=يلا نمشي احنا بعد دا، والف سلامة عليك تاني ياسوسن... -الله يسلمك.. "طلعت معاهم برا الغرفة، مروان ومصطفى كان واقفين برا" =مروان قاعد انت؟! *اي يا ابوي.. =خلاص عايزين حاجة من البيت؟! *لا، لو محتاجين بضرب ليكم.... =يلا مع السلامة الف سلامة عليها مرة تانية يا هُيام _الله يسلمك... "بعد طلعوا" كان تمشي معاهم، اصلا مسموح ل مرافق واحد *بقعد في العربية، عشان لو عايزين حاجة اكون قريب... _طيب... خلاص امشي الغرفة انا ل أمي.... *طيب، تصبحي ع خير.. _وانت من اهلو. "دخلت الغرفة لقيت امي صاحية..." -طلعوا خلاص نسابتك _اي... مروان قاعد لاكن -قاعد وين؟! _في العربية قال عشان لو عايزين حاجة -كتر خير والله ما قصر... _اي "قعدت اتونست مع امي، لمن نامت، ما جاني نوم انا ، طلعت برا المستشفى، لقيت مروان طالع من العربية وجا على " *مالك محتاجة حاجة _لا، بس ما جاني نوم قلت اطلع اشوم هوا شويه، ما بحب جو المستشفيات دا.. *تعالى طيب نقعد في العربية.. _لا عايزه هوا طبيعي... *طيب تعالي نقعد هنا "كان في زي كم كراسي كده قعدنا فيهم" اجيب لك حاجة من البقالة.. _لا، شكرآ... "بقيت ساكتة وهو ساكت، شوية وقال لي *انتي كويسه؟! _اي" استغربت من سؤال مروان، اصلا عايزة امسك دموعي بالعافية،شوية ورفعت رأسي عشان دموعي ما تنزل قال لي *خليها تنزل ليه... انتي ماكويسة يا هُيام _اصلا ما كويسة" وطوالي قعدت ابكي" خائفة شديد على امي،لو كان حصل ليها حاجة ما كنت ح اسامح نفسي... انا أهملت أمي الفترة الأخيرة... انت ما عارف امي دي تعبت عشاني انا ويوسف قدر شنو، بعد ابوي مات الدنيا كلها جات عليها حتى اعمامي الاحنا عيالهم... اي واحد فيهم كان بفكر ل مصلحتو، هي تعبت شديد...ااا لمن البنات اتصلوا لي ما حسيت بنفسي الا وانا في السلم... كنت خائفه تمشي زي ابوووي... "بقيت ابكي زيادة، حسيت ب يدي مروان في يدي ويطبطب عليها وقال لي *عارف احساسك انا، ما تقلقي الدكتور قال ح تكون كويسة وبكره الصباح نطلع... _ان شاء الله *المرض إبتلاء وكفارة ل الذنوب، ربنا بحبها _ونعمه ب لله... *عارفة بختها عندها بت زيك وبتفكر فيها كدة... ربنا يحفظها لك ان شاء الله ويطول في عمرها... "لمن قال كده ابتسمت" آمين... "زحيت يدي من يد مروان ، عشان امسح دموعي، زح يدو وقال لي" *آسف... ااا اقوم اجيب لك موية "جاب لي موية ومنديل" _شكرآ *عفوا _ادخل انا بعد دا الساعه ماشه على تلاته... *اي، ادخلي... _مروان، ممكن بعد نطلع اقعد كم يوم مع امي؟! *ممكن اكيد...يلا امشي النوم بعد دا _انت كمان نوم من قبيل قاعد... تصبح على خير *وانتي من اهلو "مروان بعاين ل هُيام لمن دخلت المستشفى، بقى يتكلم مع نفسو 'شنو يا مروان مالك قبيل ما قادر تمسك نفسك لمن شوفتها بتبكي، كان في داعي تمسك يديها، لو عليك كان عايز تاخدها في حضنك صح... خائف عليها وعايز تشيل الحزن منها!! ....دا كل ليه.. اوووعك تفكر تقول حب!! ،احتمال بس عشان اول مرة تتكلم عن حياتها قدامك واحتمال عشان انت كمان عارف احساس فقد الأم ' "
