، بس ما تفهمني غلط ، ما عم اقصد شي من اعتذاري غير الاعتذار ….
احمد : اعتذار !
زينة : اي ، انت شاب ما في منك ، طيب و شهم و عندك نخوة ، انا ما شفت منك غير كل خير ، لهيك جيت وضحلك الصورة حتى ما تفكر انو كنت عم اخدعك
احمد : عم اسمعك
زينة : انا بهديك الليلة ، وقت عرضت عليي الزواج كنت ناوية خبرك كلشي ، بس انت ما سمحتلي و شجعتني اكتر وقت قلتلي انك قبلاني متل ما انا باخطائي و عيوبي
احمد : لانو فهمت عليكي شو كنتي بتقصدي ، و كنت حابب وصلك فكرة انو ماضيكي ما بهمني ، حتى لو كنتي غلطانة مع عامر هالشي ما كان رح يغير نظرتي فيكي
زينة : يعني كنت بتعرف و مع هيك اجيت بهدلتني و اهنتني ؟!!
احمد : ما كنت اعرف ، شكيت من حكيك انك غلطانة معو ، و هالشي ما اخدتو بعين الاعتبار لانو كلنا منغلط ، و انا ما بقدر حاسبك على ماضي ما كنت موجود فيه ، بس لمن قلي عامر انو كنتي عم تعملي هالشي كرمال المصاري ، هون نصدمت ! و ادركت انو كنت رح اوقع بفح بنت….
زينة : لا تخجل قولا ، فخ بنت رخيصة بتبيع حالا كرمال المصاري
احمد : ……
زينة : لو خليتني اشرحلك ما كنا وصلنا لهون ، صح انا اخدت من عامر مصاري بس هالشي كان كرمال عملية اخي ، قبلتا على حالي مشان انقذ حياتو مو مشان جخ و اتمصرف متل ما افتكرت ، انت بتشتغل بالمشفى فيك ترجع للسجلات و تشوف انو مبلغ العملية كلف مليونين ، هوي نفسو المبلغ اللي اخدتو من عامر
تفاجئ احمد بالكلام اللي سمعو ، و ما عرف بشو يرد
فجأة هني و عم يحكو اجا صوت انثوي ناعم من بعيد عم ينادي حبيبي ، حست زينة انو بتعرف صاحبة الصوت ، تطلعت لتشوف مين و شافت جيهان جاية باتجاهن ، وقفت زينة مصدومة ، و جيهان متلا ، بقيو عم يتطلعو ببعضن بصمت ، لوقت قرر احمد يكسر هالحاجز و يحكي
احمد : انا و جيهان ارتبطنا و خطبتنا بعد يومين
كان شعور زينة صعب ينوصف ، متفاجئة على مصدومة على حاسة بالاحراج